Śpieły piersik — sapraŭdnaja skarbonka pažyŭnych rečyvaŭ.
Dziakujučy vysokamu ŭtrymańniu vady, piersiki dobra padtrymlivajuć vodny bałans arhanizma — hetak ža efiektyŭna, jak šklanka vady. Akramia taho, jak piša The New York Times, jany źmiaščajuć kalij — elektralit, jaki stračvajecca z potam padčas fizičnaj aktyŭnaści i śpioki.
Kalij nieabchodny dla narmalnaj pracy muskułaŭ, serca i niervovaj sistemy. Nievialiki piersik źmiaščaje kala 180 milihramaŭ kaliju — heta prykładna 4 % ad sutačnaj normy, kali aryjentavacca na siaredniuju rekamiendavanuju kolkaść 4700 mh.
Fłavanoidy i karacinoidy: dvajnaja abarona
Jarkija kolery piersikaŭ — vynik spałučeńnia fłavanoidaŭ (adkaznych za ružova-čyrvony adcieńnie) i karacinoidaŭ (aranžavyja tony). Hetyja rečyvy vykonvajuć u raślin achoŭnuju funkcyju, a ŭ čałaviečym arhaniźmie spryjajuć źnižeńniu ryzyki chraničnych zachvorvańniaŭ.
Daśledavańni pakazvajuć, što ludzi, jakija prytrymlivajucca dyjety, bahataj na fłavanoidy, jak praviła, majuć nižejšuju ryzyku sardečnych zachvorvańniaŭ.
Fłavanoidy taksama mohuć dapamahčy zachavać vastryniu pamiaci i kahnityŭnyja zdolnaści. Častka ź ich moža pieraŭtvaracca kišačnymi bakteryjami ŭ złučeńni, zdolnyja pranikać u mozh. Adpaviedna adnamu z daśledavańniaŭ, fłavanoidy mohuć spryjać palapšeńniu chutkaści reakcyi i apracoŭki infarmacyi ŭ pažyłych ludziej.
Karacinoidy dziejničajuć jak antyaksidanty — zmahajucca sa svabodnymi radykałami, što paškodžvajuć kletki i vyklikajuć zapaleńnie.
Krynica vitaminu A
Karacinoidy majuć jašče adnu karysnuju ŭłaścivaść. Naš arhanizm pieratvaraje ich u vitamin A — adzin z klučavych elemientaŭ dla zdaroŭja vačej. Vitamin A nieabchodny dla funkcyjanavańnia siatčatki, jakaja pieraŭtvaraje śviatło ŭ sihnały dla mozhu. Akramia taho, vitamin A spryjaje rehienieracyi kletak, u tym liku tych, što składajuć skuru i imunnuju sistemu.
Adzin nievialiki piersik utrymlivaje kala 35 mkh pravitaminu A ŭ vyhladzie β-karatynu i inšych karacinoidaŭ — pryblizna 4 % ad rekamiendavanaha sutačnaha abjomu dla darosłaha čałavieka.
Jak užyvać piersiki z maksimalnaj karyściu?
Kab atrymać maksimum karysnych rečyvaŭ, nie varta łupić piersik — mienavita ŭ skurcy kancentrujucca značnyja kolkaści polifienołaŭ, klatčatki i častka karacinoidaŭ. Dastatkova prosta pamyć frukt u chałodnaj vadzie i vycierci papiarovaj survetkaj — heta źnizić ryzyku spažyvańnia piestycydaŭ abo bakteryj.
Zamarožanyja piersiki taksama mohuć być karysnymi. Kansiervavanyja piersiki, u svaju čarhu, pažadana vybirać biez dabaŭlenaha cukru. Ale važna pamiatać: biez skurki častka karysnych rečyvaŭ hublajecca.
Kab zachavać pažyŭnyja rečyvy padčas hatavańnia, lepš nie pierahravać piersiki. Naprykład, ich možna razrezać napałovu, źlohku zmačyć aliŭkavym alejem i zapiačy na hryli — tak jany zachavajuć svoj smak i karysnaść.
My ž prapanujem pryhatavać śmiatannaje žele ź piersikami, a dla tych, kamu padabajecca ekśpierymientavać — tradycyjny amierykanski desiert — piersikavy kobler.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ2
Kamientary