Rasija «prymaje namahańni, kab akazać sadziejańnie iranskamu narodu» ŭ suviazi z abvastreńniem kanfliktu na Blizkim Uschodzie. Pra heta zajaviŭ rasijski prezident na sustrečy ŭ Maskvie z kiraŭnikom MZS Irana Abasam Arahčy, paviedamlaje Rasijskaja słužba Radyjo Svaboda.
Pucin zajaviŭ pra «niepravakavanuju ahresiju suprać Irana», jakaja «nie maje nijakich apraŭdańniaŭ», miarkujučy, vierahodna, udary Izraila i ZŠA pa iranskich jadziernych abjektach. Pavodle rasijskaha prezidenta, metaj sustrečy z Arahčy źjaŭlajecca «razam padumać, jak možna vyjści ź siońniašniaj situacyi». Rasijski prezident taksama paprasiŭ pieradać najlepšyja pažadańni prezidentu Irana Masudu Piezieškijanu i viarchoŭnamu lidaru Ali Chamieniei.
Kiraŭnik MZS Irana ŭ svaim vystupleńni prama ŭzhadaŭ Izrail i ZŠA, skazaŭšy, što Iran zaraz «abaronić svoj suvierenitet i krainu». Jon padziakavaŭ Rasii za padtrymku i zajaviŭ, što jana, asudziŭšy ŭdary pa Iranie, apynułasia na «pravilnym baku historyi».
Pres‑sakratar Kramla Dzmitryj Piaskoŭ raniej na pytańnie ab tym, jakuju dapamohu moža akazać Rasija Iranu, skazaŭ, što ad Arahčy čakajuć, što jon pradstavić svaje prapanovy. Sam Pucin raniej padkreśliŭ, što ŭ dahavory ab partniorstvie z Tehieranam niama punkta ab vajennym supracoŭnictvie.
Viarchoŭny lidar Irana ajatała Chamieniei nakiravaŭ Arahčy ŭ Maskvu, kab damahčysia ad Pucina bolšaj dapamohi, čym asudžeńnie dziejańniaŭ Izraila i ZŠA. Pra heta sa spasyłkaj na krynicy paviedamlaje Reuters. Pavodle dadzienych krynic u Iranie, pakul Tehieran «nie ŭražany» uzroŭniem padtrymki z boku Rasii i čakaje ad Maskvy bolš, ale čaho mienavita — nie paviedamlajecca.
Pucin, jak paviedamiŭ u tym liku prezident ZŠA Donald Tramp, paśla pačatku izrailskich udaraŭ prapanavaŭ pasiarednictva Rasii, jakoje de‑fakta było adkinuta — Tramp paraiŭ Pucinu «spačatku zaniacca Rasijaj», majučy na ŭvazie mirnaje ŭrehulavańnie vajny va Ukrainie.
Ciapier čytajuć
Rasijanin z sudzimaściu zaniaŭsia dabračynnaściu ŭ Biełarusi. U niekatorych paśla dapamohi Dziadzi Jašy pačynajucca prablemy10
Kamientary