Kaciaryna Cichanava — nie prosta dačka Pucina. Jaje ličać mahčymaj pierajemnicaj

Kaciaryna Cichanava naradziłasia 31 žniŭnia 1986 hoda ŭ niamieckim Drezdenie (tady jašče HDR), u siamji na toj čas aficera KDB Uładzimira Pucina i jaho žonki Ludmiły. Jana — małodšaja ź dźviuch aficyjnych dačok prezidenta Rasii. Starejšaja siastra — Maryja (ciapier viadomaja jak Maryja Varancova).

Pa viartańni siamji ŭ Sankt-Pieciarburh Kaciaryna vučyłasia ŭ niedziaržaŭnaj himnazii z pahłyblenym vyvučeńniem niamieckaj movy, a paśla pierajezdu ŭ Maskvu — u škole pry pasolstvie Hiermanii ŭ Rasii.

Pavialičyć

Vyšejšuju adukacyju Kaciaryna pačała atrymlivać na Uschodnim fakultecie Sankt-Pieciarburhskaha ŭniviersiteta, ale paźniej jana kardynalna źmianiła profil i skončyła mahistraturu miechanika-matematyčnaha fakulteta Maskoŭskaha dziaržaŭnaha ŭniviersiteta.

U 2019 hodzie Cichanava abaraniła kandydackuju dysiertacyju ŭ halinie tearetyčnaj miechaniki.

Siońnia jana źjaŭlajecca namieśnicaj dyrektara Instytuta matematyčnych daśledavańniaŭ składanych sistem MDU, kiraŭnicaj Centra nacyjanalnaha intelektualnaha reziervu MDU, dyrektaram Fondu «Nacyjanalnaje intelektualnaje raźvićcio», a taksama kiruje fondam «Inapraktyka» — strukturaj, pad brendam jakoj zhadanyja centr i fond ździajśniajuć svaju biznes-dziejnaść.

Tak, jany prymali ŭdzieł u raspracoŭcy technałahičnaj daliny MDU, pieršy kłastar jakoj Pucin uračysta adkryŭ u studzieni 2023 hoda.

U 2020 hodzie Cichanava ŭznačaliła jašče adnu arhanizacyju — Instytut pierśpiektyŭnych daśledavańniaŭ prablem štučnaha intelektu i intelektualnych sistem.

Zasnavany pry padtrymcy dziaržavy fond «Inapraktyka» staŭ asnoŭnaj placoŭkaj dziejnaści Cichanavaj.

Zhodna z rasśledavańniem Fondu baraćby z karupcyjaj, siarod klijentaŭ «Inapraktyki» takija kampanii, jak «Rasnafta», «Transnafta», «Rasatam». Pry hetym fond nikoli nie pradstaŭlaŭ nijakich spravazdač ab tym, kudy iduć atrymanyja hrošy i jakija raboty za ich vykonvajucca.

U listapadzie 2023 hoda fond «Inapraktyka» kupiŭ 10% doli ŭ najbujniejšym vytvorcu bieśpiłotnikaŭ u Rasii — «Hieaskanie».

U lipieni 2022 hoda Kaciaryna Cichanava stała sustaršynioj Kaardynacyjnaj rady pa impartazamiaščeńni pry Rasijskim sajuzie pramysłoŭcaŭ i pradprymalnikaŭ.

Asabistaje žyćcio

Viadoma, što ŭ 2010-ch hadach Kaciaryna zachapiłasia akrabatyčnym rok-n-rołam i vystupała na mižnarodnych spabornictvach. Jaje partnioram byŭ Ivan Klimaŭ, proźvišča jakoha paźniej było znojdziena siarod členaŭ praŭleńnia fondu «Nacyjanalnaje intelektualnaje raźvićcio».

U 2013 hodzie dziaŭčyna vyjšła zamuž za Kiryła Šamałava, syna viadomaha bankira Mikałaja Šamałava, blizkaha da pucinskaha koła. U pieryjad šlubu Šamałaŭ atrymaŭ dolu ŭ naftachimičnym hihancie Sibur i trapiŭ u śpis miljarderaŭ.

U 2015 hodzie ahienctva Reuters praviało rasśledavańnie, padčas jakoha finansavyja analityki acanili košt karparatyŭnych chołdynhaŭ, jakija na toj čas naležali Kaciarynie Cichanavaj i jaje mužu, u dva miljardy dalaraŭ.

Ale šlub praciahnuŭsia niadoŭha. Kaciaryna stała tajemna sustrakacca ź Iharam Zialenskim, byłym dyrektaram Bavarskaha dziaržaŭnaha baleta. Na toj čas mužčyna taksama byŭ u šlubie i navat mieŭ dziaciej. Žurnalisty vyśvietlili, što ŭ 2017 hodzie Cichanava naradziła ad Zialenskaha dačku. U pačatku 2018 hoda jana aficyjna raźviałasia z Šamałavym.

Žurnalisty vyśvietlili, što z 2017 pa 2019 hady Cichanava bolš za 50 razoŭ lotała ŭ Miunchien. U pajezdkach jak pa krainie, tak i za miažu jaje supravadžała da 10 aficeraŭ Słužby biaśpieki prezidenta, što nie praduhledžana zakonam.

U 2022 hodzie, paśla pačatku poŭnamaštabnaj vajny suprać Ukrainy, Cichanava trapiła pad sankcyi ZŠA, Vialikabrytanii, ES, Japonii i Novaj Ziełandyi jak asoba, źviazanaja z rasijskim kiraŭnictvam i patencyjna datyčnaja da finansavańnia ahresii.

Mahčymy pierajemnik

Niadaŭna telehram-kanał VČK-OHPU pisaŭ, što Kaciaryna Cichanava moža razhladacca jak pierajemnik Pucina. Takim mierkavańniem z kanałam dzialiłasia ich krynica.

Pad heta ŭžo padviedziena hleba. Uładu ŭ Rasii siońnia kantraluje nie adnaasobna Pucin, a trochkutnik: siamja — słužba achovy — finansavy kłan Kavalčukoŭ.

«Centr pryniaćcia rašeńniaŭ u Rasii kančatkova źmiaściŭsia da kłanu Kavalčukoŭ — starych siabroŭ prezidenta i niehałosnych kurataraŭ jaho dački Kaciaryny Cichanavaj — i načalniku słužby achovy prezidenta Rubiažnomu», — adznačaje ananimnaja krynica VČK-OHPU.

«Cichanava — nie prosta dačka. Jana — pierajemnik. Unutry elity ŭžo nie pytajucca «Ci budzie jana?», a abmiarkoŭvajuć «Kali?», — dzialiłasia krynica.

Pry hetym sama Kaciaryna zastajecca adnosna strymanaj publična i nie vystupaje z adkrytymi palityčnymi zajavami. Pry hetym jana faktyčna kuryruje šmatmiljonnyja kantrakty, źviazanyja ź impartazamiaščeńniem, technaraźvićciom, štučnym intelektam i vajskovymi technałohijami.

• 0
• 0
• 10
• 10
• 3
• 0
• 3
• 0