Jak PVT pačuvajecca ŭ 2025 hodzie: ajcišnikaŭ i hrošaj bolš, ale da adnaŭleńnia jašče daloka

Kolki rezidentaŭ i chto jany

Tak, pavodle paviedamleńnia BIEŁTA, u PVT zaraz 1026 rezidentaŭ, ź ich 139 byli pryniatyja ŭ 2024 hodzie i I kvartale 2025 hoda (viadoma, što zimoj nabrali 48). Kolkaść kampanij, jakija vybyli za hety čas, nie paviedamlajecca.

Z ahulnaj kolkaści rezidentaŭ 30% — zamiežnyja centry raspracoŭki, 17 rezidentaŭ stvorany ź dziaržaŭnym udziełam. Praduktovych kampanij — 250.

Kolki supracoŭnikaŭ

Pa vynikach I kvartała 2025 hoda, u kampanijach-rezidentach PVT pracavali 59 tysiač čałaviek, heta +7% u paraŭnańni z anałahičnym pieryjadam 2024 hoda. Z hetych dadzienych robim vysnovu, što ŭ I kvartale 2024-ha supracoŭnikaŭ było krychu bolš za 55 tysiač čałaviek.

Heta nie całkam supadaje, ale kareluje z apublikavanaj minułaj zimoj infarmacyjaj pra toje, što ŭ kampanijach PVT pracuje 56 tysiač čałaviek. Viasnoj 2022 hoda, pavodle dadzienych devby, ich było bolš za 78 tysiač. Heta značyć, niahledziačy na rost za apošni hod, da adnaŭleńnia jašče daloka.

Kolki jany zarablajuć

U I kvartale 2025 hoda rezidenty vyrabili i realizavali pradukcyi na 2 miljardy+ BYN (prykładna 608 miljonaŭ dalaraŭ pa kursie), heta na 12% bolš, čym u I kvartale 2024-ha.

Vyručka rezidentaŭ za 2024 hod — 7,887 miljarda BYN (prykładna 2,416 miljona dalaraŭ pa kursie).

Ekspart

Abnavilisia dadzienyja i pa eksparcie. U 2024 hodzie rezidenty PVT zarabili za miažoj 1,8 miljarda dalaraŭ. Heta stolki ž, kolki i hodam raniej. U I kvartale 2025 hoda ekspart skłaŭ 459 miljonaŭ dalaraŭ. Heta na 7% bolš, čym u anałahičnym pieryjadzie minułaha hoda.

Jak adznačaje BIEŁTA (vidavočna, tranślujučy tezisy PVT), rost ekspartu adbyŭsia «dziakujučy aktyŭnym dziejańniam kampanij-rezidentaŭ pa pašyreńni hieahrafii źniešnieekanamičnaj dziejnaści», tak, u ahulnym abjomie ekspartu «istotna vyrasła dola krain SND (u pieršuju čarhu Rasijskaj Fiederacyi)».

Pavialičyć

Unutrany rynak

Pry hetym vyručka kampanij PVT na ŭnutranym rynku ŭ 2024 hodzie skłała kala 2 miljardaŭ BYN (prykładna 613 miljonaŭ dalaraŭ).

U I kvartale 2025 hoda vyručka na ŭnutranym rynku vyrasła na 24% u paraŭnańni z anałahičnym pieryjadam minułaha hoda i pieravysiła 500 miljonaŭ BYN (prykładna 152 miljona dalaraŭ).

Hetyja dadzienyja paćviardžajuć słovy ministra suviazi i infarmatyzacyi Kiryła Zaleskaha ab tym, što «dola ŭnutranaha rynku ŭ Parku vysokich technałohij mocna pavialičyłasia», skłaŭšy ŭ 2024 hodzie prykładna 25%.

Rost vyručki na ŭnutranym rynku ŭ I kvartale (+24%) apiaredžvaje rost ahulnaj vyručki (+12%), i heta nibyta kaža pra toje, što dola ŭnutranych prodažaŭ u rezidentaŭ Parka pavialičvajecca, a ekspartu adpaviedna skaračajecca.

Adnak ža absalutnyja pakazčyki vyručki (500 miljonaŭ unutranaj vyručki z 2 miljardaŭ BYN ahulnaj) śviedčać ab tym, što dola ŭnutranaha rynku i ŭ hetym hodzie praciahvaje trymacca na ŭzroŭni 25%.

Mahčyma, błytanina ŭźnikaje z-za kursavych roźnic.

Pra što kaža raźmierkavańnie dolej

U epochu da ŭzrušeńniaŭ ličyłasia, što ekspart u vyručcy PVT zajmaje kala 90%. Apošni raz hetuju praporcyju — 90% na 10% — stroha vykanali ŭ 2020 hodzie: 2,735 miljarda dalaraŭ (6,651 młrd BYN pa kursie) zamiežnaj vyručki pry ahulnaj vyručcy 7,4 miljarda BYN. Z taho času dola ekspartu niaŭchilna padała.

U rekordnym na vyručku 2021 hodzie dola ŭnutranaha rynku, pa padlikach devby, skłała krychu mienš za 14% (my ličyli z ulikam siarednich kursaŭ dalara za hod), u kryzisnym 2022-m — krychu bolš za 14%. Adpaviedna ekspartu — u rajonie 86%.

U 2023 hodzie ŭ vyniku padzieńnia ekspartu z 2,7 da 1,8 miljarda dalaraŭ (4,85 miljarda BYN pa kursie) i rostu ŭnutranaj vyručki z 1,3 da 1,5 miljarda BYN doli raźmierkavalisia prykładna 76% na 24%. A ŭ 2024-m pry niaźmiennym eksparcie ŭ absalutnych ličbach jaho dola jašče krychu źniziłasia: da 75%.

Takaja karcina ŭ ahulnym-ta zakanamiernaja: čym mienš ekspart u hrošach, tym mienš jaho dola i tym bolš dola ŭnutranaha rynku. Anamalnym zdajecca tolki skaračeńnie doli ekspartu na fonie jaho burlivaha rostu ŭ hrošach u 2021 hodzie.

U toj ža čas takaja dynamika kaža ab tym, što ŭnutranych zamovaŭ u rezidentaŭ PVT apošnija hady sapraŭdy stanaviłasia bolš.

Miž tym apošnija dva hady, u 2023 i 2024, jak vieličynia ekspartu, tak i raźmierkavańnie dolej zastajucca amal niaźmiennymi. Adnak ža ŭ absalutnych ličbach (BYN) vyručka na ŭnutranym rynku ŭ minułym hodzie značna vyrasła: 2 miljardy BYN suprać 1,5 miljarda BYN u 2023-m.

Ci aznačaje heta, što va ŭmovach deficytu zamiežnych zakazaŭ u Biełarusi adkryłasia bahataja krynica ŭnutranaha popytu? Ažyŭleńnie (rost na 33% u hrošach) jak byccam by vidavočny. Adnak ža varta pamiatać, što i siaredni kurs dalara za 2024 hod padniaŭsia na 21%.

Rost vyručki na ŭnutranym rynku ŭ pačatku 2025 hoda ŭ hetym sensie bolš pakazalny, tak jak kursavyja roźnicy ŭ paraŭnańni z 2024-m niaznačnyja. Cikava, jak budzie pavodzić siabie ŭnutrany rynak dalej, na fonie ŭmacavańnia nacvaluty.

• 0
• 0
• 0
• 0
• 0
• 0
• 0
• 0