Ispanija damahajecca pryznańnia katałonskaj movy ŭ ES: Brusel tarmozić praces
Siem krain Jeŭrapiejskaha cajuza vykazali zaniepakojenaść finansavymi i palityčnymi nastupstvami pryznańnia katałonskaj movy adnoj z aficyjnych moŭ ES. Takoje pryznańnie stała b precedentam, kali aficyjnaj movaj ES staje nie dziaržaŭnaja mova ŭsioj krainy.
Jak piša Politico.eu, u Jeŭrapiejskim sajuzie ŭźnikła sprečka vakoł moŭnaj palityki. Ispanija dabivajecca, kab katałonskaja, halisijskaja i baskskaja movy atrymali aficyjny status u strukturach ES. Heta było abiacańnie lidara ispanskich sacyjalistaŭ Piedra Sančesa ŭzamien za padtrymku katałonskimi deputatami jaho ŭrada mienšaści. Adnak prośba Madryda sutyknułasia z surjoznym supracivam.
U 2023 hodzie, u abmien na hałasy deputataŭ-katałoncaŭ, nieabchodnuju dla atrymańnia votumu davieru, premjer Sančes zaklučyŭ składanuju palityčnuju damovu. Pavodle jaje, Ispanija abaviazałasia prasoŭvać pryznańnie katałonskaj, bakskaj i halisijskaj u jakaści aficyjnych movaŭ Jeŭrasajuza. Adnak dla taho kab hetaja inicyjatyva ŭstupiła ŭ siłu, patrebnaja adnahałosnaja padtrymka ŭsich 27 krain-členaŭ ES.
Na nastupnym tydni Ispanija płanuje vynieści hetaje pytańnie na hałasavańnie ŭ Radzie ahulnych pytańniaŭ — orhanie, jaki rychtuje rehularnyja sustrečy kiraŭnikoŭ krain ES u Bruseli. Adnak, jak śviedčać dakumienty z sustrečy pastajannych pradstaŭnikoŭ krain-členaŭ ES, jakimi vałodaje Politico, u Bruseli panuje skieptycyzm i adsutničaje kansensus.
Bielhija, Kipr, Partuhalija, Niderłandy, Rumynija i Słavakija padtrymali prapanovu Ispanii, Charvatyja, Čechija, Finlandyja, Francyja, Hiermanija i Šviecyja padtrymali patrabavańnie Italii spačatku «vyznačyć košt i jurydyčnyja nastupstvy» takoj źmieny.
Madryd paabiacaŭ uziać na siabie ŭsie vydatki, źviazanyja ź pierakładam i dakumientacyjaj, kali novyja movy buduć pryznanyja za aficyjnyja. Ale niedavier zastajecca: šerah krain sumniavajecca, što Ispanija budzie hatovaja finansavać heta doŭhaterminova, asabliva z ulikam taho, što niaŭstojlivy ŭrad Sančesa jašče nie pravioŭ praz kartesy dziaržaŭny biudžet i znachodzicca pad ciskam z boku NATA adnosna pavieličeńnia vydatkaŭ na abaronu.
Dadatkovy faktar napružańnia — pahrozy z boku katałonskich sajuźnikaŭ u parłamiencie. Katałonskaja pravacentrysckaja partyja Junts, čyja padtrymka nieabchodnaja, kab urad sacyjalistaŭ ustajaŭ, adkryta vykazvaje niezadavolenaść zaciažkaj. Ich aburaje, što damoŭlenaści adnosna movaŭ dahetul nie vykananyja. Kali sprava nie zrušycca ź miesca, heta moža pryvieści da novaha palityčnaha kryzisu ŭ Madrydzie.
Ispanski ŭrad admoviŭsia kamientavać situacyju dla Politico, a pradstaŭniki Junts nie pažadali abmiarkoŭvać jaje publična.
Kamientary