Błohier Siarhiej Biaspałaŭ raskazaŭ, čamu ažaniŭsia letaś, a adśviatkavaŭ heta tolki ciapier
Siarhiej Biaspałaŭ vykłaŭ u instahramie fotazdymki sa svajho viasiella. Jon raspavioŭ «Našaj Nivie», što zrabiŭ śviata dla svajakoŭ i siabroŭ u pryhožuju datu, ale ž nasamreč ažaniŭsia jašče letaś.
Z budučaj žonkaj Kaciarynaj Siarhiej paznajomiŭsia ŭ Kijevie ŭ 2021 hodzie. Sama dziaŭčyna — ukrainka.
— My ŭpieršyniu sustrelisia ŭ kłubie. Kacia tady była dydžejem, pracavała ŭ markietynhu. Voś z taho momantu i pačałosia kachańnie. 4 lutaha 2022 hoda ja zaprasiŭ jaje na svoj dzień naradžeńnia i tady ŭpieršyniu pacałavaŭ. Na žal, litaralna praź niekalki tydniaŭ pačałasia poŭnamaštabnaja vajna. Kaci pryjšłosia vyjechać da svaich baćkoŭ u Vińnickuju vobłaść.
Tamu dalej dva miesiacy para mahła tolki pierapisvacca. Siarhiej pajšoŭ słužyć u połk «Azoŭ» u biełaruskuju rotu.
— Jana navat kazała «Nie idzi!». A ja adkazvaŭ, što nie, što ja budu jak žurnalist pisać pra biełarusaŭ, jakija vajujuć za Ukrainu. Kali adyšli ruskija z-pad Kijeva, prykładna ŭ krasaviku, Kacia pryjechała i my pačali žyć razam. Ja tady ŭžo moh vyjazdžać z bazy.
Paśla para vyrašyła vyjechać u Polšču i tam budavać žyćcio. Prapanovu ruki i serca Siarhiej zrabiŭ u 2023 hodzie padčas adpačynku z kachanaj. Dla hetaj ramantyčnaj padziei jon abraŭ haru Hievont.
— Heta było 30 žniŭnia — 31-ha ŭ Kaci dzień naradžeńnia. Ja vyrašyŭ na samym vysokim miescy hary zrabić kachanaj prapanovu. Havaryŭ na biełaruskaj movie. Viadoma, vielmi chvalavaŭsia. A jana nie adrazu zrazumieła, ci nie žartuju ja. U Kaci byŭ šok. Ale jana adkazała: «Tak!».
Aficyjna aformić adnosiny ŭ Polščy biełarusu i ŭkraincy było składana, tamu letaś u sakaviku zakachanyja śpiecyjalna palacieli ŭ Hruziju, dzie i pabralisia šlubam.
— Ale, na žal, tady byli padziei, jakija azmročyli našu radaść. U lutym dali sutki majoj maci, potym tatu adpravili na Akreścina. My vyrašyli troški pačakać sa śviatam.
Potym Siarhiej zmoh pieravieźci baćkoŭ ź Biełarusi, para lehalizavała svoj šlub u Polščy.
— I voś my vyrašyli, što čakać bolš niama čaho, i abrali pryhožuju datu dla śviata — 25.05.2025. Śviatkavać vyrašyli ŭ Biełaruskim domie ŭ Varšavie — haspadar skazaŭ, što ŭ ich jašče nikoli nie było viasiellaŭ. Usio prajšło cudoŭna: blizkija ludzi, dušeŭnaje biełaruska-ŭkrainskaje śviata… Adzinaje, žonka krychu prychvareła pierad hetym, ale ŭsio roŭna syhrała dydžej-set u viasielnaj sukiency.
Ciapier čytajuć
U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju3
Kamientary
ščaścia maładym! pryhožaja para.