Mašyna ŭjechała ŭ ludziej padčas paradu «Livierpula». Paciarpieli 47 čałaviek, u tym liku dzieci
U Livierpuli aŭtamabil urezaŭsia ŭ piešachodaŭ padčas śviatkavańnia pieramohi futbolnaha kłuba «Livierpul» u anhlijskaj Premjer-lizie.
U balnicy horada dastaŭleny 47 čałaviek, u tym liku čaćviora dziaciej, paviedamiŭ na bryfinhu pozna ŭviečary ŭ paniadziełak pradstaŭnik słužby «chutkaj dapamohi» Devid Kitčen, piša Bi-bi-si.
Pavodle jaho słoŭ, dvoje paranienych (darosły i dzicia) atrymali surjoznyja traŭmy.
Incydent adbyŭsia ŭ centry Livierpula, dzie prachodziŭ tradycyjny parad: hulcy kłuba, jaki pieramoh u čempijanacie Anhlii pa futbole, jechali na adkrytym aŭtobusie z kubkam u rukach. Paśla zakančeńnia paradu, kali ludzi pačali razychodzicca, u natoŭp urezaŭsia aŭtamabil Ford.
Pavodle słoŭ kiraŭnika pažarna-vyratavalnaj słužby hrafstva Miersisajd Nika Serła, u vyniku najezdu čaćviora čałaviek (troje darosłych i adno dzicia) apynulisia zacisnutymi pad kołami aŭtamabila. Pamočnica hałoŭnaha kanstebla Dženi Sims skazała na pres-kanfierencyi, što niekatorym paciarpiełym (pavodle źviestak, ich było 20) dapamohu akazali na miescy.
«Heta adbyłosia prykładna za try mietry ad nas, — raspavioŭ brytanskamu ahienctvu PA 48-hadovy Hary Rašyd, jaki pryjšoŭ na parad razam z žonkaj i dźviuma maleńkimi dačuškami. — Mašyna vyjechała sprava ad nas. Jana vyskačyła prosta z-za «chutkaj dapamohi», jakaja tam była pryparkavana».
«Usio adbyłosia vielmi chutka, — dadaŭ mužčyna. — Maja dačka pačała kryčać, na ziamli lažali ludzi. Ja bačyŭ ludziej, što lažali biez prytomnaści. Prosta žach».
Karespandent Bi-bi-si, jaki apynuŭsia na miescy incydentu, paviedamiŭ, što sam ledź nie paciarpieŭ u vyniku zdareńnia, a čałaviek, što znachodziŭsia za rulom aŭtamabila, padobna, nie sprabavaŭ spynicca.
«Za mašynaj pahnałasia hrupa mužčyn, jakija sprabavali bić jaje i kidali ŭ jaje roznyja pradmiety. Zadniaje škło było całkam raźbita, ale jana nie źbirałasia spyniacca», — kaža jon.
Adnak niekatoryja śviedki kažuć, što čuli, jak kiroŭca aŭtamabila sihnaliŭ, i častka ludziej «zmahła ŭchilicca».
«Ale kali jon prajazdžaŭ, ludzi, viadoma, vielmi razzłavalisia, i jany pačali biehčy za mašynaj. Zadniaje škło ŭ jaje ŭžo było raźbita», — skazaŭ ahienctvu RA 28-hadovy Mećju O'Kerał.
«My zaklikajem ludziej nie zajmacca zdahadkami adnosna abstavin siońniašniaha incydentu, — havaryłasia ŭ zajavie palicyi paśla incydentu. — Praciahvajecca maštabnaje rasśledavańnie, padčas jakoha buduć ustanoŭleny ŭsie abstaviny, što pryviali da sutyknieńnia».
Premjer-ministr Vialikabrytanii Kir Starmier padziakavaŭ ekstranym słužbam za chutkuju reakcyju i vykazaŭ spačuvańnie paciarpiełym. Jon nazvaŭ incydent žachlivym.
Praź dzieviać miesiacaŭ paśla vyzvaleńnia pamior palitviazień Valeryj Bohdan7
Kamientary