«Biełpoł» patłumačyŭ, z čym mohuć być źviazanyja pravierki na miažy Biełarusi i Rasii
Infarmacyja pra toje, što rasijanie masava spyniajuć na miažy dla pravierak transpart, jaki nakiroŭvajecca ź Biełarusi ŭ Rasiju, źjaviłasia na minułych vychodnych. Čas čakańnia ŭ čerhach na pravierku dasiahaje niekalkich hadzin. Pra mahčymyja pryčyny hetaha ŭ razmovie sa «Svabodaj» raskazaŭ pradstaŭnik inicyjatyvy byłych biełaruskich siłavikoŭ BelPol Uładzimir Žyhar.
Pavodle jaho infarmacyi, dziejańni rasiejcaŭ vyklikanyja žadańniem uzmacnić miery biaśpieki napiaredadni ŭračystaściej z nahody Dnia Pieramohi 9 maja.
«My ŭdakładniali hetaje pytańnie ŭ svaich krynic u Biełarusi, — kaža Žyhar. — Bolšaść ź ich sychodzicca ŭ mierkavańni, što heta previentyŭnyja zachady rasijskich śpiecsłužbaŭ, prymierkavanyja da 9 maja. Jany cudoŭna razumiejuć, što na terytoryju Biełarusi tearetyčna mohuć być zaviezieny vybuchovyja rečyvy. I z ulikam adsutnaści pamiežnaha kantrolu, kab pamienšyć mahčymaść zavozu vybuchovych rečyvaŭ, i byli ŭviedzieny takija formy kantrolu».
Pavodle Uładzimira Žyhara, kantrol dakumientaŭ i ahlad transpartu mohuć być skasavanyja paśla zakančeńnia śviatkavańniaŭ u zaležnaści ad apieratyŭnaj situacyi. Rasiejcy buduć dziejničać u adpaviednaści sa svaimi narmatyŭnymi aktami i zahadami kiraŭnictva. Skasavać kantrol na miažy ź Biełaruśsiu jany mohuć jak imhnienna, tak i praź niekalki dzion paśla śviatkavańniaŭ.
Ci śviedčyć uviadzieńnie dadatkovaha kantrolu z boku Rasii pra toje, što rasijskija siłaviki nie daviarajuć biełaruskim kaleham? Uładzimir Žyhar adznačaje, što abmien apieratyŭnaj infarmacyjaj adbyvajecca pastajanna, i nielha skazać, što rasiejcy nie daviarajuć biełaruskim siłavikam.
«Rasiejskija śpiecsłužby pastajanna atrymlivajuć infarmacyju ad biełaruskich, abmien źviestkami adbyvajecca, — kaža pradstaŭnik BelPol. — Ja b nie staŭ stavić pytańnie tak, byccam rasiejcy nie daviarajuć biełarusam i tamu sami vyrašyli praviarać transpart na miažy. Prosta ŭ rasiejcaŭ jość svaja zadača, jakuju jany pavinny vykonvać. Jany mohuć i nie stavić pad sumnieŭ prafiesijanalizm biełaruskich siłavikoŭ, ale musiać vykonvać ułasnuju zadaču pa achovie dziaržaŭnaj miažy».
Kamientary
[Zredahavana]