Maldyvy, Zanzibar i Italija: kudy paniesła adpačyvać prychilnikaŭ Łukašenki
Siezon adpačynkaŭ na mory-akijanie (i nie tolki) raspačaty. Pahladzieli, dzie ž adpačyvajuć prapahandysty, praŭładnyja spartsmieny i inšyja prychilniki režymu.
Maryja Piatraška z baćkami na Zanzibary
Prapahandystka Maryja Piatraška letaś pierajechała ź Minska ŭ Maskvu i ciapier kormić fejkami hledačoŭ telekanała «Rasija 24».
Zaraz jana palacieła adpačyvać na Zanzibar. Hety archipiełah, jaki ŭvachodzić u skład Tanzanii, apošnim časam karystajecca papularnaściu siarod zamožnych prychilnikaŭ Łukašenki — raniej fotazdymkami adtul vychvalalisia śpiavački Iryna Darafiejeva i Alena Łanskaja.
Piatraška ŭ adpačynku razam z baćkami. Darečy, žančyna nie ŭpieršyniu raspaviadaje ab tym, što adpačyvaje z mamaj.
Maryja vyrašyła razbavić ciulenievy adpačynak i pajechała na safary ŭ Tanzaniju.
— Zaŭsiody maryła pajechać siamjoj na safary. Bo baćki ŭklučali mnie Animal planet. Za što i papłacilisia.
Prapahandystka raspaviała, što ziebry dy i antyłopy nadakučyli joj praź piać chvilin, bo jany litaralna ŭsiudy.
— A potym naša mašyna zachrasła. I nam pryjšłosia vyjści ŭ adkrytuju miascovaść. Pobač byli bujvały — my vyrašyli, što jany smačniejšyja dla lva. Što vy viedajecie pra ekstrym? — pažartavała ŭ storys televiadučaja.
Maryja lubić byvać na bierazie Indyjskaha akijanu. Ale lubujecca jana nie tolki chvalami. Užo nie adnu storys prapahandystka pryśviaciła muskulistym chłopcam, jakija pieryjadyčna hulajuć na plažy ŭ futboł. Jana zachaplajecca pryhožymi mužčynami.
Bijatłanisty Smolskija z małym u Italii
Bijatłanisty Dzinara i Anton Smolskija, jakija pieryjadyčna vykazvajuć kryŭdu na toje, što nie mohuć vystupać u Jeŭropie, pajechali tudy ŭ adpačynak.
Dzinara pryznałasia, što jana i Anton nieadnarazova byli ŭ Italii na spartyŭnych zborach, ale padčas ich nikoli nie atrymlivałasia pahladzieć turystyčnyja miescy. Tamu ciapier jany razam z maleńkim synam Safronam adpravilisia vandravać pa Miłanie, Vieniecyi, Rymini (zhaniali ŭ San-Maryna, što pobač z kurortnym horadam). Sfatahrafavalisia i na fonie alimpijskich kołcaŭ, jakija ŭžo pastavili ŭ italjanskich harach u čakańni zimovych Alimpijskich hulniaŭ. Dzinara vielmi spadziajecca, što ŭ ich atrymajecca trapić tudy ŭ 2026 hodzie jak spartoŭcam.
U Rymie siamja pasialiłasia pobač z Vatykanam. Dzinara raspaviała, što, kab pabačyć fantan Trevi i Kaliziej adnosna biez natoŭpu, im pryjšłosia pryjści tudy a siomaj ranicy.
Nie abyšłosia biez šopinhu. Kolki b Łukašenka ni kazaŭ pra toje, što nie treba zachaplacca zachodnimi brendami, jaho prychilniki heta ihnarujuć. Dzinara radasna napisała ŭ telehramie: «Zajšli ŭ aŭtlet, a dalej usio jak u tumanie». Na fotazdymkach bačny pakiety i karobki z łahatypami Guess, New Balance i Under armour. Navat Safron, jakomu niama jašče 2 hadoŭ, paziruje ź firmovaj koftaj Adidas.
Smolskija ŭžo viarnulisia ŭ Minsk i nie zabyli paviedamić, što ŭ čarhovy raz zrazumieli: Biełaruś — najlepšaje miesca dla žyćcia.
Ksienija Sankovič ź siamjoj na Maldyvach
Byłaja himnastka, a ciapier hienieralnaja sakratarka Nacyjanalnaha alimpijskaha kamiteta abrała dla svajoj siamji luksavy adpačynak. Z mužam i dačkoj Ksienija Sankovič palacieła na Maldyvy.
Sama Ksienija nie vielmi imkniecca pakazvać svoj adpačynak u ekzatyčnym miescy. Spačatku jana apublikavała siamiejnaje fota ŭ samalocie. Ale potym nie ŭtrymałasia i dadała fota ź plaža. Siužet kłasičny: hołyja nohi i kielich biełaha vina. Praŭda, Ksienija ŭdakładniła, što ŭsio roŭna praciahvaje pracavać.
Zatoje jaje muž, rasijanin Illa Papoŭ, jaki zajmaje pasadu dyrektara pa markietynhu Usierasijskaj fiederacyi lohkaj atletyki, zapisvaje ryłsy na fonie Indyjskaha akijana.
Alaksandr Hleb ź siamjoj vybraŭ Maldyvy i Dubaj
Błohierka i žonka adnaho z samych viadomych futbalistaŭ Biełarusi Śviatłana Hleb raspaviała ŭ svaim instahramie, što letaś jana ŭpieršyniu zmahła ŭhavaryć muža na adpačynak nie ŭ Dubai, a na Maldyvach.
Śviatłana pryznałasia, što jana daŭno maryła pra hetaje miesca, ale ličyła, što dačkam lepš u Dubai, dzie niama kamaroŭ, zatoje jość znajomaja ježa. Plus u samoha Alaksandra byŭ stereatyp, što na Maldyvach sumna. Ale žonka jaho pierakanała.
U vyniku ŭsie zastalisia zadavoleny adpačynkam, a paśla ekzatyčnaha vostrava praviali jašče niekatory čas i ŭ Dubai.
Taćciana Traciak: Šry-Łanka, Armienija, Dubaj
Tvar HUBAZiKa i viadučaja ANT Taćciana Traćciak nie saromiecca pakazvać svajo šykoŭnaje žyćcio. Jana rehularna fatahrafujecca ŭ darahich restaranach dy kafe, kudy nosić svajho lubimaha sabačku. Žančyna ihnaruje toje, što ŭ Biełarusi ciapier zabaroniena brać pitomcaŭ u kramy i abjekty hramadskaha charčavańnia.
Adpačyvać Taćciana jeździć čaściej, čym siaredniestatystyčny biełarus hadoŭ za piać. Letaś u žniŭni i vieraśni jana vychvalałasia adpačynkam u AAE ŭ Fudžejry. Sioleta ŭžo ŭ sakaviku palacieła na Šry-Łanku. Potym była Armienija i, kaniečnie, lubimy Dubaj.
Ciapier ža žančyna znoŭ palacieła ź Biełarusi — hetym razam kab adśviatkavać svoj dzień naradžeńnia ŭ rasijskim Sankt-Pieciarburhu.
Taćcianie vielmi padabajecca toje, što na jaje luksavyja budni dy adpačynki źviartajuć uvahu. Bo publikacyjami ŭ «Našaj Nivie» jana lubić pachvalicca ŭ storys pierad padpisčykami. Byccam by zabyvajecca, što prostych ludziej za takoje adpraŭlajuć na Akreścina.
Anžalina Mikulskaja — Italija
Ryžesiorka kancertaŭ dla Łukašenki Anžalina Mikulskaja (jana ciapier kiruje pradziusarskim centram «Spamaš») śviatkavała Rastvo i sustrakała 2025 hod u Vialikabrytanii.
A ŭ čarhovy adpačynak vyrašyła prajechacca pra roznym haradam Italii. Jana fatahrafavałasia ź Pizanskaj viežaj, naviedvała halereju Uficy va Fłarencyi i lubavałasia fantanam Trevi ŭ Rymie.
Łanskaja na Zanzibary, Darafiejeva na Kubie, Siaroha ŭ Šviejcaryi: dzie adpačyvajuć zimoj łukašenkaŭskija śpievaki
Dzie sioleta adpačyvajuć Tur, Mirončyk-Ivanova, viadučaja HUBAZiKa dy inšyja łukašysty i jakija hateli jany vybirajuć?
«Nu kajf ža!» Kamientatarka «Biełaruś 5» Daryna Zapolskaja adpačyvaje ŭ Francyi FOTA
«Ja, moža, i nie mahu pajechać u vaš zasrany Paryž…» Lebiedzievu zusim nie bambić u adpačynku
Kamientary