Syn namieśnika dyrektara CRU zahinuŭ, zmahajučysia za Rasiju suprać Ukrainy
Majkł Hłos na radzimie byŭ ekaaktyvistam, a potym pajechaŭ u padarožža pa śviecie. U Rasii jon padpisaŭsia na hrupy pra Stalina i Lenina i źbiraŭsia zmahacca z «zachodniaj hiehiemonijaj».
Majkł Hłos, syn namieśnika dyrektara CRU Džulian Hłos, zahinuŭ na vajnie va Ukrainie. Jon vajavaŭ na baku Rasii.
21-hadovy Hłos na radzimie byŭ ekaaktyvistam, zmahaŭsia za klimat i pravy žančyn. U 2023 hodzie jon kinuŭ kaledž i nakiravaŭsia ŭ padarožža pa śviecie, jakoje skončyłasia tym, što jon padpisaŭ kantrakt ź Ministerstvam abarony Rasii i zahinuŭ na froncie, piša Astra sa spasyłkaj na «Važnyja historyi».
Hłos naradziŭsia ŭ 2002 hodzie ŭ siamji vajskoŭcaŭ. Maci pracavała ŭ CRU, a baćka byŭ vieteranam fłotu. U kaledžy ŭ Menie jon udzielničaŭ u antyvajennych pratestach i akcyjach suprać zabarony abortaŭ, ale ŭ 2023 hodzie kinuŭ vučobu, vyrašyŭšy «puścić karani ŭ śviecie».
U Italii i Turcyi jon žyŭ z anarchistami Rainbow Family, dapamahaŭ adnaŭlać Chataj paśla ziemlatrusu, nazyvaŭ siabie Chamzoj i zachapiŭsia paleścinskim pytańniem.
Uletku 2023 hoda Hłos atrymaŭ vizu i pryjechaŭ u Rasiju. Jon stvaryŭ akaŭnt u «UKantakcie», dzie padpisaŭcia na hrupy pra Stalina i Lenina, publikavaŭ videa z Pucinym. Jaho pohlady radykalna źmianilisia: jon kazaŭ pra «šmatpalarny śviet» i baraćbu z «zachodniaj hiehiemonijaj», asudžaŭ kapitalizm ZŠA. U vieraśni jon sam pryjšoŭ u vajenkamat u Maskvie, padpisaŭ kantrakt i prajšoŭ padrychtoŭku ŭ padmaskoŭnym centry «Avanhard».
U Razani Hłos słužyŭ u VDV, maryŭ pra rasijskaje hramadzianstva, kab zapuścić ekałahičny prajekt pa ačystcy vady ad mikrapłastyka. Siabry kažuć, jon chacieŭ «być karysnym» Rasii, ale nie płanavaŭ brać u ruki zbroju. Sasłužyviec z 137-ha pałka PDV uspaminaŭ, što Hłos pisaŭ listy ŭ instytut ź idejami vynachodnictvaŭ. Na front jaho adpravili ŭ šturmavy atrad, dzie jon zahinuŭ u Danieckaj vobłaści.
Siamja daviedałasia pra śmierć ad rasijskich uład za dva miesiacy da pachavańnia ŭ ZŠA 21 śniežnia 2024 hoda. Siabry z Rainbow Family šakavanyja: adny ličać, što Hłos «padpaŭ pad prapahandu», inšyja pavažajuć jaho vybar, uspaminajučy jaho dabryniu i mary vyratavać płanietu. Dakładnyja abstaviny hibieli nieviadomyja, a niekrałoh siamji zamoŭčvaje pra słužbu ŭ rasijskaj armii.
Ciapier čytajuć
KDB aryštavaŭ padazronaha aktyvista Paŭła Bialucina. U jakoj krainie heta adbyłosia, nieviadoma8
Kamientary