Paśla ŭdaru pa Sumach 13-hadovy chłopiec vybraŭsia z pałajučaha aŭtobusa i dapamoh ratavać inšych
Kirył atrymaŭ ranieńni — try askołki trapili ŭ hałavu.
U Sumach 13-hadovy Kirył Iljašenka vybraŭsia z pałajučaha aŭtobusa paśla rasijskaha rakietnaha ŭdaru i dapamoh inšym uratavacca, piša «Ukrainskaja praŭda».
Paśla varožaha ŭdaru ranicaj 13 krasavika ŭ Sumach zahareŭsia aŭtobus. Unutry byŭ i 13-hadovy Kirył Iljašenka z maci. Dźviery byli zabłakavanyja.
Chłopiec praz raźbitaje akno vybraŭsia z achoplenaha ahniom transpartu i dapamoh uratavacca inšym pasažyram, jakija jašče byli žyvyja.
Jak raspavioŭ v.a. haradskoha hałavy Sumaŭ Arciom Kabzar, Kirył atrymaŭ ranieńni — try askołki trapili ŭ hałavu. Adzin ź ich miedykam užo ŭdałosia dastać. Zaraz chłopiec znachodzicca pad nahladam lekaraŭ.
Jak raspaviała maci chłopčyka Maryna, Kiryła jašče buduć abśledavać miedyki. U žančyny tvar pasiečany škłom, pahrozy zdaroŭju niama, jaje adpuścili dadomu.
Kirył vučycca ŭ 8 kłasie Sumskaj škoły №4, a taksama jon vychavaniec DIUSŠ «Fakieł», dzie zajmajecca volnaj baraćboj.
U vyniku ataki bolšaść pasažyraŭ aŭtobusa i vadziciel zahinuli. Jak paviedamlaje Sumskaja SŠ №4, kali adbyŭsia vybuch, dźviery aŭtobusa byli zabłakavanyja. Šmat ludziej zahinuła i atrymała ranieńni adrazu.
Kirył, niahledziačy na askołkavyja ranieńni hałavy, svaim udaram raźbiŭ škło, vyskačyŭ i razbłakavaŭ uvachodnyja dźviery, uratavaŭšy ludziej, što znachodzilisia pobač.
Učora ranicaju 13 krasavika rasijanie nanieśli dva balistyčnyja ŭdary pa centry Sum.
Viadoma pra 34 zahinułych, siarod jakich dvoje dziaciej, paciarpieła 117 čałaviek, ź jakich 15 — dzieci.
Ciapier čytajuć
Chto taja Alina, ź jakoj Łukašenka tancavaŭ hetym razam na navahodnim bali18
Kamientary