Alaksandr Kabanaŭ patłumačyŭ, čamu bolš nie kamunikuje z byłym kalehaj Siarhiejem Piatruchinym
U aŭtaraŭ kanała «Narodny reparcior» razyšlisia ŭjaŭleńni ab tym, čym varta zajmacca ŭ emihracyi, raskazaŭ Kabanaŭ.
Alaksandr Kabanaŭ: Ź Siarhiejem my nie kamunikujem. Prajekt [«Narodny reparcior»] asabista dla mianie zakryty. Mnie było dosyć ciažka apošnim časam pracavać pa hetaj temie pa adnoj prostaj pryčynie: kanał praduhledžvaŭ aśviatleńnie sacyjalnych prablem unutry krainy, a ja nie tam.
Byŭ taki błohier Vasil Ciełahrejkin, jaki, na žal, pamior ad raku. My ź im źviazalisia, kali ja vyjechaŭ ź Biełarusi, i ja tady spytaŭ, čamu jon ničoha nie robić na svaim kanale. Jon mnie tady takuju frazu skazaŭ, jakaja prymusiła zadumacca: «Pasłuchaj, kab vieści taki kanał, jak u mianie i ŭ ciabie, treba znachodzicca ŭ Biełarusi». U mianie było nierazumieńnie, kudy ruchacca dalej, bo źmianić usie naratyvy i kantent vielmi składana. Usio zajšło ŭ peŭny tvorčy tupik. Dla mianie kanał staŭ maralnaj abuzaj.
Kantent musić niešta źmianiać — i kali my rabili jaho ŭ Biełarusi, pieramieny nastupali praktyčna zaŭsiody. Na luby materyjał była reakcyja čynoŭnikaŭ, išoŭ varušniak, pravierki, sustrečy ź ludźmi. Zaŭsiody była zvarotnaja reakcyja (nie zaŭsiody pazityŭnaja, ale jana była). Za miažoj hety ŭpłyŭ na pracesy absalutna nie adčuvaŭsia, i heta mocna cisnuła: a ci treba ŭvohule kamu toje, što ja rablu?
My nie padpisvali ź Siarhiejem kantrakt, što musim razam pracavać viečna. U nas razyšlisia mierkavańni ŭ tym, čym treba ciapier zajmacca. Ja skazaŭ, što dla mianie błoh u siońniašnim varyjancie — fihnia, jon skazaŭ, što budzie zajmacca im sam. Voś i ŭsio.
«NN»: Vam nie kryŭdna, što vaš ahulny brend adyšoŭ Siarhieju i kantent ciapier zusim inšy?
AK: Ščyra kažučy, ja nie hladžu ciapier kanał, tamu ničoha nie mahu skazać z hetaj nahody.
Nakont kryŭdy — niama takoha. Heta, umoŭna, jak žurnalist pryjšoŭ u niejkuju redakcyju i syšoŭ praź niejki čas, bo jamu stała niecikava. U nas byŭ sumiesny prajekt, u kožnaha była ŭ im svaja rola. Kali ŭ adnaho hetaja rola skončyłasia, jaki sens trymacca za prajekt?
«NN»: Raniej vy kazali, što jakraz syšlisia na tym, što vy roznyja. A tut, atrymlivajecca, pa hetych ža pryčynach raźbiehlisia?
AK: Nasłaiłasia emihracyja, tvorčy kryzis. Rozny emacyjny stan, roznaje ŭsprymańnie infarmacyi, vysnovy roznyja. Kali takoje zdarajecca ŭ vialikim kalektyvie, to možna siarod supraćlehłych mierkavańniaŭ znajści niešta siaredniaje. Kali ž kalektyŭ tolki z dvuch čałaviek, składaniej danieści svaju racyju. Dy i navošta vydatkoŭvać na heta čas?
«NN»: Zdavałasia, što, pieražyŭšy stolki razam, vy stali zusim nie raźli vada.
AK: Tak zdarajecca ŭ žyćci, što ludzi razychodziacca. Kožny pajšoŭ svajoj darohaj — heta absalutna narmalnaja situacyja.
Da svaich aryštaŭ u 2020 hodzie Kabanaŭ i Piatruchin razam zajmalisia stvareńniem videa dla kanała «Narodny reparcior». U śniežni 2022 hoda jany vyjšli na volu, ale byłuju supracu nie adnavili.
Alaksandr Kabanaŭ staŭ členam Kaardynacyjnaj rady i pres-sakratarom «Biełpoła», a Siarhiej Piatruchin praciahnuŭ błohierskuju dziejnaść i taksama ŭvajšoŭ u skład KR.
Ciapier čytajuć
Zialenski ŭ Vilni: Pakul špic Łukašenki maje bolš pravoŭ, čym narod Biełarusi1
Kamientary