Novaja apieracyja handlovaj vajny: Donald Tramp uvodzić 25-pracentnyja pošliny na impart aŭtamabilaŭ

Prezident ZŠA Donald Tramp u sieradu zrabiŭ čarhovy krok u handlovaj vajnie z usim śvietam: jon abviaściŭ, što ŭvodzić pošliny ŭ pamiery 25% na ŭvieś impart aŭtamabilaŭ i kamplektujučych, piša Bi-bi-si.

Pavodle słoŭ Trampa, zhodna z padpisanym im ukazam, novyja pošliny na aŭtamabili ŭstupiać u siłu ŭ nastupnuju sieradu, 2 krasavika, a spahaniać ich pačnuć z nastupnaha dnia. Pošliny na kamplektujučyja jon abiacaje ŭvieści z traŭnia abo paźniej.

Tramp zajaŭlaje, što ŭviadzieńnie pošlin pryviadzie da «hrandyjoznaha rostu» amierykanskaj aŭtamabilnaj pramysłovaści, padšturchnie inviestycyi ŭ jaje i dapamoža stvaryć novyja pracoŭnyja miescy. Adnak mnohija analityki ličać, što hety krok moža pryvieści da spynieńnia častki aŭtamabilnaj vytvorčaści ŭ ZŠA, rostu cen i paharšeńnia adnosin z sajuźnikami Złučanych Štataŭ.

U minułym hodzie ZŠA impartavali vosiem miljonaŭ mašyn na sumu 240 miljardaŭ dalaraŭ, što składaje prykładna pałovu vyručki ad usich pradadzienych u krainie aŭtamabilaŭ.

Asnoŭnym pastaŭščykom aŭtamabilaŭ u ZŠA źjaŭlajecca Mieksika, za joj iduć Paŭdniovaja Kareja, Japonija, Kanada i Hiermanija. Šmat jakija amierykanskija aŭtamabilnyja kampanii, skarystaŭšysia pieravahami zony svabodnaha handlu, daŭno stvoranaj pamiž ZŠA, Kanadaju i Mieksikaj, raźmiaścili vytvorčaść u hetych dźviuch susiednich krainach.

Aŭtamabili ŭ samich ZŠA časta źbirajuć ź impartavanych kamplektujučych — i jany taksama, zhodna z płanami Trampa, trapiać pad pošliny.

Praŭda, jak tłumačyć Bieły dom, dla kamplektujučych ź Mieksiki i Kanady budzie zroblena časovaje vyklučeńnie — da taho času, pakul amierykanskija mytniki i pamiežniki nie naładziać sistemu kantrolu i zboru pošlin.

Miažu ZŠA z Kanadaj i Mieksikaj štodnia pierasiakajuć hruzy na miljardy dołaraŭ.

Akcyi amierykanskaj aŭtamabilnaj kampanii General Motors u sieradu, paśla zajavy Trampa, upali prykładna na 3%. Akcyi inšych kampanij, u tym liku Ford, taksama patańnieli.

Na adkryćci tarhoŭ ranicaj u čaćvier u Tokia akcyi japonskich aŭtamabilnych kampanij — Toyota, Nissan, Honda — taksama ŭpali.

Na pytańnie žurnalistaŭ, ci jość vierahodnaść taho, što jon admienić svajo rašeńnie, Tramp zapeŭniŭ, što takoj niama.

«Kali ty robiš aŭtamabil u ZŠA, to myty ciabie nie tyčacca», — skazaŭ Tramp.

Impartnyja pošliny (pa-anhlijsku ich nazyvajuć «tariffs») — heta padatak, jaki źbirajuć ułady, a płacić impartujučaja kampanija, to bok kampanija, jakaja pracuje ŭ toj krainie, što ŭviała pošliny.

Donald Tramp uvodzić — abo pahražaje ŭvieści — pošliny na mnostva tavaraŭ, što ŭvoziacca ŭ ZŠA, spadziejučysia takim čynam abaranić amierykanskich vytvorcaŭ i padšturchnuć vytvorčaść u samich Złučanych Štatach.

Adnak, dapamahajučy peŭnaj častcy miascovych vytvorcaŭ, pošliny adnačasova pavialičać vydatki tych amierykanskich firmaŭ, u tym liku aŭtavytvorcaŭ, što zaležać ad pastavak kamplektujučych z-za miažy.

• 1
• 0
• 3
• 7
• 0
• 0
• 0
• 0