«Jon u siejfie ŭ biaśpiecy». Ci ŭdałosia za hod pradać skandalny hadzińnik Franaka Viačorki?
Letaś žurnalisty źviarnuli ŭvahu na darahi hadzińnik Franaka Viačorki. Paśla rozhałasu hałoŭny daradca Śviatłany Cichanoŭskaj vyrašyŭ addać aksiesuar na dabračynnaść, pradaŭšy jaho na aŭkcyjonie. Ciapier «Biełsat» pacikaviŭsia, ci była ŭžo hetaja zaduma realizavanaja.
«Mnie jaho padaryŭ čałaviek, jaki vielmi šmat spryčyniŭsia da biełaruskaj spravy, zajmaŭsia i da 2020 hoda, i paśla 2020-ha adradžeńniem biełaruskich miaścinaŭ. Mnohija jaho viedajuć taksama. Nu jon, pabačyŭšy, napeŭna, što ŭ mianie niama hadzińnika, prosta źniaŭ svoj z ruki i skazaŭ: voś tabie, kab chutčej viarnucca ŭ Biełaruś», — raskazaŭ Franak Viačorka «Biełsatu» letaś u sakaviku.
Košt hadzińnika Omega, pra jaki išła havorka, moža dasiahać 9200 dalaraŭ. Paśla rozhałasu Viačorka prapanavaŭ addać jaho na aŭkcyjon «na patreby vajaroŭ ci palitviaźniaŭ».
Letaś u žniŭni hałoŭny daradca Śviatłany Cichanoŭskaj paviedamiŭ, što «hadzińnik pajšoŭ na dabračynnuju inicyjatyvu, budzie marafon salidarnaści, i tam buduć adbyvacca aŭkcyjony ŭ padtrymku palityčnych viaźniaŭ u Biełarusi, i, dumaju, tam budzie razyhrany hadzińnik».
Druhi marafon salidarnaści mieŭsia adbycca ŭ kastryčniku, adnak jaho adkłali na niavyznačany termin. Takim čynam, i hadzińnik Viačorki nie pajšoŭ z małatka.
«Ja nie zajmajusia hetym. Ja jaho pieradaŭ daŭnym-daŭno. Hadzińnik u biaśpiecy, lažyć u siejfie ź inšymi łotami. Čakaje na aŭkcyjon», — skazaŭ «Biełsatu» Franak Viačorka.
Dzie toj siejf i chto maje da jaho dostup, jon udakładniać nie staŭ.
Aktyvistka Nasta Bazar, jakaja zajmałasia arhanizacyjaj marafonu, što nie adbyŭsia letaś, udakładniła dla «Biełsata», što «z Franakam była vusnaja zhoda, što, kali budzie marafon z aŭkcyjonam, jon vystavić svoj hadzińnik»:
«Hetaha hadzińnika ja nikoli nie trymała ŭ rukach. Nivodnuju reč dla aŭkcyjonu my nie płanavali fizična mieć. Ideja była ŭ tym, kab ludzi sami vystaŭlali i pieradavali pakupnikam».
Kolišniaja pradstaŭnica Abjadnanaha pierachodnaha kabinietu ŭ sacyjalnaj palitycy Volha Harbunova, adkaznaja na toj pasadzie za marafon salidarnaści, zapeŭniła karespandenta «Biełsatu», što pieradavańnie łotaŭ arhanizataram akcyi navat nie abmiarkoŭvałasia:
«Pavodle našych damoŭlenaściaŭ, asoby, jakija padtrymali marafon aŭkcyjonam, musili sami heta arhanizavać u svaich akaŭntach u sacsietkach. Takaja damoŭlenaść była i z Franakam. Škada, što ničoha nie atrymałasia zrabić».
Viačorka na heta adkazaŭ, što «aŭkcyjonami nie zajmajecca»:
«Ja aŭkcyjonami nie zajmajusia. Ja addaŭ na marafon, chaj robiać što paličać patrebnym. Hadzińnik čakaje aŭkcyjonu ci marafonu. Kali niejkaja inicyjatyva hatovaja arhanizavać taki aŭkcyjon na padtrymku palitviaźniaŭ, ja tolki padtrymaju».
Daradca Cichanoŭskaj zapeŭniŭ, što dla dabračynnaha aŭkcyjonu padrychtavali nie tolki jahony chranohraf.
«Ludzi z Ofisa i Kabinieta sabrali rečy dla marafonu, ale marafon i aŭkcyjon pakul tak i nie adbyŭsia. Tamu rečy lažać i čakajuć momantu», — padsumavaŭ Franak Viačorka.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2828
Kamientary
[Zredahavana]