Cichanoŭskaja: 287 dziaržaŭnych pradpryjemstvaŭ vyrablajuć zbroju dla Rasii
Padčas vizitu ŭ Strasburh Śviatłana Cichanoŭskaja vystupiła pierad Kamitetam ministraŭ Rady Jeŭropy. Udzieł u hetaj sustrečy ŭziali ambasadary i dypłamaty 46 krainaŭ śvietu, paviedamlaje pres-słužba biełaruskaj demakratyčnaj lidarki.
U svajoj pramovie Cichanoŭskaja zakranuła klučavyja pytańni biaśpieki ŭ rehijonie i pahrozu rasijskaha kantrolu nad Biełaruśsiu. Jana padkreśliła, što našaja kraina pieratvaryłasia ŭ vajenny płacdarm dla Rasii, dzie režym padtrymlivaje vytvorčaść zbroi i rychtujecca da novych sumiesnych vajskovych vučeńniaŭ.
«Niadaŭna Łukašenka i Pucin padpisali novaje pahadnieńnie ab tak zvanych «harantyjach biaśpieki», jakoje tolki zamacoŭvaje rasijski kantrol nad Biełaruśsiu. Nieŭzabavie jany płanujuć vajskovyja vučeńni «Zachad 2025» — anałahičnyja tym, što pravodzilisia ŭ 2022 hodzie, pierad poŭnamaštabnym uvarvańniem.
Ja nie vieru, što biełaruskija vojski buduć udzielničać u vajnie, bo ŭ hramadstvie isnuje antyvajenny kansensus. Ale my nie možam vyklučać, što Biełaruś znoŭ budzie vykarystanaja dla ahresii.
Biełaruś stała nie prosta startavaj placoŭkaj, a vajennym cecham dla rasijskaj vajennaj mašyny. 287 dziaržaŭnych pradpryjemstvaŭ vyrablajuć zbroju dla Rasii», — skazała Śviatłana Cichanoŭskaja.
Jana źviarnuła ŭvahu na toje, što padčas abmierkavańnia mahčymaści mirnych pieramovaŭ, jość zaściaroha, što Biełaruś stanie «suciašalnym pryzam» dla Pucina, što nielha dapuścić.
«My pavinny patrabavać vyvadu rasijskich vojskaŭ nie tolki z Ukrainy, ale i ź Biełarusi, uklučajučy jadziernuju zbroju. Tolki heta moža harantavać stabilny i praciahły mir u rehijonie. Ukraina zasłuhoŭvaje realnych harantyjaŭ biaśpieki, i adnoj ź ich moža być volnaja Biełaruś, biez rasijskaj prysutnaści», — skazała demakratyčnaja lidarka.
«Hłavnoje»: chto staić za najbolšaj sietkaj rehijanalnych telehram-kanałaŭ Biełarusi. Jaje ślady viaduć u Rasiju4
Kamientary
Zamiežnyja rynki, heta toļki dadatkovy kapital u skarbonku režymu, heta nie supraca, i jany nikoli nie razhliadalisia režymam, jak supraca.