Kiraŭnik vajskovaha ŭrada Mjanmy Min Aun Chłajn moh abmiarkoŭvać u Minsku pastaŭki zbroi, piša «Radyjo Svaboda» sa spasyłkaj na mjanmanskuju presu.
Padčas vizitu Min Aun Chłajn pravioŭ sustrečy z aficyjnymi asobami Biełarusi i ŭziaŭ udzieł u biznes-forumie, jaki prajšoŭ u minskim «Prezident-hateli», paviedamiła vydańnie Mizzima News Media, zasnavanaje ŭ 1998 hodzie ŭ Indyi vieteranami demakratyčnaha paŭstańnia ŭ Mjanmie ŭ 1988 hodzie.
«Padčas vizitu Min Aun Chłajn abmierkavaŭ pytańni ekanamičnaha i handlovaha supracoŭnictva i biaśpieki, uklučajučy pastaŭki zbroi», — adznačajecca ŭ materyjale vydańnia.
Žurnalisty nahadali, što ŭ spravazdačy prademakratyčnaha ruchu Justice for Myanmar za 2022 hod Biełaruś była adznačana jak adna z krain, što pastaŭlaje zbroju vajskovamu režymu Mjanmy.
U vydańni nahadali, što Biełaruś u 2021 hodzie vystupiła suprać rezalucyi AAN, u jakoj asudžali vajskovy pieravarot. U vieraśni 2023 hoda Mjanma akredytavała ŭ Biełarusi svajho vajskovaha ataše.
7 sakavika kiraŭnik vajskovaha ŭrada Mjanmy Min Aun Chłajn, jaki pryjechaŭ u Minsk adrazu paśla pieramoŭ u Maskvie z prezidentam Rasii Uładzimiram Pucinym, sustreŭsia z Alaksandram Łukašenkam.
Min Aun Chłajn uznačaliŭ vajskovy ŭrad Mjanmy ŭ vyniku pieravarotu ŭ žniŭni 2021 hoda. Da hetaha jon kamandavaŭ Uzbrojenymi siłami krainy. Mižnarodny kryminalny sud vydaŭ order na jahony aryšt.
Kamientary