Vałensa i lidary «Salidarnaści» źviarnulisia da Trampa: Vy pavodzili siabie ź Zialenskim jak u kamunistyčnym sudzie

Pad listom padpisalisia 40 čałaviek. Siarod ich — palitźniavolenyja časoŭ PNR i aktyvisty «Salidarnaści», u tym liku Lech Vałensa i Branisłaŭ Kamaroŭski.

Aŭtary tekstu ličać abraźlivym, što Tramp čakaje pavahi i padziaki ad Ukrainy, sałdaty jakoj «pralivajuć kroŭ u abaronu kaštoŭnaściaŭ volnaha śvietu».

Vydańnie Onet apublikavała list da Trampa całkam:

«Pavažany spadar prezident,

Na vašu razmovu z prezidentam Ukrainy Uładzimiram Zialenskim my hladzieli z žacham i ahidaj. Vašy čakańni ŭ dačynieńni da vykazvańnia pavahi i padziaki za materyjalnuju dapamohu, akazanuju Złučanymi Štatami vajujučaj z Rasijaj Ukrainie, my ličym abraźlivymi.

Padziaka dastajecca hieraičnym ukrainskim sałdatam, jakija pralivajuć kroŭ u abaronu kaštoŭnaściaŭ volnaha śvietu. Mienavita jany ŭžo bolš za 11 hadoŭ hinuć na froncie ŭ imia hetych kaštoŭnaściaŭ i niezaležnaści svajoj radzimy, zachoplenaj pucinskaj Rasijaj.

My nie razumiejem, jak lidar dziaržavy, jakaja źjaŭlajecca simvałam svabodnaha śvietu, moža nie bačyć hetaha.

Naš žach taksama vyklikaŭ toj fakt, što atmaśfiera ŭ Avalnym kabiniecie padčas hetaj razmovy nahadvała nam tuju, jakuju my dobra pamiatajem z słuchańniaŭ Słužby biaśpieki i z zały sudovych pasiadžeńniaŭ u kamunistyčnych sudach.

Prakurory i sudździ pa daručeńni ŭsiomahutnaj kamunistyčnaj palityčnaj palicyi taksama tłumačyli nam, što ŭ ich u rukach usie karty, a ŭ nas niama. Jany patrabavali, kab my spynili svaju dziejnaść, śćviardžajučy, što tysiačy niavinnych ludziej pakutujuć z-za nas. Jany pazbavili nas svabody i hramadzianskich pravoŭ, tamu što my nie zhadžalisia supracoŭničać z uładaj i nie prajaŭlali da jaje padziaki. My ŭ šoku ad taho, što vy hetak ža stavilisia da prezidenta Uładzimira Zialenskaha.

Historyja XX stahodździa pakazvaje, što kožny raz, kali Złučanyja Štaty chacieli dystancyjanavacca ad demakratyčnych kaštoŭnaściaŭ i svaich jeŭrapiejskich sajuźnikaŭ, heta zaviaršałasia pahrozaj dla ich samich.

Heta zrazumieŭ prezident Vudra Vilsan, jaki pryniaŭ rašeńnie ab ustupleńni Złučanych Štataŭ u Pieršuju suśvietnuju vajnu ŭ 1917 hodzie. Heta zrazumieŭ prezident Franklin Dełana Ruźvielt, vyrašyŭšy paśla napadu na Perł-Charbar u śniežni 1941 hoda, što vajna ŭ abaronu Amieryki budzie vieścisia nie tolki ŭ Cichim akijanie, ale i ŭ Jeŭropie, u sajuzie z atakavanymi Trecim rejcham dziaržavami.

My pamiatajem, što biez prezidenta Ronalda Rejhana i amierykanskaha finansavaha ŭdziełu nie ŭdałosia b pryvieści da raspadu impieryju Savieckaha Sajuza. Prezident Rejhan viedaŭ, što ŭ savieckaj Rasii i krainach, zavajavanych joju, pakutujuć miljony źniavolenych ludziej, u tym liku tysiačy palitviaźniaŭ, jakija za svaju achviaru, adstojvajučy demakratyčnyja kaštoŭnaści, płacili svabodaj.

Jaho vielič zaklučałasia ŭ tym, što jon biez vahańniaŭ nazvaŭ SSSR «impieryjaj zła» i daŭ jamu rašučuju baraćbu. My pieramahli, i pomnik prezidentu Ronaldu Rejhanu staić siońnia ŭ Varšavie kala ambasady ZŠA.

Spadar prezident, materyjalnaja dapamoha — vajennaja i finansavaja — nie moža być ekvivalentam kryvi, pralitaj u imia niezaležnaści i svabody Ukrainy, Jeŭropy, a taksama ŭsiaho volnaha śvietu.

Čałaviečaje žyćcio biascennaje, niemahčyma vymierać jaho kaštoŭnaść hrašyma. Padziaka naležyć tym, chto prynosić achviaru kryvi i svabody. Dla nas, ludziej «Salidarnaści», byłych palitviaźniaŭ kamunistyčnaha režymu, jaki słužyŭ Savieckaj Rasii, heta vidavočna.

My zaklikajem ZŠA vykanać harantyi, jakija jany dali razam ź Vialikabrytanijaj u Budapiešckim miemarandumie 1994 hoda, u jakim prama prapisana abaviazacielstva abaraniać niedatykalnaść miež Ukrainy ŭ abmien na pradastaŭleńnie joju svaich zapasaŭ jadziernaj zbroi. Hetyja harantyi biezumoŭnyja: tam niama ni słova pra toje, kab razhladać takuju dapamohu jak ekanamičny abmien».

Padčas sustrečy ŭ Avalnym kabiniecie 28 lutaha Zialenski, Tramp i Vens pasvarylisia ŭ žyvym efiry. Čakałasia, što ciaham taho dnia budzie padpisana damova ab vykapniach, ale Zialenski zaŭčasna źjechaŭ ź Biełaha doma.

• 41
• 1
• 0
• 0
• 0
• 0
• 0
• 5