Apple moža zdać pryvatnyja danyja ŭsich svaich karystalnikaŭ u śviecie śpiecsłužbam Vialikabrytanii. Heta moža stać niebiaśpiečnym precedentam
Brytanskija ŭłady tajemna zapatrabavali ad kampanii Apple dać dostup da zašyfravanych reziervovych kopij iCloud usich jaje karystalnikaŭ u śviecie, što moža pastavić pad pahrozu ŭsiu ich kanfidencyjalnuju infarmacyju. Prykładam Brytanii mohuć skarystacca inšyja krainy.
Pavodle krynic vydańnia The Washington Post, urad Vialikabrytanii jašče ŭ śniežni 2024 hoda vydaŭ kampanii Apple tak zvany technical capability notice — techničnaje paviedamleńnie ab nieabchodnaści zabiaśpiečyć dostup da pryvatnych danych. Patrabavańnie nie abmiažoŭvajecca kankretnymi karystalnikami, a achoplivaje ŭsie zašyfravanyja fajły, zahružanyja na iCloud z usiaho śvietu ź lubych pryład Apple.
Sama kampanija Apple u vypadku padparadkavańnia nie zmoža papiaredžvać karystalnikaŭ pra parušeńnie biaśpieki ich danych. Pry hetym padača apielacyi suprać patrabavańniaŭ brytanskich uładaŭ, pavodle miascovaha zakanadaŭstva, nie spyniaje vykanańnie zahadu.
Samy lepšy z vychadaŭ abaranicca — heta funkcyja Advanced Data Protection, jakuju kampanija ŭviała ŭ 2022 hodzie dla iCloud. Jana daje kančatkovaje šyfravańnie (end-to-end encryption) reziervovych kopij danych karystalnikaŭ, što aznačaje, što navat sama Apple nie zmoža atrymać da ich dostup. Adnak funkcyja niedastupnaja pa zmoŭčańni — jaje treba ŭručnuju ŭklučać u naładach iCloud.
Dla paraŭnańnia, Google prapanuje anałahičnaje kančatkovaje šyfravańnie reziervovych kopij Android pa zmoŭčańni z 2018 hoda, a WhatsApp ad Meta taksama daje karystalnikam mahčymaść zachoŭvać zašyfravanyja reziervovyja kopii.
Čytajcie taksama: Jak nadziejna vyčyścić foty z vašych smartfonaŭ — padrabiazny hajd
Prablema z dostupam uradaŭ da zašyfravanych danych nie novaja. Brytanskija ŭłady ŭžo nieadnarazova vystupali suprać šyfravańnia, śćviardžajučy, što jano dapamahaje terarystam i złačyncam chavacca ad pravaachoŭnikaŭ.
Pry hetym u śniežni 2024 hoda amierykanskija śpiecsłužby, u tym liku ANB i FBR, naadvarot, dałučylisia da rekamiendacyj pa maksimalnym vykarystańni kančatkovaha šyfravańnia dla abarony ad kibierpahroz, u pieršuju čarhu z boku Kitaja.
Kali Apple vykanaje patrabavańni Vialikabrytanii, heta moža stvaryć precedent: inšyja ŭrady, uklučajučy ZŠA, Kitaj, Rasiju, taksama mohuć zapatrabavać sabie taki ž dostup. Heta pastavić pad pahrozu biaśpieku danych karystalnikaŭ pa ŭsim śviecie.
Raskazvajem, jak abaranicca ad Pegasus i inšych virusaŭ, jakija mohuć rassyłać śpiecsłužby
Raskryli miechanizm, jaki ŭžyvajuć śpiecsłužby roznych krain dla sačeńnia za karystalnikami. Raskazvajem, što za jon
«Zabudźciesia pra OSINT». Novaja niejrasietka łakalizuje čałavieka ci jaho dom pa fota znutry kvatery za siekundy
Kamientary