Pieravydali znakamityja ŭspaminy Łarysy Hienijuš pad novaj nazvaj
Fond «Kamunikat» pieravydaŭ znakamityja ŭspaminy Łarysy Hienijuš. U Biełarusi jany vychodzili pad nazvaj «Spoviedź». Zaraz jany vychodziać u Biełastoku pad nazvaj «Ptuški biez hniozdaŭ».
«Łarysa Antonaŭna Hienijuš (1910—1983) vydatnaja paetka z samabytnym hołasam. Jana prajšła žudasnyja etapy, stalinskija łahiery śmierci. Tvor — ščyry apovied niazłomnaha, darešty addanaha Baćkaŭščynie čałavieka, biaskonca ŭlubionaha ŭ svoj rodny kraj, u ludziej svajej ziamli. Addajučy daninu pamiaci vydatnaj dačcy biełaruskaj ziamli Łarysie Hienijuš, Centr biełaruskaj kultury ŭ Biełastoku i Fond Kamunikat.org vydajuć jaje ŭspaminy «Ptuški biaz hniozdaŭ», — paviedamlaje fond «Kamunikat».
Knihu možna zamović sa źnižkaj užo ciapier na Kamunikat.shop Vysyłka paśla 16 lutaha 2025 h. Kaštuje jana bieź pierasyłki 50 złotych (12 jeŭra).
***
Łarysa Mikłaševič, biełaruskaja paetka rodam z Vaŭkavyščyny, vyjšła zamuž za doktara Janku Hienijuša, jaki vučyŭsia i žyŭ u Prazie. Žyła ŭ Čechasłavakii z 1938 hoda. U žniŭni 1948 hoda ich aryštavali savieckija ŭłady. U lutym 1949 hoda Viarchoŭny sud BSSR pryhavaryŭ Łarysu i Janku Hienijušaŭ da 25 hadoŭ źniavoleńnia ŭ łahierach. U 1956 razam z mužam častkova reabilitavana, termin pakarańnia źmienšany da 8 hadoŭ, jakija ŭžo prajšli z momantu prysudu. Paśla vyzvaleńnia pasialilisia na radzimie muža ŭ Zelvie.
Łarysa Hienijuš pryncypova admaŭlałasia prymać savieckaje hramadzianstva. Dom Hienijušaŭ u Zelvie staŭ pryciahalnym asiarodkam dla tvorčaj moładzi Biełarusi. Niahledziačy na nahlad KDB, tut byvali častymi haściami paety i piśmieńniki, mastaki, navukoŭcy.
Uspaminy «Spoviedź» raskazvajuć pra jaje dziacinstva, vyjezd u Prahu, Druhuju suśvietnuju vajnu, aryšt, dopyty, kancłahier.
«Mis Biełaruś» usio bolš nahadvaje konkurs pryhažości ŭ haremie23
Kamientary