Francuzskaja žurnalistka schłusiła, što žonka Makrona naradziłasia mužčynam. I ciapier paprasiła prytułak u Rasii
Raniej takija fejki byli skiravanyja i suprać inšych viadomych žančyn-palitykaŭ.
U vieraśni 2021 hoda Nataša Rej, jakaja nazyvaje siabie niezaležnaj žurnalistkaj, apublikavała artykuł u francuzskim ultrapravym vydańni «Faits & Documents», jaki ŭtrymlivaŭ śćviardžeńni, što za asobaj pieršaj łedzi Francyi, Bryžyt Makron, na samoj spravie chavajecca jaje brat Žan-Mišel Trańje. Pavodle jaje słoŭ, paśla niejkaj apieracyi pa źmienie połu jon nibyta ŭziaŭ imia Bryžyt.
U hetym «rasśledavańni» Nataša Rej śćviardžała, što adsutnaść publičnaj infarmacyi pra Žana-Mišela Trańje stavić pad sumnieŭ realnaść jaho isnavańnia i vykazvała mierkavańnie, što admova Bryžyt Makron raskryvać bolš infarmacyi pra asabistaje žyćcio možna razhladać jak častku zmovy, nakiravanaj na ŭtojvańnie «praŭdy».
Teoryja nabyła papularnaść paśla vychadu ŭ śniežni 2021 hoda na YouTube čatyrochhadzinnaha videa. U im Nataša Rej abmiarkoŭvała svaje śćviardžeńni z Amandyn Rua, jakaja nazvała siabie «miedyumam». Padčas intervju jany śćviardžali, što Brydžyt nibyta nie źjaŭlajecca maci svaich dziaciej, a taksama raspaŭsiudžvali niepraŭdzivuju infarmacyju pra jaje chirurhičnyja apieracyi i asabistaje žyćcio. Teoryja chutka była padchoplenaja ŭ sacyjalnych sietkach.
U adkaz na hetyja abvinavačvańni Bryžyt Makron i jaje brat Žan-Mišel Trańje padali pazovy suprać Natašy Rej i Amandyn Rua, abvinavačvajučy ich va ŭmiašańni ŭ asabistaje žyćcio i parušeńni asabistych pravoŭ. Paśla hetaha asnoŭnyja publikacyi byli vydalenyja ź internetu.
U vieraśni 2024 hoda paryžski sud pryznaŭ Rej i Rua vinavatymi ŭ paklopie i abaviazaŭ vypłacić 8 000 jeŭra Bryžyt Makron i 5 000 jeŭra jaje bratu Žanu-Mišelu Trańje.
3 lutaha hetaha hoda advakat Natašy Rej, Fransua Danhlean, paviedamiŭ, što jahonaja klijentka źviarnułasia z prośbaj da deputata rasijskaj Dziarždumy Piatra Tałstoha ab nadańni palityčnaha prytułku ŭ Rasii. Prośbu jana abhruntavała pieraśledam u Francyi. Advakat śćviardžaje, što abvinavačvańni suprać Rej falsifikavanyja i ŭklučajuć niepraŭdzivyja pakazańni.
Adznačym, što padobnyja fejki z transfobnym padtekstam nie novyja. Raniej takija niepraŭdzivyja čutki byli nakiravanyja i suprać inšych viadomych žančyn-palitykaŭ, naprykład, suprać byłoj pieršaj łedzi ZŠA Mišel Abamy, byłoj vice-prezidentki ZŠA Kamały Charys i eks-premjerki Novaj Ziełandyi Džasindy Ardern. Ich aktyŭna raspaŭsiudžvaje rasijskaja i łukašenkaŭskaja prapahanda.
Ciapier čytajuć
Žonka adhavorvała padpałkoŭnika DFR brać chabary, a toj kazaŭ «atrymaju pałkoŭnika — i na piensiju»: pieršaja piensija pryjšła ŭžo na aryštancki rachunak6
Žonka adhavorvała padpałkoŭnika DFR brać chabary, a toj kazaŭ «atrymaju pałkoŭnika — i na piensiju»: pieršaja piensija pryjšła ŭžo na aryštancki rachunak
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1414
Kamientary