«U siłu asabistych pryčyn nie moža praciahvać»: pry ćmianych abstavinach źmianiŭsia kiraŭnik u byłym adździaleńni biełaruskaha Ernst&Young
EY (Ernst&Young) — aŭdytarskaja kampanija z «vialikaj čaćviorki». Pracuje ŭ śfiery aŭdytu, padatkaabkładańnia, akazvaje jurydyčnyja pasłuhi dla biznesu. Biez acenki EY u Biełarusi nie mahła prajści nivodnaja surjoznaja ŭhoda pa pakupcy abo źlićci biznesu. EY byŭ adnym z asnoŭnych łakamatyvaŭ i tłumačalnikaŭ u spravie prasoŭvańnia pieradavych finansavych standartaŭ i spravazdačnaści. Šmathadovym kiraŭničym partnioram EY u Biełarusi byŭ Pavieł Łaščanka.
Ź leta 2022-ha biełaruskaje — jak i rasijskaje — adździaleńnie EY farmalna było vyviedziena sa składu mižnarodnaj aŭdytarskaj sietki i pačało dziejničać pad brendam B1. Pavieł Łaščanka zachavaŭ svaju pasadu na novym miescy.
Minułymi dniami supracoŭnikam i partnioram B1 u Biełarusi pryjšoŭ list, u jakim kampanija infarmavała ab źmienie kiraŭničaha partniora. Zamiest Paŭła Łaščanki im staŭ Ivan Stankievič (pracuje ŭ kampanii z 2005 hoda). Tekst lista jość u rasparadžeńni «Našaj Nivy».
Abranyja farmuloŭki prymušajuć zadumacca ab losie samoha Łaščanki, bo ź ich nie vynikaje, što mužčyna adyšoŭ ad spravaŭ dobraachvotna.
«Pavieł Łaščanka ŭ siłu asabistych abstavin bolš nie moža praciahvać rabotu na hetaj pasadzie, — havorycca ŭ liście. — Uniosak Paŭła ŭ raźvićcio našaj kampanii nieacenny: jon stajaŭ la samych vytokaŭ i sfarmavaŭ cudoŭnuju kamandu prafiesijanałaŭ, jakija dasiahnuli niejmaviernych pośpiechaŭ.
My ŭpeŭnieny, što viedy, dośvied i ekśpiertyza Paŭła znojduć svajo adlustravańnie ŭ jahonych siabrach i kalehach, jakija praciahnuć jahonuju spravu i dapamohuć biełaruskaj praktycy pryjści da jašče bolšych dasiahnieńniaŭ».
Ni ŭ liście, ni ŭ raździele «naviny» na sajcie arhanizacyi nie pryvodzicca taksama nijakaj ułasnaj cytaty ci zvarotu Łaščanki z nahody zakančeńnia raboty ŭ kampanii, jakoj jon addaŭ niekalki dziasiatkaŭ hadoŭ žyćcia.
Apošniaja zhadka Łaščanki na sajcie V1 — navina ad 8 kastryčnika 2024 hoda pra toje, jak jon pravioŭ sieminar pa niuansach mižnarodnaj sistemy finansavaj spravazdačnaści dla pradstaŭnikoŭ kamiercyjnych bankaŭ Biełarusi, a taksama Nacbanka, Banka Rasii, niekredytnych finansavych arhanizacyj i IT-kampanij.
U 2020 hodzie, u razhar źbićcia hramadzian milicyjaj, za podpisam Łaščanki vyjšaŭ list da kiraŭnikoŭ siłavych i dziaržaŭnych orhanaŭ, u jakim jon vykazaŭ sumnieŭ u ahučanych Jarmošynaj ličbach, a taksama zaklikaŭ usich adumacca i viarnucca da zakonnaści.
Na sajcie BDU Pavieł Łaščanka zhadvajecca jak znakamity vypusknik.
Ciapier čytajuć
«Vielmi dobra razumieju biełaruskuju movu. Navat nie dumaŭ». Źjaviłasia VIDEA razmovy biełaruskich palitviaźniaŭ ź Zialenskim12
«Vielmi dobra razumieju biełaruskuju movu. Navat nie dumaŭ». Źjaviłasia VIDEA razmovy biełaruskich palitviaźniaŭ ź Zialenskim
Babaryka i Kaleśnikava pahavaryli ź Inhaj Ruhinienie i zaklikali Litvu «dałučycca da dypłamatyčnych namahańniaŭ ZŠA» i «nie prapuścić akno mahčymaściej»3333
Kamientary