Były supracoŭnik Słužby biaśpieki Łukašenki staŭ vykanaŭčym dyrektaram u Biełhazprambanku
U žniŭni 2024 hoda były supracoŭnik Słužby biaśpieki Łukašenki Siarhiej Čepikaŭ zaniaŭ pasadu vykanaŭčaha dyrektara ŭ Biełhazprambanku. Publična pra heta nidzie nie paviedamlałasia, piša «Biuro». Na sajcie Biełhazprambanka niama nijakich zhadak pra novaha vykanaŭčaha dyrektara.
Zhodna z danymi, atrymanymi ad «Kibierpartyzan», Siarhiej Čepikaŭ słužyŭ u Słužbie biaśpieki Łukašenki jak minimum z 2005-ha pa 2021 hod. U lutym 2020 hoda jon atrymaŭ uznaharodu «Za volu da pieramohi» ŭ mižviedamasnym turniry pa biljardzie za kamandu SBP. A ŭ 2024-m zaniaŭ pasadu ŭ Biełhazprambanku.
Žurnalisty patelefanavali Siarhieju Čepikavu, i jon paćvierdziŭ im svajo pryznačeńnie. Na pytańnie, čamu mienavita jon atrymaŭ dyrektarskuju pasadu ŭ Biełhazprambanku, Čepikaŭ adkazaŭ: «Nu, napeŭna, tamu što varty».
Pavodle słoŭ Čepikava, jon nie pracavaŭ u SBP mienavita «ciełaachoŭnikam Łukašenki». Ale čym mienavita zajmaŭsia ŭ hetaj struktury, raskazać nie zachacieŭ. U Słužbu biaśpieki Łukašenki Čepikaŭ trapiŭ ź biełaruskaha vojska, dzie ŭ tym liku słužyŭ u Kinałahičnym centry. Adna z zadač centra — padrychtoŭka kadraŭ dla achovy raznastajnych asablivych abjektaŭ.
Heta nie pieršaje pryznačeńnie byłych supracoŭnikaŭ Słužby biaśpieki Łukašenki na kiraŭničyja pasady ŭ bankach. Raniej žurnalisty vydańnia «Lusterka» raskazali pra «hałavakružnuju karjeru» hałoŭnaha achoŭnika Łukašenki Alaksieja Laškieviča. Jaho nieadnarazova bačyli ŭ atačeńni Łukašenki, u tym liku padčas mižnarodnych pajezdak.
U lutym 2024 hoda Laškievič zaniaŭ pasadu vykanaŭčaha dyrektara ŭ Biełarusbanku. Pavodle słoŭ krynicy «Lusterka» ŭnutry banka, hetaja pasada była stvoranaja śpiecyjalna pad Laškieviča, raniej vykanaŭčaha dyrektara, jaki kuryruje pytańni biaśpieki, u struktury praŭleńnia banka nie było.
Ciapier čytajuć
Siłaviki zatrymali lidara hurta «Pałac» Aleha Chamienku3
Kamientary