Taćciana Zareckaja bolš nie estonskaja startapierka. Ciapier jana sprabuje stać pasiarednicaj inviestaraŭ u Saudaŭskaj Aravii

Taćciana Zareckaja, byłaja «ministarka finansaŭ» u Abjadnanym pierachodnym kabiniecie, paśla skančeńnia hrantavych tranšaŭ Jeŭrakamisii na LaavaTech — startap svajho muža, u jakim jana była brendfejsam i suzasnavalnicaj, — pamianiała śfieru dziejnaści i rehijon.

Pavialičyć

Čytajcie taksama: Pamiatajecie «paśpiachovuju miljanierku» Zareckuju? Vyhladaje, što jaje kampanija — usio

Ciapier Zareckaja nazyvaje siabie «zacikaŭlenaj u klintechu». Klintech — heta «čystyja technałohii». Heta abstraktnaje paniaćcie, pad jakoje možna padahnać amal što chočacie — ad biznesaŭ pa vyrabie elektramabilaŭ da pierapracoŭki płastyku i raźvićcia vietraparkaŭ. 

Ale čym z hetaha zajmajecca Zareckaja, pakul niajasna. Zusim inačaj možna apisać toj sposab zarabić, jakim Taćciana Zareckaja zaniałasia ŭžo absalutna publična. 

Niekalki dzion tamu ŭ sacyjalnaj sietcy LinkedIn źjaviłasia afiša vebinara, na jakoj dźvie žančyny zaprašali ŭłaśnikaŭ i mieniedžaraŭ startapaŭ, kab «razbłakavać try tryljony dalaraŭ mahčymaściaŭ».

U duecie z Zareckaj vystupała Genia Xasis. Nie bojciesia pamylicca ŭ vymaŭleńni — jaje sapraŭdnaje imia Jaŭhienija Kanavałava, jana rasijanka. I taksama čałaviek z bahataj bijahrafijaj, jakuju składana pravieryć. Pa jaje ŭłasnych słovach, jana dalaravaja miljanierka — svoj pieršy miljon vypadkova zarabiła ŭ pieršy ž dzień paśla prylotu ŭ Dubaj. 

Ale internet viedaje Kanavałavu taksama jak asobu, jakaja napisała niekalki tekstaŭ dla rasijskaha «Forbsa», a taksama jak pradprymalnicu, jakaja sprabavała zajmacca HR-biznesam (padbor piersanała) u Rasii, ale sutyknułasia z abvinavačvańniami ad byłych supracoŭnikaŭ u niežadańni raźličvacca.

Ź niejkaha momantu žančyna stała vystupać pad psieŭdanimam: zamianiła słavianskaje proźvišča na zapaminalnaje Xasis, a imia pierajnačyła na ścipłaje Genia («hienij» pa anhlijsku budzie «genius»).

Abiedźvie žačyny — Xasis i Zareckaja — pradstaŭlajucca ad imia nibyta ŭłasnych vienčurnych inviestycyjnych fondaŭ, ale pry hetym pieradusim šukajuć tych, chto b sam im zapłaciŭ.

«Naša Niva» prasłuchała ich sumiesny strym, metavaj aŭdytoryjaj jakoha byli abaznačany ŭłaśniki i top-mieniedžary maładych technałahičnych kampanij z patrebaj u finansavańni. 

Cikavaja nam Zareckaja ŭ rubrycy pradstaŭleńniaŭ była nazvanaja «čałaviekam z hihanckim vopytam», «pra jakoha jość navat staronka ŭ Vikipiedyi». 

Pieršuju tracinu hadzinnaha videa žančyny pryśviacili daviedkavamu pierakazu infarmacyi pra abjomy vienčurnaha i dziaržaŭnaha finansavańnia, patencyjna dastupnaha technałahičnym kampanijam-rezidentam Saŭdaŭskaj Aravii. 

Kali vieryć namalavanaj śpikierkami karcinie, to saudaŭskija inviestary prahnuć raskidać tryljony dołaraŭ pa ambitnych IT-kampanijach. Pierśpiektyva dakranucca da hetych srodkaŭ realnaja i ŭ słuchačoŭ vebinara. 

«Ale vielmi važna, chto adčyniaje vam dźviery», — udakładniaje Zareckaja. 

Maŭlaŭ, biznes-kultura ŭ Saudaŭskaj Aravii adroźnivajecca ad taho, z čym znajomy jeŭrapiejskija kampanii. Bieź pieravaranych sumiesna dziasiatku abiedaŭ, biez vypitych razam i zahadzia litraŭ kavy składana raźličvać na surjoznuju razmovu ź ludźmi, jakija siadziać na hrošach. 

Sami Xasis i Zareckaja, maŭlaŭ, užo patracili na heta čas, ahledzielisia ŭ rehijonie i śćviardžajuć, što vałodajuć incredible network (niejmaviernaj sietkaj suviaziaŭ — NN) siarod arabskich inviestaraŭ. Jany mohuć «ciopła prezientavać» vašu kampaniju patrebnym ludziam. Kali treba — prakansultavać i pa inšych pytańniach dziejnaści ŭ Saudaŭskaj Aravii. 

U hetym, u ahulnych rysach, i zaklučajecca sens pasłuhi, jakuju jany prapanujuć. U lutym 2025 hoda ŭ Er-Ryjadzie jakraz maje prajści forum Leap dla dydžytał kampanij. I heta dobraja nahoda kab źvieści tych, chto šukaje hrošy, z tymi, u kaho jany jość. 

Za zapłačanyja Zareckaj i Kanavałavaj $45 tysiač vas u dzień kanfierencyi daviazuć z aeraporta da hatela i padsadziać na samim forumie na vitalny abied ź nienazvanymi inviestarami. 

U załaty pakiet za $55 tysiač uvachodzić usio toje ž samaje, ale ŭ dadatak «adna hadzina stratehičnaj kamunikacyi pra partniorstva ci rełakacyju» z samimi panienkami, a taksama «prynamsi adna piersanalnaja sustreča ź inviestaram, jaki vielmi zacikaŭleny ŭ tym, što vy robicie». Kiroŭca zaviazie vas z hatela da miesca sustrečy i nazad.

Za $110 tysiač, pa VIP taryfie, vam harantavany ŭžo piać sustreč ź nienazvanymi inviestarami, jakija «vielmi zacikaŭlenyja ŭ tym, što vy robicie». Samyja ŭdačlivyja z płacielščykaŭ buduć zaprošany na śpiecyjalny sajd-ivent «z členami karaleŭskaj siamji».

Mahčymaściami žančyn nie ŭdasca skarystacca ŭsim achvotnym: jany «ščaślivyja dapamahčy» tolki abmiežavanaj kolkaści kampanij, a mienavita — maksimum piatnaccaci. Nazvanyja vyšej ceny lhotnyja i buduć padniatyja praz paru dzion.

Strym pahladzieła try sotni čałaviek. Kolki adreahavała — nieviadoma. 

Novy kamunikacyjny startap Zareckaj raźvivajecca va ŭmovach kryzisu vienčurnaha finansavańnia ŭ Jeŭropie.

I chacia arabskija krainy nasamreč šmat inviestujuć u novyja technałohii, ich mieniedžary nie robiać hetaha nieśviadoma ci pa prośbie sabutelnikaŭ. Inviestycyju supravadžaje ŭdumlivaja rabota finansavych i biznes-analitykaŭ. 

Na fonie nadziej ułaśnikaŭ startapaŭ na inšyja, nie zakranutyja vajnoj rynki, u arabskim rehijonie źjaviŭsia novy žanr machlarstva — kali pasiaredniki za hrošy znajomiać naiŭnych startapnikaŭ ź nibyta členami karaleŭskaj siamji ci pradstaŭnikami bujnych inviestfondaŭ. Jakija takimi nie jość, ale hrajuć adpaviednuju rolu. 

Što nasamreč atrymajuć klijenty ad Zareckaj — pakaža čas. 

Čytajcie taksama:

Šakucin zalacieŭ minimum na $40 miljonaŭ

Jak mučyli Cila Švajhiera i centry haradoŭ, kab stvaryć karcinku dla sudzimaha za machlarstva prateže Dźmitryja Baskava

* * * 

Taćciana Zareckaja pradstaŭlałasia dalaravaj miljanierkaj, za košt hetaha trapiła ŭ davier da adkaznych asob u atačeńni Śviatłany Cichanoŭskaj, a praź ich — u skład Abjadnanaha pierachodnaha kabinieta. 

Karjera ŭ ampłua «ministra finansaŭ» ciahnułasia mienš za dva miesiacy i skončyłasia ŭ dzień vychadu rasśledavańnia «Našaj Nivy» pra sapraŭdny stan rečaŭ ź jaje biznesam. 

Zareckaja tady zajaviła pra nibyta pahrozy joj asabista i jaje nibyta isnujučym supracoŭnikam i biznes-partnioram, i pad hetaj nahodaj zvolniłasia z pasady. 

U realnaści ž kampanija muža Zareckaj LaavaTech, jakaja pazicyjanavała siabie vytvorcam razumnych lampaŭ dla raślin, nie zdoleła naradzić kamiercyjnaha praduktu i pryjšła ŭ zaniapad sinchronna sa spynieńniem hrantavych tranšaŭ ad Jeŭrakamisii.

Čytajcie: Paśpiachovaja startapierka ci baranesa Miunchhaŭzien? Jak Taćciana Zareckaja trapiła ŭ Abjadnany kabiniet i čamu jana jaho pakinuła

• 7
• 0
• 63
• 24
• 0
• 1
• 4
• 0