Z-za sankcyj ZŠA drejfujuć u mory jak minimum 65 tankieraŭ z rasijskaj naftaj
Prynamsi 65 tankieraŭ z rasijskaj naftaj drejfujuć kala bierahoŭ Kitaja, Sinhapura i Rasii paśla taho, jak 10 studzienia ZŠA abviaścili pra novy pakiet błakavalnych sankcyj. Pra heta paviedamlaje Reuters sa spasyłkaj na źviestki adsočvańnia sudnaŭ.
Piać tankieraŭ stajać kala bierahoŭ Kitaja, jašče siem — kala Sinhapura, inšyja zatrymalisia ŭ Bałtyjskim mory i na Dalokim Uschodzie, piša ahienctva. U hety lik uvachodziać taksama 25 naftavych tankieraŭ, jakija stajali ŭ roznych miescach, u tym liku ŭ partach Irana i niedaloka ad Sueckaha kanała.
Učora stała viadoma, što ŭ vodach na ŭschod ad uźbiarežža Kitaja drejfujuć try tankiery, jakija pieravoziać bolš za dva miljony barelaŭ rasijskaj nafty. Heta adbyłosia paśla taho, jak kampanija, jakaja kiruje partami pravincyi Šańdun, zabaraniła prymać tankiery, jakija trapili pad sankcyi, paviedamiŭ Bloomberg.
Pavodle źviestak ahienctva, jašče adzin najbujniejšy pakupnik rasijskaj nafty, Indyja, taksama admović u razhruzcy tankieram, jakija trapili pad sankcyi ZŠA. Vyklučeńniem buduć sudny, zafrachtavanyja da 10 studzienia, pry ŭmovie, što jany razhruziacca da 12 sakavika. Akramia taho, indyjskija banki buduć patrabavać siertyfikaty ab pachodžańni nafty, kab harantavać, što jana nie pastupaje ad pastaŭščykoŭ, jakija znachodziacca pad sankcyjami.
10 studzienia Złučanyja Štaty ŭviali błakavalnyja sankcyi suprać dvuch najbujniejšych eksparcioraŭ nafty ŭ Rasii — «Hazpram nafty» i «Surhutnaftahaza». Ź imi, a taksama ź dziesiatkami inšych kampanij ciapier zabaroniena mieć finansavyja adnosiny z vykarystańniem dalara ci amierykanskaj finansavaj sistemy.
Sankcyi taksama raspaŭsiudžanyja na najbujniejšuju rasijskuju sudnachodnuju kampaniju «Saŭkamfłot». Pad abmiežavańni trapili 183 tankiery pad ściahami roznych krain, jakija, jak miarkujecca, pieravoziać rasijskuju naftu i naftapradukty, parušajučy sankcyi zachodnich krain.
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary