«Unutrany analiz» urada ŭtrymlivaje vysnovu, što Kreml moža zaviaršyć vajnu ŭžo ŭ hetym hodzie i ŭžo pasyłaje adpaviednyja sihnały rasijanam i mižnarodnaj supolnaści, piša Bild.
Adna z pryčyn hetaj vysnovy — paharšeńnie ekanamičnaj situacyi ŭ Rasii. Pracentnyja staŭki i ceny na pradukty značna rastuć. Tolki za apošnija piać miesiacaŭ rasijski rubiel straciŭ bolš za 20% u adnosinach da jeŭra. Trochźmiennaja praca VPK užo nie moža schavać kryzis u inšych halinach. Kali ŭ 2024 hodzie ekanamičny rost skłaŭ krychu mienš za 4%, to ŭ 2025 hodzie prahnazujecca rost nie bolš za 1%.
Jašče adna prykmieta — padrychtoŭka Administracyi prezidenta RF da paślavajennaj vybarčaj kampanii (havorka idzie pra parłamienckija vybary 2026 hoda). Pra heta ŭ śniežni paviedamiŭ «Kommiersant».
«AP zychodzić z taho, što kaniec SVA budzie i da jaho treba być hatovym», — cytuje svajo krynicu vydańnie. Budučyja vyniki vajny pavinny ŭsprymacca ŭ hramadstvie jak pieramoha, rastłumačyŭ krynica. Užo viadziecca praca nad «vobrazam pieramohi».
Niamieckija analityki rasceńvajuć takuju publikacyju jak adobranuju Kramlom, a infarmacyju ŭ joj — jak naŭmysna «źlituju». U tym liku adkryta publikujucca pieradvybarčyja mety: Kreml ustanaviŭ metavyja pakazčyki jaŭki i vyniku «Adzinaj Rasii» na ŭzroŭni 55%.
U AP taksama zaniepakojeny viartańniem sałdat, — pra heta taksama paviedamiŭ «Kommiersant». Čynoŭniki płanujuć zajmacca ich pracaŭładkavańniem, materyjalnaj padtrymkaj i farmavać u hramadstvie pavažlivaje staŭleńnie da ich. Pa zadumie, heta pavinna praduchilić udzieł vajennych u «pratesnych ruchach ci złačynnaści».
Jak vyrašalny faktar scenaryja chutkaha zakančeńnia vajny razhladajecca imknieńnie nastupnaha prezidenta ZŠA Donalda Trampa jak maha chutčej pačać pieramovy z Maskvoj i Kijevam paśla inaŭhuracyi 20 studzienia.
Na zapyt Bild Ministerstva zamiežnych spraŭ FRH adkazała, što na dadzieny momant urad zychodzić z taho, što vajna praciahniecca:
«Pucin zaraz nie zacikaŭleny ŭ surjoznych mirnych pieramovach i ŭstojlivym miry. [Rasija] nie adstupaje ad svaich maksimalnych patrabavańniaŭ, takich jak pryznańnie anieksii ŭkrainskaj terytoryi».
Pa źviestkach Bild, u dziaržaŭnym analizie havorka idzie tolki pra mahčymy scenar. Jak zvyčajna, sihnały, jakija pasyłaje Kreml, mohuć aznačać niešta inšaje, procilehłaje ci naohuł ničoha, — reziumuje palityčny ahladalnik Filip Piataŭ.
Kamientary