10 septyljonaŭ hadoŭ za 5 chvilin. Stvorany najmacniejšy kvantavy čyp u śviecie
Novy kvantavy čyp ad kampanii Google pad nazvaj Willow zdoleŭ ździejśnić amal niemahčymaje — za piać chvilin vyrašyć vyličalnuju zadaču, na jakuju jašče ŭčora spatrebiŭsia b čas, ekvivalentny 700 tryljonam uzrostaŭ Suśvietu. Stvareńnie čypa ŭžo nazyvajuć sapraŭdnaj revalucyjaj.
Novaja raspracoŭka ad kampanii Google, kvantavy čyp pad nazvaj Willow, stała sapraŭdnym praryvam u navucy. Pracesar pamieram usiaho čatyry kvadratnyja santymietry zdolny pieratvarać fantastyku ŭ realnaść, piša časopis Nature.
Pa słovach navukoŭcaŭ i kiraŭnictva Google, novy čyp vykarystoŭvaje 105 kubitaŭ (kvantavyja bity ŭžyvajucca ŭ kvantavych kamputarach zamiest ličbavych nuloŭ i adzinak) i ŭžo prajšoŭ paśpiachovyja vyprabavańni.
Piać chvilin spatrebiłasia Willow dla vyrašeńnia hrandyjoznaj vyličalnaj zadačy, ź jakoj najlepšyja supierkampjutary płaniety dali b rady tolki za 10 septyljonaŭ hadoŭ (ličba z 22 nulami), ci 10 kvadryljonaŭ miljardaŭ hadoŭ, što ŭ 700 tryljonaŭ razoŭ pieravyšaje ciapierašni ŭzrost Suśvietu (13,8 miljardaŭ hadoŭ).
Užo praź piać hadoŭ, kali źjavicca bolš stabilnaja i daskanałaja infrastruktura dla kvantavych vyličeńniaŭ, čyp Willow zmoža zapracavać paŭnavartasna i źmianić samo ŭsprymańnie navuki, adznačaje Nature.
Lubyja kvantavyja čypy patrabujuć zvyšnizkich tempieratur, blizkich da absalutnaha nulu (—273,15°C). Heta źviazana ź nieabchodnaściu źnižeńnia ciepłavoha šumu, jaki moža źniščyć kvantavy stan kubitaŭ. Dla hetaha vykarystoŭvajucca kryastaty — pryłady, jakija zabiaśpiečvajuć takija nizkija tempieratury.
Dla pracy kvantavaha čypa taksama nieabchodny składany łabaratorny kompleks, jaki ŭklučaje:
- Stałaje achaładžeńnie.
- Elektronnyja kantrolnyja sistemy (łaziery, mikrachvalevyja impulsy ci mahnitnyja pali).
- Ekranavańnie ad vonkavych pieraškod (kaśmičnyja pramiani, a taksama radyjeaktyŭnaje i ŭltrafijaletavaje vypramieńvańnie).
- Vysokadakładnyja instrumienty dla vymiareńnia i kiravańnia kvantavymi pracesami.
Pa słovach daśledčykaŭ, čyp Willow moža istotna paskoryć raspracoŭku termajadziernych reaktaraŭ i krynic novaj čystaj enierhii, a taksama nieacenna paspryjać raźvićciu štučnaha intelektu i stvareńniu inavacyjnych lekaŭ. Čakajecca, što dziakujučy hetaj technałohii miedycynskija śpiecyjalisty zmohuć sčytvać vyniki MRT-skanavańnia z dakładnaściu da atama, adkryvajučy pry hetym novyja masivy danych pra čałaviečy arhanizm i zachvorvańni.
Adnak u Willow, jak i ŭ inšych kvantavych technałohij, jość i ciomny bok: jany zmohuć lohka i chutka ŭzłamać samyja daskanałyja i najskładaniejšyja sistemy šyfravańnia, jakija abaraniajuć suśvietny internet, mižnarodnuju bankaŭskuju sistemu i krytyčnuju infrastrukturu ŭradaŭ krain, u tym liku źviazanuju ź jadziernaj zbrojaj.
«Ekśpierty pa biaśpiecy hadami pracujuć nad vyrašeńniem hetaj patencyjnaj prablemy, raspracoŭvajučy novyja standarty postkvantavaha šyfravańnia», — adznačaje kiraŭnictva kampanii Google.
Kiraŭnik Lidy zaklikaŭ siłavikoŭ nie spyniać palityčnych represij28
Kamientary