«Nu i kudy mnie, prybiralščycaj?» Maładaja maci nie moža znajści pracu paśla treciaha dekretu
Šmatdzietnaja maci aburajecca, što paŭhoda nie moža znajści pracu paśla treciaha dekretu. «A chto na balničnyja budzie chadzić, vy?» — časta čuje jana na sumoŭjach.
Žančyna zapisała kryk dušy i apublikavała videa ŭ tyktoku.
— Łukašenka što kazaŭ? Bamžoŭ, darmajedaŭ u krainie nie budzie. Akiej. Ja vyjšła z treciaha dekretu paŭhoda tamu i ŭvieś hety čas šukaju pracu. Što mnie kažuć? «U vas troje dziaciej. A chto na balničnyja budzie chadzić, vy?».
Nie padbirajučy vyrazy, błohierka sumna žartuje, što kali dzieci zachvarejuć, to budzie prasić susiedziaŭ ź imi pasiadzieć.
— Nu i kudy mnie ŭładkavacca? Prybiralščycaj? Ja nie razumieju. Ja stolki sumoŭjaŭ abyšła. I va ŭsich adno pytańnie: «A chto ź dziećmi?» Naradžajcie, a potym vas nichto na pracu nie voźmie.
Nasamreč, žančyna ŭźniała prablemnaje pytańnie. Niahledziačy na aficyjnuju rytoryku čynoŭnikaŭ, jakija zaklikajuć žančyn naradžać jak maha bolš dziaciej, šmatdzietnyja maci traplajuć u pastku dekretnych adpačynkaŭ.
Faktyčna žančyna, jakaja vyrašaje naradzić troch dziaciej (jak błohierka), vypadaje z rynku pracy prykładna na 6-9 hadoŭ. U krainie nie raspracavanaja sistema, jakaja b dapamahała maładym maci nie hublać svaju kvalifikacyju.
Raniej ekśpiert ź Biełaruskaha Chielsinskaha kamiteta raskazvaŭ «Našaj Nivie», što žančyny ŭ Biełarusi źjaŭlajucca najbolš sacyjalna ŭraźlivaj hrupaj — paśla dekretnaha adpačynku im ciažka viarnucca da taho ŭzroŭniu zarabotnaj płaty, jaki byŭ raniej.
U bolšaści siemjaŭ adkaznaść za dziaciej (uličvajučy tyja samyja balničnyja) ciahnie na sabie maci. I, na žal, pracadaŭcy majuć racyju, kali chvalujucca, što supracoŭnica ź dziećmi pa abjektyŭnych pryčynach moža časta adsutničać na pracoŭnym miescy. Mužčyny ž u Biełarusi biaruć dekret u 1% vypadkaŭ.
Šmat chto ź biełarusak sprabuje źmirycca ź situacyjaj i šukaje pracu, jakaja nižejšaja za ich kampietencyi (bo spadziajecca, što ŭmoŭnuju prybiralščycu kiraŭnictvu budzie lahčej adpuskać na balničnyja). Abo pačynaje pracavać na pałovu ci čverć staŭki. Što, biezumoŭna, adhukniecca žančynie jašče praz šmat hadoŭ, kali jana vyrašyć aformić piensiju.
Taksama treba pamiatać, što adpačynak pa dohladzie dziciaci ŭvachodzić u ahulny pracoŭny staž, ale nie ŭvachodzić u strachavy staž (dla pryznačeńnia piensii pa ŭzroście na ahulnych padstavach u 2025 hodzie budzie patrabavacca nie mienš za 20 hadoŭ strachavoha stažu).
Dla žančyn, jakija naradzili 4 i bolš dziaciej, praduhledžany panižany strachavy staž.
U Polščy aryštavali byłoha kiraŭnika biełaruskaha «Paspalitaha rušeńnia» — pahražaje 10 hod za narkotyki26
Kamientary