Łukašenka: Usiebiełaruski narodny schod nie pavinien daminavać nad inšymi orhanami ŭłady
Usiebiełaruski narodny schod nikomu nie pavinien pieraškadžać pracavać, nie pavinien daminavać nad inšymi orhanami ŭłady. Pra heta zajaviŭ Alaksandr Łukašenka 19 listapada na pasiadžeńni prezidyuma Usiebiełaruskaha narodnaha schodu, piša BiełTA.
Spačatku Łukašenka raskazaŭ, što jaho tryvožyć u spravie UNS.
«Ja vyrašyŭ pravieści siońnia pasiadžeńnie Prezidyuma ŭ šyrokim składzie, bo nam treba vyrašyć hałoŭnaje pytańnie (moža, navat nie vyrašyć, jano vyrašana ŭ Kanstytucyi): my ŭsie pavinny razumieć, što UNS nikomu nie pavinien pieraškadžać pracavać. UNS nie pavinien daminavać nad inšymi orhanami ŭłady, bo my stvorym sabie prablemy», — padkreśliŭ Alaksandr Łukašenka.
Jon adznačyŭ, što pakul na pasadzie staršyni UNS i kiraŭnika krainy znachodzicca adna asoba, hetaha, naturalna, nie adbudziecca. «Ale potym my možam stvaryć sabie vialikija prablemy», — skazaŭ Łukašenka.
Razam z tym Łukašenka źviarnuŭ uvahu, što ŭ cełym miesca i rola UNS vyznačany Kanstytucyjaj. «Ale heta ahulnyja pałažeńni, ahulnyja patrabavańni, ahulnyja funkcyjanalnyja abaviazki UNS, a voś u detalach, u kankretnych pytańniach u nas byvaje naadvarot», — zaŭvažyŭ Łukašenka.
Naprykład, što tyčycca pytańniaŭ nacyjanalnaj biaśpieki. «Kali vyznačana, što UNS prymaje rašeńni ŭ płanie nacyjanalnaj biaśpieki (vajna i mir i inšaje) — heta tolki paŭnamoctvy UNS. Kiraŭnik unosić (kali, nie daj Boh, vajna ci pahroza vajny), — źbirajem UNS, unosim prapanovy, razhladajem i pieravodzim krainu na vajennyja rejki, kali raptam zaŭtra vajna (ja biaru krajni prykład). Na heta paŭnamoctvy — va Usiebiełaruskaha narodnaha schodu», — źviarnuŭ uvahu Alaksandr Łukašenka.
Toj ža padychod, pa jaho słovach, tyčycca i kadravych rašeńniaŭ, jakija znachodziacca ŭ kampietencyi UNS.
Taksama jon skazaŭ, što na ŭzroŭni Prezidyuma UNS treba razhladać tolki važnyja pytańni.
«Heta nie aznačaje, što my zaŭtra budziem źbirać, jak plenumy CK, pa čatyry razy ŭ hod, i budziem tam niešta abmiarkoŭvać, rabić vyhlad, što my mocna pracujem i zaniepakojeny niejkim pytańniem. UNS pavinny zajmacca vyklučna pa Kanstytucyi svaimi pytańniami. Z hetaha pavinna pachodzić i struktura, i ŭzajemaadnosiny prezidyuma, staršyni prezidyuma z delehatami Usiebiełaruskaha narodnaha schodu», — skazaŭ Alaksandr Łukašenka.
-
«Ja ŭ kałonii byŭ bolš volny». Były palitviazień Tamaz Pipija raskazaŭ pra 6 hadoŭ za kratami i novuju paranaidalnuju biełaruskuju realnaść
-
Vyjšaŭ na svabodu palitźniavoleny fanat Cimur Pipija
-
«Uciakali ad mihrantaŭ i hiendarnaj ideałohii». Prapahanda pakazała jašče adnu siamju kovid-dysidentaŭ, jakaja pierabrałasia z Hiermanii ŭ Biełaruś
Kamientary
1. Maskva prapanoŭvała-prymušała zrabić imitacyju źmien va ŭładzie pa vynikach 2020-ch. Typa voś zaraz ułady prezidenta niama, usie pytańni da UNS. Ale paśla vyrašyŭ, što i tak ciahnie.
2. Na vypadak svajoj chvaroby.
3. Kab zvalić na UNS adkaznaść za vajnu, pra što zaraz i prahavaryŭsia. A sam chitravykručany budzie valić na UNS i rabić vyhlad miratvorca pry lubych umovach.