Jak ahienty biełaruskaha HRU ŭkaranilisia ŭ apazicyju: novaje rasśledavańnie
Letam 2020 hoda dva štatnyja supracoŭniki raźviedki Ministerstva abarony Biełarusi ŭvajšli ŭ davier da vałancioraŭ, paźniej pranikli ŭ apazicyjnuju arhanizacyju i zasnavali firmu ŭ Polščy. Jak u ich heta atrymałasia?
Biełaruski rasśledavalnicki centr sumiesna z «Aljansam rasśledavalnikaŭ» i polskim vydańniem Rzeczpospolita pry padtrymcy «Kibierpartyzanaŭ» raskryvaje niekatoryja padrabiaznaści špijonskaj dziejnaści štatnych supracoŭnikaŭ HRU Ministerstva abarony Biełarusi.
Rasśledavalniki nazyvajuć ich imiony — Juryj Kiziuk i Michaił Pavietka. Abodva na 2020 hod słužyli ŭ vajskovaj čaści 45523 u Minsku — upraŭleńni zamiežnaj infarmacyi i kamunikacyi Hałoŭnaha raźviedvalnaha ŭpraŭleńnia (HRU).
Žurnalisty śćviardžajuć, što ŭ žniŭni 2020 hoda mužčyny zdoleli ŭvajści ŭ davier da vałancioraŭ, jakija zajmalisia akazańniem dapamohi paciarpiełym pratestoŭcam.
Vałancioram Kiziuk byŭ viadomy jak Dźmitryj Pratasievič. Na heta imia jon mieŭ pašpart. Jak vyśvietlili žurnalisty, heta nie adziny falšyvy dakumient. Na dvaich raźviedčyki mieli siem pašpartoŭ.
Kiziuk pradstaviŭ vałancioram pratakoł, składzieny milicyjaj na jaho jak Dźmitryja Pratasieviča za toje, što viečaram 11 žniŭnia, znachodziačysia ŭ svajoj mašynie jon nibyta sihnaliŭ i nie padparadkavaŭsia patrabavańniu spynicca. Mužčyna źviarnuŭsia da ich pa dapamohu i paźniej sam staŭ vałancioryć.
1 listapada Pratasievič (Kiziuk) byŭ zatrymany na akcyi pratestu ŭ Minsku razam sa svaim znajomym Dzianisam Hota. U vyniku Hota atrymaŭ 25 sutak aryštu, a Pratasievič zastaŭsia na svabodzie. Vałancioram jon raskazaŭ, što zmoh źbiehčy ź mikraaŭtobusa siłavikoŭ. Adnak analiz dastupnych miedyjafajłaŭ pakazaŭ, što siłaviki jaho prosta adpuścili.
Paśla hetaha vypadku raźviedčyk praciahnuŭ pracavać siarod vałancioraŭ razam sa svaim naparnikam Michaiłam Pavietkam, jaki chavaŭsia pad imiem Maksima Kandratoviča. Kali Kandratovič (Pavietka) upieršyniu pryjšoŭ da vałancioraŭ, to pakazaŭ dakumient ab svaim zatrymańni milicyjaj — daviedku ź izalatara.
Vałanciory zhadvajuć, što ŭ adroźnieńnie ad Kandratoviča, jaki byŭ zakryty i mała što pra siabie raskazvaŭ, Pratasievič byŭ kamunikabielnym, inicyjatyŭnym i ŭ chutkim časie pačaŭ kiravać moładzievym napramkam vałanciorskaj pracy.
U 2021 hodzie niekatoryja biełaruskija dabračynnyja arhanizacyi pačali pierajazdžać u Jeŭropu. Kiziuk i Pavietka rušyli ŭśled za imi i praciahnuli špijonić siarod vałancioraŭ i ŭ kołach demakratyčnych siłaŭ užo na terytoryi Polščy.
Tak, viasnoj 2021 hoda Pratasievič dałučyŭsia da arhkamitetu pa stvareńni partyi «Razam», jakuju płanavali zarehistravać siabry vybarčaha štabu Viktara Babaryki.
Pa słovach kaardynatara arhkamitetu Ivana Kraŭcova, u tym ža hodzie Pratasievič prysutničaŭ na adnoj z sustreč prychilnikaŭ u Varšavie, a ŭ 2022 hodzie ŭdzielničaŭ u adnym ź ich adukacyjnych anłajn-prajektaŭ.
Kraŭcoŭ śćviardžaje, što nijakaha dostupu da ŭnutranaj infarmacyi arhanizacyi mužčyna nie mieŭ, nie davali jamu i nijakich daručeńniaŭ.
U śniežni 2022 hoda Michaił Pavietka pad vyhladam Maksima Kandratoviča staŭ adnym z zasnavalnikaŭ polskaj kampanii Arkmaxx group. U žniŭni 2023-ha ŭ skład zasnavalnikaŭ firmy z falšyvym pašpartam na imia Dźmitryja Pratasieviča ŭvajšoŭ i Juryj Kiziuk.
Jak vyśvietlili žurnalisty, zhodna ź lehiendaj, kampanija pavinna była zajmacca ŭ Polščy prodažam damoŭ, jakija vyrablalisia ŭ Biełarusi. Ale nijakaj dziejnaści jana nie pravodziła, a stvorana była, vierahodna, dla naładžvańnia novych kantaktaŭ i ŭmacavańnia lehiend raźviedčykaŭ.
U materyjale rasśledavalnikaŭ adznačajecca, što tolki ŭ 2024 hodzie kalehi Pratasieviča i Kandratoviča siarod biełaruskich demakratyčnych kołaŭ źviarnulisia da niezaležnych žurnalistaŭ, kab jany pravieryli hetych asob. Paśla pravierki stała zrazumieła, što abodva mužčyny nie tyja, za kaho siabie vydajuć.
Kudy jašče mahli ŭkaranicca špijony pad falšyvymi imionami, jakuju infarmacyju zdabyli za čatyry hady i pieradali biełaruskim uładam, rasśledavalnikam nieviadoma.
Rasśledavalniki vyjavili schiemy dziejnaści Anatola Tarnaŭskaha — multymiljaniera, jaki pracaŭładkavaŭ Hannu Łukašenka (Siałuk)
Chto moh zarabić miljony na mihracyjnym kryzisie na miažy Biełarusi i ES?
Braty Karyčy, zarablajučy ŭ Biełarusi, nabyvali nieruchomaść u Arabskich Emiratach
Biełaruskaja błohierka pracavała na rasijskaj apazicyjnaj fabrycy botaŭ, a paśla źliła dakumienty?
Kamientary
Usio jak užo było z ČKB, pašpartam Novaj Biełarusi, knihaj "Ja vychožu", hienierałam Sachaščykam z rasiejskim pašpartam, maci Kavaleŭskaha, płanam Pieramoha i jašče dziasiatkami dziasiatkami roznych pravałaŭ... Ničoha nie źmienicca. Ničoha nie budzie. Nijakich iluzij niama.