Nakolki vyhadna inviestavać hrošy ŭ zołata?

Zołata nabiraje pazicyi?

Za apošni hod cana zołata na suśvietnym rynku vyrasła z $1976 za uncyju (31 hram) da $2735. Takim čynam, hadavy pryrost skłaŭ kala 38%.

Kali hladzieć na kryvuju rostu ŭ doŭhaterminovaj pierśpiektyvie, to cana na zołata raście, choć i nie ŭvieś čas.

Apošni praciahły pieryjad spadu naziraŭsia z kanca 2012 da kanca 2015 hoda. Za hetyja try hady uncyja straciła 39%. Jana patańnieła z $1750 u vieraśni 2012-ha da $1070 u listapadzie 2015 hoda.

Pavialičyć

Kali razhladać apošnija 10 hadoŭ, to uncyja zołata padaražeła na 135% z $1162 u listapadzie 2014 hoda da ciapierašnich $2734. Pryčym tolki za apošnija 12 miesiacaŭ uncyja dadała ŭ canie kala $700.

Nakolki vyhadny taki aktyŭ?

Ekśpiert BEROC Anastasija Łuzhina nazyvaje zołata aktyvam ź nizkim uzroŭniem ryzyk.

«Zołata ličycca adnosna nadziejnym instrumientam dla inviestavańnia. Na 2025 hod prahnazujecca, što rost koštu praciahniecca. Bolš za toje, u vieraśni prahnoz pa zołacie byŭ pierahledžany ŭ bok pavieličeńnia.

Jaho košt u pieršuju čarhu zaležyć ad popytu, jaki ciapier vialiki», — tłumačyć ekśpiert.

Popyt na zołata staŭ zaŭvažna raści ŭ 2022-m. Ekanamist adznačaje niekalki faktaraŭ.

«Centralny bank Rasii na fonie sankcyj u vyniku vajny va Ukrainie pačaŭ bolš układvacca ŭ zołata. Plus u šerahu raźvitych krain dola zołata ŭ reziervach vysokaja i moža dasiahać 70%. Krainy, što raźvivajucca, zvyčajna majuć bolš ścipłyja nazapašvańni ŭ kaštoŭnym mietale. Ale pastupova jany taksama starajucca pavialičvać u struktury zołatavalutnych reziervaŭ dolu zołata», — tłumačyć Łuzhina.

Napružanaść u śviecie idzie na karyść zołatu

Taksama popyt na zołata zvyčajna raście, kali centralnyja banki šerahu krain pačynajuć źnižać pracentnyja staŭki.

Pavialičyć

«U takim vypadku inviestary taksama pačynajuć źviartać uvahu na zołata, pakolki jano pa svajoj sutnaści ličycca dastatkova ŭstojlivym, ale nie vysokadachodnym aktyvam u doŭhaterminovym pieryjadzie. Tamu, mienavita kali staŭki padajuć, raście popyt na zołata, što i stymuluje rost cen», — tłumačyć ekanamist.

Takim čynam, pry ŭzmacnieńni napružanaści ŭ śviecie inviestary starajucca sychodzić u bolš kansiervatyŭnyja i nadziejnyja aktyvy, da jakich i adnosicca zołata.

«Naprykład, jak reakcyja na peŭnyja padziei, akcyi kampanii mohuć abvalicca litaralna na praciahu niekalkich dzion, i ich uładalniki paniasuć surjoznyja straty.

U vypadku z zołatam, kali i idzie źnižeńnie, to jano zvyčajna adbyvajecca płaŭna. Zołata nie moža rezka pierastać być kaštoŭnym. To-bok jaho košt moža źnižacca ŭ suviazi z peŭnymi abstavinami, ale heta budzie płaŭny trend», — adznačaje ekśpiert.

Što majem?

Kupić i pradać zołata ŭ źlitkach u Biełarusi možna ŭ niekalkich bankach. Jak i ŭ vypadku z zamiežnaj valutaj, isnuje kurs kupli i prodažu, jakija ŭ vypadku sa 100-hramovymi źlitkami adroźnivajucca prykładna na 5%. Tamu, kab takim čynam zarabić na kupli źlitkaŭ, cana pavinna vyraści bolš, čym delta banka.

Kali brać pazityŭny prykład apošnich 12 miesiacaŭ, za jakija suśvietnyja ceny na zołata značna vyraśli, to atrymlivajecca, što kuplenyja 100 hramaŭ zołata ŭ źlitkach hod tamu za 23 950 rubloŭ siońnia možna pradać tamu ž Biełarusbanku za 30 830 rubloŭ. Takim čynam, hadavy dachod składzie 6880 rubloŭ, abo kala $1700 pa kursie. U takim vypadku dachodnaść — krychu bolš za 22 pracenty hadavych.

Piać hadoŭ tamu 100-hramovy źlitak kaštavaŭ $5122 suprać $9275 ciapier. Atrymlivajecca, što za hety pieryjad prybytkovaść inviestycyj u zołata ŭ 100-hramovych źlitkach skłała $4153, abo 81%.

Dziesiać hadoŭ tamu, u listapadzie 2014 hoda, 100 hramaŭ zołata Biełarusbank pradavaŭ za $4850 u pieraliku. Za 10 hadoŭ cana vyrasła amal udvaja — da $9275 (+91%).

Pry hetym nie abaviazkova kuplać źlitki i fizična zachoŭvać ich. Alternatyvaj moža być adkryćcio abiaźličanaha mietaličnaha rachunku, na jakim budzie adlustroŭvacca kolkaść kaštoŭnaha mietału ŭ hramach. Praŭda, u takim vypadku nijakaha realnaha zołata, jakoje možna fizična patrymać, u vas nie budzie.

• 1
• 0
• 1
• 0
• 0
• 0
• 0
• 0