«Arhumient znojdziecca». Azaronak pahražaje bizunom biełarusam, jakija nie chočuć siomaha terminu Łukašenki
Łukašenka nie raz nazyvaŭ siabie harantam taho, što «narod bolš nie budzie chadzić pad bizunom». Adnak u prapahandysta STB inšy pohlad na hetaje pytańnie.
Ideołahi aktyŭna raskručvajuć akcyju ŭ padtrymku vyłučeńnia Łukašenki na jaho siomy termin. Napiaredadni start hetamu praŭładnamu fłešmobu dali «Biełarusnafta» i śpiecnazaŭcy, a ŭžo siońnia jon achoplivaje biudžetnikaŭ roznych śfier z usioj krainy — ad biblijatekaraŭ da baskietbalistaŭ.
Sutnaść akcyi prostaja: paśla cytaty Łukašenki pra toje, što jon pojdzie na vybary, kali jaho prychilniki skažuć «Nado!», ludzi pa kamandzie kažuć «Nado!». Fłešmob zapuścili ŭžo paśla taho, jak inicyjatyŭnaja hrupa Łukašenki padała dakumienty na jaho vyłučeńnie ŭ CVK.
Da akcyi dałučyŭsia i prapahandyst STB Ryhor Azaronak. Praŭda, zrabiŭ heta krychu adroznym ad ahulnaj masy čynam. Jon zapisaŭ rolik ź Juryjem Vaskrasienskim, jakomu zadaŭ pytańnie, ci treba Łukašenku vyłučacca. Toj adkazaŭ: «Treba. Nie prosta treba, a vielmi nieabchodna».
Heta mierkavańnie padtrymaŭ i Azaronak.
«A dla tych, kamu nie treba, u nas taksama arhumient znojdziecca», — dadaŭ viadučy i dastaŭ ci to bizun, ci to nahajku.
Takaja pahroza Azaronka na adras tych, chto nie padtrymlivaje pažyćciovaje kiravańnie Łukašenki, davoli iraničnaja. Sam Łukašenka aktyŭna vykarystoŭvaje vobraz bizuna ŭ svaich vystupach, praŭda, u inšym kantekście.
Jon usialak kultyvuje mif pra toje, što da jaho prychodu da ŭłady biełarusy «chadzili pad bizunom i ŭ łapciach».
«I ŭsim, chto drenna hladzić na nas, budziem adnaznačna kazać pra toje, što pad bizunom my bolš nikoli chadzić nie budziem», — kazaŭ Łukašenka jašče ŭ 2019 hodzie ŭ chramie Usich Śviatych na vulicy Kalinoŭskaha ŭ Minsku.
U tym ža samym hodzie, vystupajučy ŭ Vajskovaj akademii, jon pałochaŭ usich destabilizacyjaj, vykarystoŭvajučy toj ža vobraz: «Kali tolki my destabilizujem našu krainu — jana kamuści dastaniecca, my znoŭ pojdziem pad bizun, jak u narodzie kažuć, nas buduć ciahać bizunom».
Uspomniŭ pra bizun Łukašenka i na praŭładnym mitynhu 16 žniŭnia 2020 hoda ŭ samy razhar pratestaŭ suprać falsifikacyi vybaraŭ i hvałtu.
«Nam prapanujuć sałdat NATA — čarnaskurych, žaŭtarotych i biełabrysych. Chočuć apranuć u łapci i pahaniać bizunom! Niaŭžo vy hetaha nie bačycie! Kali chtości hetaha choča — bieź mianie», — kryčaŭ Łukašenka na płoščy Niezaležnaści.
Paśla jon jašče nie raz vykarystaŭ svoj lubimy vobraz. U žniŭni hetaha hoda jon, naprykład, zaklikaŭ nastaŭnikaŭ nie bajacca pracavać u vybarkamach: «Budziecie bajacca — budziecie čarhovy raz pad bizunom chadzić».
Na «Dažynkach» dva tydni tamu jon paŭtaryŭ padobny refren:
«My nikomu nidzie nie patrebnyja. My patrebnyja, moža być, kamuści tolki na kaleniach, u łapciach i pad bizunom, jak kaliści było. Ale heta nie naš šlach».
Ciapier ža radykalny prychilnik Łukašenki, naadvarot, prapanuje biełarusam jašče pachadzić pad bizunom — da zborščykaŭ podpisaŭ i na vybarčyja ŭčastki.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ1
Kamientary
A vy pišitie, pišitie.