Abvinavačany ŭ charasmiencie vykładčyk EHU Sialecki vyjhraŭ sud va ŭniviersiteta
Ahulnaja suma kampiensacyi składzie kala 40 tysiač jeŭra.
Litoŭski sud staŭ na bok zvolnienaha ŭ kancy minułaha hoda vykładčyka Jeŭrapiejskaha humanitarnaha ŭniviersiteta Siarhieja Sialeckaha, jakoha abvinavacili ŭ charasmiencie. Mužčyna sudziŭsia suprać svajho byłoha pracadaŭcy i całkam zadavoleny rašeńniem suda. Pra heta «Jeŭraradyjo» paviedamiła jaho advakatka Evielina Truškinienie.
Pavodle jurystki, zvalnieńnie Sialeckaha było pryznanaje niepravamiernym. Mužčynu taksama prysudzili kampiensacyju za prastoj ciaham dzieviaci miesiacaŭ, kali jon nie moh vykonvać svaje abaviazki vykładčyka, a taksama maralnuju škodu i vydatki na jurydyčnuju abaronu.
Ahulnaja suma kampiensacyi składzie kala 40 tysiač jeŭra. Rašeńnie było apublikavanaje ŭčora ŭ druhoj pałovie dnia, 2 kastryčnika, na sajcie suda.
Taksama EHU abaviazali adnavić Sialeckaha na pracoŭnym miescy pačynajučy ź siońniašniaha dnia, pakolki rašeńnie ŭžo častkova ŭstupiła ŭ siłu — takuju mahčymaść daje pracoŭnaje prava Litvy.
«Jon hetamu vielmi rady, bo rašeńnie suda vielmi detalovaje, sud jaho vielmi dobra razhledzieŭ. Jon źviarnuŭ uvahu, što dakumienty [ab zvalnieńni] byli padrychtavanyja niapravilna, u tym liku i na toje, što jany mahli być padroblenyja, i jašče na šerah inšych momantaŭ. <…> Tak, jon vielmi zadavoleny, bo jon ničoha [drennaha] nie rabiŭ i hety hod dla jaho byŭ ciažkim», — adznačyła Truškinienie.
Pry hetym u EHU jość 30 dzion, kab padać apielacyju i admianić pryniataje rašeńnie.
«My pakul nie abmiarkoŭvali [dalejšyja płany]. Pahladzim, budzie apielacyja ci nie. Pakul zajmajemsia tolki hetaj spravaj. Samaje hałoŭnaje, što tut važna skazać, — akademičnaja supolnaść administracyi i rektaru [EHU] kazała, što niapravilna ŭsio [zvalnieńnie Sialeckaha] robicca. I ciapier my pryjšli da taho, što akademičnaja supolnaść mieła racyju», — padkreśliła jurystka.
Siarhiej Sialecki — biełaruski mastak i vykładčyk EHU, jakoha ŭniviersitet u śniežni 2023 hoda zvolniŭ paśla skandału z abvinavačańniami ŭ sieksualnych damahańniach da studentak univiersiteta.
Pra ich častka dziaŭčat raskazała miedyja publična, častka — na ŭmovach ananimnaści. Pavodle vynikaŭ unutranaha razboru EHU zvolniŭ Sialeckaha i adličyŭ studentku Taćcianu Barysavu, jakaja publična raskazała pra charasmient.
Ciapier čytajuć
Zorka brejkdansu ź Viciebska atrymaŭ 11 hadoŭ turmy ŭ Kitai. Što zdaryłasia?8
Kamientary
A chto dakładna jaho padtrymlivaŭ? Skazana tak, nibyta ŭsia supolnaść była na jaho baku.
Taksama z artykułu vynikaje, što sprava ŭ niapravilna padrychtavanych dakumientach na zvalnieńnie, pra charasmient zaraz faktyčna ničoha nie skazana.
Było b pravilna i paśladoŭna, kab achviary daviali b svaje spravy da sudoŭ.
Tady b i ŭniviersitetu było b zaraz na što abapiercisia.
Chacia sam univiersitet pavodziŭ siabie niepaśladoŭna i mutna.