Było 430 tysiač — stała 90 tysiač. Jak pa darozie ź Jeŭrasajuza ŭ Biełaruś mašyny hublajuć sotni tysiač kiłamietraŭ prabiehu
Mnohija aŭtaamatary viedajuć, što karekciroŭka prabiehu aŭto ŭ mienšy bok — niaredkaja źjava. Ale mała chto moža zdahadacca, nakolki mocna mohuć adroźnivacca realnyja pakazčyki ad tych, što pišuć u abjavach, kali aŭto pierajechała ź Jeŭrasajuza ŭ Biełaruś.
Kruču, viarču, zabłytać chaču
Prabieh aŭtamabila — adzin z samych važnych pakazčykaŭ. Čym jon bolšy, tym mienšym zastajecca resurs aŭtamabila. Praz heta ličby na adomietry vielmi mocna ŭpłyvajuć na košt aŭtamabila.
Voś niekalki jaskravych prykładaŭ taho, jak moža adroźnivacca prabieh aŭto pry jaho prodažy za miažoj i ŭ Biełarusi.
Mietan — nie dobry znak
U prodažy ŭ Biełarusi znachodzicca bolš za dziasiatak śviežapryhnanych biełych Seat Leon ST 2019—2020 hadoŭ vypusku, jakija pracujuć na mietanie.
Adzin ź ich — Leon 2020 hoda vypusku z zajaŭlenym prabieham 133 tysiačy kiłamietraŭ. Prosiać za mašynu $13 350. U apisańni paznačana, što mašyna pryhnana sa Šviecyi i nie maje prabiehu pa Biełarusi.
Ukazany ŭ abjavie VIN-numar paćviardžaje toj fakt, što mašyna niadaŭna pryjechała ŭ Biełaruś. Razmytnili jaje 17 žniŭnia 2024, pra heta śviedčać dadzienyja z sajta biełaruskaj mytni.
Banalnaja pravierka pa VIN pakazvaje, što da taho, jak trapić u Biełaruś, mašyna sapraŭdy jeździła ŭ Šviecyi.
Dzie padvoch?
Ale pakolki ŭ Šviecyi mnohija danyja znachodziacca ŭ adkrytym dostupie, numar kuzava daje mahčymaść pravieryć historyju aŭtamabila, u tym liku prabieh.
Apošni zafiksavany prabieh hetaha aŭto ŭ Šviecyi składaje 28 407 šviedskich mil, što składaje 280 tysiač kiłamietraŭ (1 šviedskaja mila = 10 km).
Atrymlivajecca, što pa darozie ŭ Biełaruś, u hetaj mašynie niedzie zhubiłasia pałova prabiehu: 133 tysiačy ŭ Biełarusi, suprać 280 tysiač u Šviecyi.
Ale, jak vyśvietliłasia, heta jašče kvietački. Bo niekatoryja inšyja anałahičnyja aŭto pamaładzieli kudy bolš adčuvalna.
Dalej — bolej
Inšy śviežapryhnany Seat Leon 2020 hoda vypusku acanili na $12 750. Zajaŭleny prabieh aŭtamabila — 120 tysiač kiłamietraŭ.
Apošni zarehistravany prabieh u Šviecyi — 42 910 šviedskich mil, abo amal 430 tysiač kiłamietraŭ. Atrymlivajecca, što hety aŭtamabil zhubiŭ bolš za 310 tysiač kiłamietraŭ.
Darečy pryhnali ŭ Biełaruś jaho zusim niadaŭna, data mytnaj ačystki — 28 žniŭnia 2024 hoda.
Čarhovy rekord
Jašče adzin mietanavy Seat Leon sa Šviecyi pieraŭzychodzić usie čakańni! Zajaŭleny prabieh u jaho — usiaho 92 tysiačy kiłamietraŭ. Hod vypusku — 2019. Prosiać za jaho $14 500. U Biełarusi mašyna z maja 2024 hoda.
Apošni zarehistravany prabieh hetaha aŭto ŭ Šviecyi — 43 254 šviedskija mili (kala 430 tysiač kiłamietraŭ).
Prabieh, ukazany ŭ abjavie na biełaruskim sajcie, niedaličvaje bolš za 340 tysiač kiłamietraŭ!
Nie tolki ŭ Biełarusi
Analizujučy prabieh i kamplektacyju apisanych mašyn, možna vykazać zdahadku, što ŭ Šviecyi jany vykarystoŭvalisia ŭ taksi. Mahčyma, navat u adnym aŭtaparku, bo daty pieršaj rehistracyi vielmi blizkija. Dy i kamplektacyja ŭ ich kali nie adnolkavaja, to vielmi padobnaja.
Pradajucca anałahičnyja Seat Leon nie tolki ŭ Biełarusi. Na litoŭskim aŭtamabilnym sajcie jość abjava ab prodažy mietanavaha Seat biełaha koleru. Pryčym samaje cikavaje, što numar telefona pradaŭca pačynajecca z +375.
Ale hałoŭnaje adroźnieńnie ŭ prodažy padobnych aŭto ŭ Litvie i Biełarusi ŭ tym, što ŭ Litvie mašynu pradajuć z zajaŭlenym aryhinalnym prabieham. U hetym vypadku — heta 484 tysiačy kiłamietraŭ.
Prabiŭšy mašynu pa VIN, na tym ža šviedskim sajcie, možna ŭbačyć, što apošni zarehistravany prabieh u Šviecyi — 48 443 šviedskija mili, što składaje tyja ž 484 tysiačy kiłamietraŭ.
U Litvie za Seat z prabieham 484 tysiačy kiłamietraŭ prosiać 9200 jeŭra, ale ŭ apisańni da abjavy paznačana, što cana na ekspart składaje 8200 jeŭra.
Kamientary