Narviežskaja pryncesa vyjšła zamuž za amierykanskaha šamana

Posmotrieť etu publikaciju v Instagram

Publikacija ot HELLO! Magazine (@hellomag)

Para źviazała siabie šlubam na pryvatnaj cyrymonii ŭ hateli ŭ Hiejranhiery, Zachodniaja Narviehija, u subotu paśla dvuch dzion uračystaściaŭ, piša BBC.

U adroźnieńnie ad inšych karaleŭskich viasiellaŭ, dzie natoŭpy naroda vitajuć maładych, na hetym śviacie ščaślivuju paru zmahli ŭbačyć tolki niekalki zvyčajnych narviežcaŭ — vidy na maładych byli zakrytyja tentam abo biełaj tkaninaj, pakolki ekskluziŭnyja pravy na fotazdymki para pradała časopisu Hello! Magazine.

Na viasielli taksama była zaŭvažana zdymačnaja hrupa Netflix, što vyklikała niezadavolenaść miascovych vydańniaŭ, jakija nie atrymali dopusku da ŭračystaści.

Pavialičyć

Baćki pryncesy, karol Charald i karaleva Sonia, prysutničali na šlubie razam ź inšymi členami karaleŭskaj siamji Narviehii, a taksama pryncami i pryncesami sa Šviecyi i Niderłandaŭ.

Try dački pryncesy Marty Łuizy ad jaje pieršaha šlubu ź niabožčykam, narviežskim piśmieńnikam Ary Benam taksama ŭdzielničali na cyrymonii.

52-hadovaja pryncesa Marta Łuiza i Durek Vieret, jaki paśla viasiella nie atrymaje tytuł prynca, abviaścili pra svaje zaručyny ŭ 2022 hodzie. Niahledziačy na ​​toje, što ich adnosiny vyklikali sprečki ŭ Narviehii, karol Charald kazaŭ narviežskim žurnalistam, što Vieret — «vydatny chłopiec», i što jany ŭdvaich «šmat śmiajalisia, navat u hety ciažki čas».

U 2022 hodzie narviežski karaleŭski dvor abviaściŭ, što Marta Łuiza «admovicca ad svajoj roli patranesy», pakolki jana i Vieret imknucca «bolš vyrazna raźmiežavać svaju dziejnaść i dziejnaść Karaleŭskaha doma Narviehii» i «praduchilić nieparazumieńni».

Z tych časoŭ para padvierhnułasia krytycy z boku pałaca i čalcoŭ parłamienta Narviehii za ŭviazvańnie kamiercyjnaj dziejnaści z karaleŭskim statusam pryncesy.

Kryści Mary Skredzie, karaleŭski karespandent narviežskaha telekanała NRK, kaža, što ich adnosiny vyklikali kanflikt unutry karaleŭskaj siamji i sprečki ŭ hramadstvie.

«Mnohija narviežcy zaniepakojenyja tym, što jana vykarystoŭvaje svaje karaleŭskija suviazi, kab zarablać hrošy», — skazała Skred, dadaŭšy, što niekatoryja ličać heta prajavaj «niepavahi» da karala.

Pryncesa Marta Łuiza ŭ minułym śćviardžała, što źjaŭlajecca prazorlivaj, a da 2018 hoda kiravała škołaj, u jakoj, pavodle jaje słoŭ, vučniaŭ vučyli «tvaryć cudy» i razmaŭlać z aniołami. Vieret pra siabie kaža, što jon apošni z šaści pakaleńniaŭ šamanaŭ, a adnojčy skazaŭ, što pamior na 4 chviliny i 25 siekund.

«Ja atrymaŭ usiu infarmacyju ź inšaha boku. Ja viarnuŭsia», — skazaŭ jon u intervju haziecie New York Times.

• 0
• 0
• 9
• 10
• 3
• 1
• 1
• 0