Što ciapier adbyvajecca z vyklikami ŭ KDB za danaty i kaho adrazu aryštoŭvajuć navat biez prapanovy adkupicca
Z momantu apošniaha našaha razboru situacyi z danatami prajšoŭ amal hod. Situacyja nie palepšyłasia. Raspaviadajem, jakija terminy dajuć za danaty, kamu ŭdałosia nie płacić «vykup», kaho adrazu aryštavali i jak prachodziać sumoŭi.
Pra jakija vypadki nam viadoma?
Nam viadomyja niekalki adnosna niadaŭnich vypadkaŭ, kali ludziej zaprašali na hutarki. Usie jany, akramia adnaho čałavieka, vyjšli na volu, zapłaciŭšy «vykup». Summa zaležała ad dachodu.
Nie spyniajucca represii i ŭ rehijonach. Nam viadomy jak minimum adzin vypadak, kali z supracoŭnika dziaržaŭnaha pradpryjemstva ŭ rajcentry za zusim nievialiki danat (da 10 dalaraŭ) uziali 500 rubloŭ kampiensacyi — značnuju sumu dla małoha horada.
U adnym novym viadomym nam vypadku čałaviek pajšoŭ addavać apłatu za «danaty», ale trapiŭ za kraty za ŭdzieł u pratestach. U jaho znajšli fota z pratestaŭ u smartfonie (nieviadoma, dzie kankretna — u archivach sacsietak abo ŭ halerei ci vobłaku). My raim vyčyścić pratesnyja fota z vašych smartfonaŭ, voś našy hajdy:
Jak nadziejna vyčyścić foty z vašych smartfonaŭ — padrabiazny hajd
Jak prachodzić hutarka?
Samo «sumoŭje» moža prachodzić pa-roznamu. Praviarajuć smartfon, bankaŭskija prahramy, šukajuć čeki ŭ paštovaj skryni, prahramy zamiežnych bankaŭ i kryptabiržaŭ. Pačyścicie ŭsio heta, kali vy jašče hetaha nie zrabili.
Pytajucca pra staŭleńnie da ŭładaŭ dy Łukašenki, za kaho hałasavali, ci ŭdzielničali ŭ pratestach dy inšych aktyŭnaściach, navošta padtrymlivajecie ekstremisckija pohlady. Kali ŭ ich uźnikajuć padazreńni ŭ vašaj ščyraści, to zadajuć dadatkovyja pytańni.
Kadebisty sprabujuć spravakavać — maŭlaŭ, my ŭsio viedajem, kažy adrazu, a to budzie horš. Našy surazmoŭcy rajać adkazvać, što vy nie pamiatajecie, ci achviaravali niekamu hrošy i prasić vypisku z banka ci niejkaje inšaje paćviardžeńnie, bo tady stanie zrazumieła, što vam moža pahražać.
Bolšaść apytanych nami ludziej ščyra nie pamiatali, kolki i kudy achviaravali i ci rabili heta. Ale kadebisty adrazu pakazali im vypiski z bankaŭ abo skrynšoty z fejsbuku.
U našym hajdzie pa pierasiačeńni miažy dy minułym artykule pra danaty jość toje, na što varta źviarnuć uvahu ŭ vašym smartfonie i ahułam. Pierapraviercie ŭsio, asabliva miescy, dzie mohuć zachoŭvacca čeki vašych achviaravańniaŭ — mejł, bankaŭskaja prahrama zamiežnaha banka, kryptabirža.
Ahułam, kali da vas jość pytańni, to vy možacie pravieści ŭ KDB vielmi šmat času. I da hetaha varta być hatovymi.
Pa jakoj schiemie ciapier prosiać vykup?
Ciapier, pa praanalizavanych nami vypadkach, schiema takaja. Kali čałaviek achviaravaŭ u BYSOL ci BY_HELP nie vielmi bujnuju sumu, to jamu prapanujuć zapłacić sumu ad 500 dalaraŭ (abo ad 500 rubloŭ u rehijonach), pry hetym «dla peŭnaści» praviarajuć jahonyja smartfon i sacsietki.
Sumu kadebisty vyznačajuć, zychodziačy z aficyjnaha dachodu čałavieka i taho, kolki jon maje majomaści. To-bok navat u vypadku vielmi małoha danata jana moža być značna vyšejšaj za «siaredniuju». Dla ajcišnikaŭ i pradprymalnikaŭ, a taksama tych, chto pracuje za miažoj, jana zvyčajna adrazu bolšaja, dla zvyčajnych rabotnikaŭ u Minsku amal zaŭždy 500 jeŭra.
A kali admovicca płacić?
Kali čałaviek admaŭlajecca płacić, choć jość niejkija dokazy ci kadebisty peŭnyja ŭ jaho «vinie», to jamu moža pahražać kryminalnaja sprava i źniavoleńnie. Adzin z takich vypadkaŭ niadaŭna apisvała «Viasna».
Viadomyja vypadki, kali ludzi davodzili, što sapraŭdy ničoha nie achviaravali. Jany paźbiahali jak apłaty «vykupu», tak i pakarańnia, ale dla hetaha patrebnyja mocnyja dokazy taho, što ty nie achviaravaŭ. Takija vypadki ciapier — vyklučeńnie z praviłaŭ.
Kaho aryštoŭvajuć biez prośbaŭ zapłacić i jakija terminy dajuć?
Kali vy achviaravali ŭ inšyja inicyjatyvy (BYPOL, Kibierpartyzany i h.d.), na dapamohu Ukrainie abo bujnuju sumu hrošaŭ u BYSOL/BY_help i heta niejkim čynam vykryłasia, to vas adrazu aryštujuć. Mohuć vas aryštavać i kali tolki padazrajuć u takim achviaravańni, a tolki paśla raźbiracca.
Ciapier čaściakom heta adbyvajecca na miažy — u čałavieka praviarajuć bankaŭskuju prahramu abo prahramu dla kupli kryptavalutaŭ i znachodziać tam achviaravańnie. Pry hetym kali vy ŭžo zapłacili vykup za danat u BYSOL, to heta nie pazbavić vas ad adkaznaści za inšyja danaty (naprykład, na Ukrainu) i pakarańnie budzie suvorym.
Kolki prysudžajuć za danaty?
Minimalny termin, jaki davali čałavieku za nievialikaje achviaravańnie ŭžo paśla zatrymańnia — 2 hady chatniaj chimii, ale taki čałaviek tolki adzin.
Bolš za 80 čałaviek atrymali pazbaŭleńnie voli abo chimiju z nakiravańniem. Samy vialiki termin za danaty skłaŭ dzieviać z pałovaj hadoŭ kałonii.
Pa źviestkach «Viasny», ciapier nie mienš za 91 čałavieka ŭžo asudzili za danaty. Bolšaść hetych ludziej atrymała pakarańnie, źviazanaje z pazbaŭleńniem voli.
Za što jašče ciapier karajuć?
Usio čaściej adrazu aryštoŭvajuć tych, chto sistemna dapamahaje ci dapamahaŭ raniej palitviaźniam z ułasnych srodkaŭ biez udziełu fondaŭ i anijakaj kaardynacyi (dasyłaŭ pasyłki i pieravody ŭ SIZA ci kałonii). Takaja praktyka źjaviłasia ŭ studzieni 2024, paśla abłavy na salidarnych z palitviaźniami.
Na poł i ŭzrost KDB nie źviartaje ŭvahi. Najstarejšaja z takich aryštavanych — 68-hadovaja bieraściejka Natalla Žyhar, jakoj pahražaje da siami hadoŭ kałonii.
Usie ludzi, asudžanyja pa takich spravach, atrymali pakarańnie, źviazanaje z pazbaŭleńniem voli. Pakul heta vyklučna žančyny, niekatoryja ź ich — blizkija svajački palitviaźniaŭ.
«Naša Niva» — bastyjon biełaruščyny
PADTRYMAĆ
Kamientary