U Kijevie zajavili pra stvareńnie biełaruskaha hramadskaha ruchu «Kalinoŭcy». U kiraŭnictvie viadomyja asoby

U jakaści hałoŭnaj misii novaha ruchu padajecca «supraćstajańnie rasijskaj ahresii i vyzvaleńnie Biełarusi ad kałabaracyjanisckaha režymu Łukašenki».

Taktyčnaj metaj nazvana ŭzmacnieńnie techničnaha i mabilizacyjnaha zabieśpiačeńnia PKK za košt mahčymaściaŭ biełarusaŭ. Jak tych, chto zastajecca siońnia ŭ krainie, tak i tych, chto vymušany byŭ pakinuć radzimu.

Rašeńnie ab stvareńni ruchu, pavodle Vadzima Kabančuka, było pryniata na apošnich pałkavych zborach. Jon akreśliŭ połk Kalinoŭskaha jak «vajskova-hramadski prajekt, jaki ŭklučaje ŭ siabie dziejnych vajskoŭcaŭ, tych, chto ŭžo prajšoŭ słužbu i ciapier znachodzicca ŭ aktyŭnym reziervie ŭ Jeŭropie i va Ukrainie, a taksama tych, chto sadziejničaje i dapamahaje ŭdziełu padraździaleńnia ŭ efiektyŭnym viadzieńni bajavych dziejańniaŭ».

Zasnavalniki ruchu bačać nieabchodnaść «kansalidacyi ŭsich biełaruskich nacyjanalna-vyzvalenčych sił vakoł biełaruskich dobraachvotnikaŭ, PKK i ruchu «Kalinoŭcy».

Siarod biahučych zadač novaha ruchu Dzianis Procharaŭ adznačyŭ realizacyju prajektaŭ pa techničnym zabieśpiačeńni PKK sučasnymi vidami ŭzbrajeńniaŭ, pryvioŭšy ŭ prykład prajekt «Biełaruski dron». Taksama jon musić rupicca pra stvareńnie ŭmoŭ i kaardynacyju padrychtoŭki biełarusaŭ, jakija mohuć stać patencyjnym mabilizacyjnym resursam PKK, arhanizacyju reabilitacyi i padtrymki vieteranaŭ pałka ŭ krainach Jeŭropy.

Akramia taho, u pryjarytetach «Kalinoŭcaŭ» — kaardynacyja pracy ź biełaruskimi demakratyčnymi siłami: Kaardynacyjnaj radaj, Abjadnanym pierachodnym kabinietam i Ofisam Śviatłany Cichanoŭskaj.

Padčas bryfinhu Procharaŭ zaklikaŭ demakratyčnyja siły viarnucca da stvareńnia kaardynacyjnaha orhana biełaruskaha nacyjanalna-vyzvolnaha ruchu ŭ ramkach realizacyi rašeńniaŭ kanfierencyi «Šlach da voli», jakaja adbyłasia ŭ Kijevie ŭ listapadzie 2023 hoda.

Dźmitryj Ščyhielski padkreśliŭ, što «Kalinoŭcy», maŭlaŭ, nacelenyja nie na kanfrantacyju, a na «praduktyŭnaje supracoŭnictva z usimi instytucyjanalnymi strukturami»

Vadzim Kabančuk adchiliŭ viersiju pra toje, što stvareńnie ruchu «Kalinoŭcy» źviazanaje z kanfliktami, jakija adbyvajucca ŭ PKK apošnim časam.

Ź jahonych słoŭ, «i ŭ pryncypie jak takoha kanfliktu ŭ nas niama». Usie bajcy «znachodziacca ŭ zonie bajavoj adkaznaści i niasuć słužbu», «padparadkoŭvajucca ŭkrainskaj vajskovaj ijerarchii, viertykali i vykonvajuć zahady ŭkrainskaha kamandavańnia».

Adkazvajučy na pytańnie pra kamandzira PKK, Kabančuk skazaŭ, što «na hety momant pałkom kiruje vykanaŭca abaviazkaŭ kamandzira Pavieł Šurmiej».

• 11
• 0
• 6
• 0
• 0
• 0
• 1
• 0