Jak Bajden prymaŭ rašeńnie admovicca ad udziełu ŭ vybarach prezidenta ZŠA. Chronika vychodnych

Vysokapastaŭlenyja supracoŭniki Biełaha doma i pieradvybarčaha štaba Džo Bajdena ŭvieś minuły tydzień uparta nastojvali na tym, što prezident nie źbirajecca zdymać svaju kandydaturu na vybarach 2024 hoda, niahledziačy na šmatlikija zakliki ŭpłyvovych demakrataŭ vyjści z honki, piša Bi-bi-si.

Jašče ŭ subotu pamočniki prezidenta składali hrafik mierapryjemstvaŭ pieradvybarnaj kampanii, u jakich jamu treba było ŭziać udzieł paśla viartańnia ŭ Bieły dom. Vychodnyja Bajden, u jakoha znoŭ znajšli kavid, pravioŭ u svaim plažnym domiku na ŭschodnim uźbiarežžy štata Dełaver.

Adnak, jak paviedamili blizkija da Bajdena ananimnyja krynicy, da ranicy niadzieli prezident pieradumaŭ.

U subotu ŭviečary Bajden pačaŭ surjozna dumać, ci nie varta jamu pryniać adno z samych składanych rašeńniaŭ za ŭsiu jaho 50-hadovuju palityčnuju karjeru i admovicca ad udziełu ŭ honcy.

U pracesie jon razmaŭlaŭ ź nievialikim kołam pamočnikaŭ, siarod jakich byŭ adzin ź jaho najbližejšych daradcaŭ Styŭ Ryčeci, jaho hałoŭny strateh Majk Daniłon, namieśnik kiraŭnika administracyi Eni Tamasini i Entani Biernał — kiraŭnik administracyi pieršaj łedzi Džył Bajden.

Ryčeci, jaki byŭ blizkim pamočnikam Bajdena jašče z časoŭ jaho pracy ŭ Sienacie ZŠA, pryjechaŭ u plažny domik prezidenta ŭ piatnicu. Daniłon, jašče adzin pamočnik, jaki adyhraŭ klučavuju rolu ŭ pryniaćci samych važnych palityčnych rašeńniaŭ prezidenta, dałučyŭsia da ich u subotu. Bajden i jaho pamočniki vyvučali novyja źviestki apytańniaŭ i abmiarkoŭvali, ci zmoža jon pieramahčy Donalda Trampa ŭ isnujučych umovach.

Novyja danyja aptymizmu nie vyklikali. Bolš za toje, čakałasia, što na hetym tydni da kampanii za źniaćcie kandydatury Bajdena dałučacca novyja fihury ŭ Demakratyčnaj partyi. Prezidentu treba było pryniać rašeńnie.

Razam z Daniłonam Bajden pačaŭ składać zajavu ab vychadzie z honki. Ryčeci ŭ hety čas prapracoŭvaŭ padrabiaznaści taho, jak jana budzie raspaŭsiudžvacca i jak infarmavać pra heta inšych supracoŭnikaŭ aparata.

Pavodle źviestak krynic Bi-bi-si, Bajden pryniaŭ kančatkovaje rašeńnie ab vychadzie z prezidenckaj honki ŭ niadzielu ranicaj, asobna patelefanavaŭšy kiraŭniku administracyi Džefu Zijentsu, kiraŭniku svajoj pieradvybarnaj kampanii Džen O'Meli Dyłan i vice-prezidentu Kamale Charys, kab paviedamić im pra heta.

U niadzielu dniom, u 13:45 pa miascovym časie (20:45 pa Minsku), prezident pravioŭ videakanfierencyju z samymi vysokapastaŭlenymi supracoŭnikami Biełaha doma i pieradvybarčaha štaba, uklučajučy Anitu Dan, jakaja kiruje kamunikacyjnaj stratehijaj Biełaha doma. Praz chvilinu jon vystupiŭ z publičnaj zajavaj.

«Jon skazaŭ, što razvažaŭ nad hetym apošnija niekalki dzion», — paviedamiŭ vysokapastaŭleny supracoŭnik Biełaha doma.

Choć u svajoj pieršapačatkovaj zajavie Bajden nie zhadaŭ Kamału Charys u jakaści patencyjnaha kandydata ŭ prezidenty, praz paŭhadziny jon napisaŭ u Ch (były tvitar), što padtrymlivaje jaje kandydaturu.

Pa słovach dźviuch krynic, znajomych z hetymi razmovami, Bajden i Charys nieadnarazova razmaŭlali na praciahu dnia, jašče da taho, jak prezident zrabiŭ svaju zajavu.

Pieršaja łedzi Džył Bajden — najbližejšaja daradca prezidenta, čyjo mierkavańnie, jak ličycca, było adnym z vyrašalnych faktaraŭ u jaho rašeńni, — zajaviła, što padtrymlivaje žadańnie muža pakinuć prezidenckuju kampaniju.

Pry hetym mnohija ŭ Biełym domie i ŭ pieradvybarnym štabie nie byli zahadzia prainfarmavanyja ab płanach Bajdena. Bolšaść supracoŭnikaŭ daviedalisia pra jaho vychad z honki z paviedamleńnia ŭ sacyjalnych sietkach.

Zijents, kiraŭnik aparata prezidenta, pravioŭ naradu z čynoŭnikami Biełaha doma i razasłaŭ elektronnyja listy ŭsim supracoŭnikam administracyi, kab paćvierdzić zajavu Bajdena i padziakavać im za ruplivuju pracu.

Jak havorycca ŭ zajavie Biełaha doma, Bajden tym časam pahutaryŭ ź niekalkimi demakratami ŭ Kanhresie, hubiernatarami i prychilnikami i płanuje praciahnuć abzvońvać viadomych demakrataŭ u paniadziełak.

Kamała Charys, jakaja ŭžo zajaviła, što płanuje vyjhrać prezidenckuju naminacyju, praviała niadzielny dzień u telefonnych pieramovach z zakanadaŭcami.

U tym liku jana razmaŭlała ź lidaram demakratyčnaj mienšaści Pałaty pradstaŭnikoŭ Chakimam Džefrysam i z klučavymi partyjnymi čynoŭnikami i hubiernatarami, kab zaručycca ich padtrymkaj na vybarach.

Choć, na dumku bolšaści analitykaŭ, surjoznych kankurentaŭ u Charys niama, aficyjna naminavać jaje pavinien źjezd Demakratyčnaj partyi ŭ žniŭni.

• 2
• 0
• 1
• 0
• 0
• 0
• 0
• 0