U Ispanii dakazali hipotezu 54-hadovaj daŭniny viadomaha matematyka rodam z Kobryna
Śpiecyjalisty Baskskaha centra prykładnoj matematyki ŭ ispanskim Bilbaa «zmahli paśpiachova rašyć prablemu, jakaja zastavałasia niaźmiennaj bolš za piać dziesiacihodździaŭ», paviedamili na sajcie navukovaj ustanovy.
Pieršapačatkova hipotezu sfarmulavaŭ adzin z najbolš viadomych ałhiebraičnych hieomietraŭ XX stahodździa Oskar Zaryski, jaki naradziŭsia ŭ 1899 hodzie ŭ Kobrynie. Z 1927 hoda Oskar žyŭ i vykładaŭ u ZŠA, tamu ŭ pres-relizie jaho nazyvajuć «biełaruska-amierykanskim matematykam».
Zaryskamu naležać asnoŭnyja raboty ŭ halinie kamutatyŭnaj ałhiebry i ałhiebraičnaj hieamietryi, jakija jon źviazaŭ pamiž saboj. Akramia taho, u 1969-1970 hadach Oskar byŭ prezidentam Amierykanskaha matematyčnaha tavarystva.
«Vykarystoŭvajučy inavacyjny padychod, jaki złučaje ałhiebraičnuju hieamietryju ź simplektyčnaj, navukoŭcy dakazali hipotezu, prademanstravaŭšy mahutnuju zdolnaść matematyki źviazvać roznyja haliny viedaŭ», — havorycca ŭ tekście.
Hipoteza adnosicca da teoryi sinhularnaści ŭ ałhiebraičnaj hieamietryi. U 1970 hodzie ŭ adnoj z navatarskich rabot Zaryski pastaviŭ vosiem pytańniaŭ, siem ź jakich atrymałasia rašyć u dalejšym (niachaj i ciaham mnohich hadoŭ), a adno nijak nie davałasia — prynamsi, da siońniašniaha momantu.
«Heta dasiahnieńnie nie tolki rašaje składanuju matematyčnuju zadaču, ale i słužyć jašče adnym prykładam taho, jak spałučeńnie mietadaŭ z roznych halin i naviadzieńnie mastoŭ pamiž roznymi stylami matematyčnaha myśleńnia dazvalajuć vyrašać zadačy sposabami, jakija zdajucca niemahčymymi pry vykarystańni mietadaŭ z adnoj haliny», — robicca vysnova ŭ materyjale.
Kamientary