«Dapuścim, čałaviek ź nizkim uzroŭniem kultury». Kiraŭnička «Biełaj Rusi» rezka adkazała na chamski dopis pra biełaruskuju movu mastački Žyhimont
Namieśnica staršyni Hrodzienskaj abłasnoj arhanizacyi hramadskaha abjadnańnia «Biełaja Ruś» Śviatłana Varanica adkazała praŭładnaj mastačcy Śviatłanie Žyhimont, jakaja abrynułasia z abrazami na biełaruskuju movu.
Varanica pracytavała ŭ svaim telehramie dopis Žyhimont i napisała:
«Dapuścim, čałaviek niepiśmienny. Dapuścim, ź nizkim uzroŭniem kultury. Dapuścim, jaho/iaje zabłakavaŭ navat Jandeks. Dapuścim, schilny da devijantnych pavodzin. Dapuścim, adčuvaje asabistuju ŭstojlivuju niepryjaznaść da kahości z nośbitaŭ biełaruskaj movy. Ale, jak na mianie, navat sukupnaść dapuščalnaha nie adkazvaje na pytańnie: «A što heta było?»
Učora adyjoznaja mastačka, jakaja pisała pastaralny partret Łukašenki, a niadaŭna vystaŭlałasia na mierapryjemstvie «Danbas u našym sercy», pryjšła ŭ šalenstva ad adnaho biełaruskaha słova.
Žyhimont apisała płatnuju parkoŭku kala CUMa. Terminał tam nie pracavaŭ, ale visieła instrukcyja, jak apłacić praź internet. Mastačka panarakała, što ŭ jaje ŭzroście nie tak i prosta razabracca ŭ internet-technałohijach. Ale biełaruskaja mova jaje dabiła.
«Spaŭzaju vačyma ŭniz i čytaju: «Spampujcie prahramu». Spampujcie? Što, b***, ja pavinna zrabić? Ja, s***, u svajoj krainie znachodžusia ci ŭ krainie banderaŭskich elfaŭ?» — aburałasia ŭ telehram-kanale Žyhimont.
Paśla čaho napisała jašče niekalki abraźlivych vyrazaŭ na adras biełaruskaj movy: «chutarskaja vyb**dskaja paŭpšeckaja tarabarščyna».
Mastačka śćviardžaje, što nibyta niakiepska viedaje biełaruskuju movu, ale novyja słovy (i tyja, jakija joj nie padabajucca) vučyć nie źbirajecca.
«Ja nie źbirajusia na staraści hadoŭ marnavać svoj kaštoŭny čas na vyvučeńnie hetaha naboru słoŭ i vyrazaŭ z roznych moŭ i dyjalektaŭ plus usialakich słoŭ-vyradkaŭ, jakija mnie sprabujuć naviazać, z usimi hetymi rovarami, kiroŭcami, vałoškami, marozivami i spampavańniem. I ja nie budu razam sa zmaharami rabić vyhlad, byccam by hety nabor i jość mova maich prodkaŭ. Prabačcie, ale movu maich dziadoŭ ja čuła svaimi vušami. Idzicie lesam!»
Što da Śviatłany Varanicy, to jana raniej nie raz rezka krytykavała i dopisy sumnaviadomaj danosčycy Volhi Bondaravaj.
Kamientary