Šeść płaniet chutka stanuć u adzin šerah. Kali nazirać padzieju?
Na praciahu niekalkich dzion u pačatku červienia adbudziecca parad šaści płaniet — Mierkuryja, Marsa, Jupitera, Nieptuna, Saturna i Urana, jakija «źbiarucca» pa adzin bok ad Sonca.
Płaniety raźmieściacca pa dyjahanali, dzie Saturn budzie vidniecca vyšej za astatnich, a paśla jaho — Nieptun, Mars, Uran i Mierkuryj, paviedamlaje The Guardian. Bližej za ŭsio da haryzontu ziamli budzie Jupiter.
Lepš za ŭsio na ranišnim niebie 3 červienia budzie bačny Mars. Nazirać za aranžavym śviatłom płaniety, jakaja raźmiaściłasia pablizu miesiaca, čałaviectva zmoža kala 4-j ranicy.
Padzieja budzie adbyvacca na dośvitku nadzvyčaj nizka na ŭschodzie. Tamu dla taho, kab ubačyć zamaskiravanyja jarkim ranišnim śviatłom Mierkuryj i Jupiter, pryjdziecca vykarystoŭvać binokl. Pieraškody, takija jak addalenyja budynki abo drevy, taksama abciažarvajuć nazirańnie.
Saturn uzydzie na haryzont kala 2 hadziny nočy, ale lepš za ŭsio jaho budzie vidać tady, kali nieba pačnie śviatleć. Adnak nazirać za kolcami płaniety nie atrymajecca — bieź śpiecyjalnych pryboraŭ budzie dastupna tolki adnosna jarkaje žaŭtavaje śviatło Saturna.
Uran budzie bačny niaŭzbrojenym vokam, ale tolki ŭ ciomnym niebie.
Nastupnaja pa addalenaści płanieta — Nieptun, raźmieščany jašče dalej ad Sonca. Padčas paradu jon budzie ŭšaściora ciamniejšy za Uran, tamu ŭbačyć płanietu atrymajecca tolki pry vykarystańni aptyčnych pryboraŭ i zornaj karty.
Čakajecca, što źjava budzie doŭžycca niekalki dzion, u toj čas jak adny i tyja ž płaniety buduć vyraŭnavanyja — choć i ŭ inšym paradku — u žniŭni i studzieni 2025 hoda, adnak identyčny parad pryjdziecca čakać značna daŭžej.
«Na praciahu nastupnych niekalkich hadoŭ budzie niamała padobnych padziej, bo źniešnija płaniety ruchajucca davoli pavolna, a Ziamla ruchajecca chutka», — skazaŭ doktar Hrant Kieniedzi z Univiersiteta Uoryka (Vialikabrytanija).
Doktar Ed Błumier, astranom z Karaleŭskaj absiervatoryi Hrynviča ŭ Vialikabrytanii, pieraściaroh naziralnikaŭ za płanietami nie hladzieć na Sonca padčas pošuku paradu ŭ ranišnim niebie. Heta dapamoža praduchilić paškodžańnie vačej.
Instruktar i zaprošany lektar płanietaryja Ńju-Jorka Chajden rekamienduje dačakacca paradu, jaki adbudziecca 31 studzienia / abo 1 lutaha 2025 hoda. Tady ź Ziamli možna budzie ŭbačyć liniju z čatyroch jarkich płaniet i rost Miesiaca.
Kamientary