Čas čakańnia — sutki i bolš. Na vyjeździe z Polščy ŭ Biełaruś utvaryłasia vializnaja čarha z aŭto
Mnohija biełarusy, jakija žyvuć u Polščy, vyrašyli skarystacca ź vialikich vychadnych i naviedać radzimu, piša Most.
Čarha lehkavych aŭtamabilaŭ na vyjeździe z Polščy ŭ Biełaruś da viečara 30 krasavika raściahnułasia bolš čym na 4 kiłamietry. U «kalejcy» na šlachu da punkta propusku ŭ Terespali stajać 550-580 mašyn.
Prachodžańnie miažy zajmaje bolš za 20 hadzin, a ŭ asobnych vypadkach — bolš za sutki, i moža pavialičvacca.
«Usim, chto siońnia źbirajecca jechać praz Terespal: možacie nie jechać, čarha na sutak troje», — napisaŭ adzin z udzielnikaŭ prymiežnaha čata.
«Jany ščyra sprabavali padmanuć, što stajali ŭ čarzie»
Prachodžańnie miažy zaciahvajuć tyja, chto sprabuje ŭklinicca biez čarhi, adnak ź imi zmahajucca jak šarahovyja turysty, jakija abjadnoŭvajucca ŭ dobraachvotnickija hrupy, tak i palicyja.
«Učora dniom palicejskija pryjechali na centrum, adzin u aŭto pierakryŭ vyjezd, a druhi ad vyjezdu prajšoŭ da šłahbauma i źniaŭ na telefon usie mašyny, jakija stajali ŭ čarzie. Potym paru razoŭ padjazdžali, i jon vychodziŭ dy paraŭnoŭvaŭ mašyny ŭ čarzie z mašynami na videa. Adnaho vyciahnuli, štrafanuli i adpravili ŭ kaniec kalejki», — napisaŭ adzin z karystalnikaŭ.
«Zapuścili pačku i potym źniali na telefon chvost čarhi. Źjechali patrulavać na 20 chv. Za hety čas try aŭto na 1 rehijonie prystroilisia cichieńka. Palicyja prajechała pa kole i viarnułasia da ich. Jany ščyra sprabavali padmanuć, što stajali ŭ čarzie. Ale małady palicejski dobra apracavaŭ ich. Sabraŭ pašparty ŭ kiroŭcaŭ, aformiŭ niejkija papiery i razdaŭ nazad, zapatrabavaŭ pierajechać pa kole i stać u kaniec čarhi», — paćviardžaje inšy.
«U načny čas budzie tolki horš»
Tym nie mienš, daśviedčanyja padarožniki rajać nie spadziavacca na palicejskich, a rehulavać čarhu samim. Stychijnyja kamandy dobraachvotnikaŭ nie dazvalajuć niadobrasumlennym kiroŭcam prajazdžać biez čarhi.
«Usie, chto ŭ kancy čarhi, arhanizoŭvajciesia samastojna, nie spadziavajciesia na vartavych, jakija pryjeduć i razrulać situacyju. U kaho ŭ mašynie niekalki čałaviek, adpraŭlajcie ich dziažuryć uzdoŭž čarhi i asabliva na kalcy, pavarot na Okčyn, vyjezd ź Cientruma. Sami pa rolikach bačycie, jak tam nachabničajuć. Heta vaš šaniec prajechać pakul śvietła, u načny čas budzie tolki horš», — papiaredžvaje biełarus.
Nočču mnohija kiroŭcy zasynajuć i nie ruchajucca svoječasova. Z-za hetaha ŭ čarzie ŭtvarajucca prahały, u jakija lohka prystroicca biez čarhi.
«My stajali ŭ čarzie 28.04 amal 5 km, mužčyny małajcy, im asobnaja padziaka, kantralavali čarhu, kab nichto nie ŭlez nachabna ŭ razryŭ. A kali chtości ŭmudryŭsia ŭleźci, tut ža padychodzili i vyhaniali z čarhi. Arhanizavana vyjšli na kalco i da DUTY FREE, my choć i ruchalisia pa trošački, ale praktyčna ŭvieś čas», — dzielicca vopytam udzielnik čata.
Polski biznes patrabuje adkryć pamiežnyja pierachody na miažy ź Biełaruśsiu abo kampiensavać jamu straty
Kiraŭnik Dziaržaŭnaha pamiežnaha kamiteta: Spadziajomsia, žaleznaja zasłona nie apuścicca
Kiroŭca sutki prastajaŭ na polska-biełaruskaj miažy, a paśla jaho nie puścili ŭ krainu z-za niezvyčajnaha hruzu
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie9
Kamientary