Eks-redaktara «Viačerniaha Stolina» vinavaciać u sadziejničańni ekstremisckaj dziejnaści i vymahalnictvie
Byłoha žurnalista, błohiera Alaksandra Ihnaciuka zatrymali jašče ŭ lipieni 2023 hoda, zaraz pres-słužba MUS raspaviała, u čym jaho vinavaciać.
52-hadovaha Alaksandra Ihnaciuka zaraz trymajuć pad vartaj u baranavickim śledčym izalatary. Nieŭzabavie jaho pačnuć sudzić, paviedamlaje BAŽ.
U paviedamleńni ŭ aficyjnym telehram-kanale MUS śćviardžajecca, što Ihnaciuk sadziejničaŭ dziejnaści «ekstremisckaha» telehram-kanała, administratary jakoha znachodziacca za miažoj, «sistematyčna imknuŭsia dyskredytavać dziaržaŭnyja orhany» i «sprabavaŭ uładkavacca na pracu ŭ ekstremisckija internet-krynicy».
Taksama MUS zajaŭlaje, što zatrymany vyrablaŭ videaroliki z «kampramatam» na miascovych pradprymalnikaŭ i vymahaŭ ź ich hrošy, pahražajučy apublikavać hetyja fakty ŭ internecie. Što nibyta ad dziejnaści błohiera paciarpieli troje žycharoŭ Stolinskaha rajona.
Siłavoje viedamstva pakazała i kadry zatrymańnia, jakoje, jak vynikaje, było inicyjavanaje HUBAZiKam. Na videa bačna, jak u viaskovuju chatu Ihnaciuka ŭvachodziać uzbrojenyja i ŭ poŭnaj ekipiroŭcy bajcy AMAP.
Pavodle kamientara načalnika adździeła 6-ha ŭpraŭleńnia (pa Bresckaj vobłaści) HUBAZiK MUS Paŭła Kuchnaŭca, zatrymanaha abvinavačvajuć pa kryminalnych spravach za vymahalnictva (art. 208 KK), za paklop na Łukašenku (art. 367 KK) i ŭ sadziejničańni ekstremisckaj dziejnaści (art. 361-4 KK).
Videabłohiera Alaksandra Ihnaciuka zatrymali 18 lipienia 2023 hoda. Pra heta stała viadoma vypadkova: jon daŭno žyŭ adzin u addalenaj vioscy Pinskaha rajona, i siabry zaniepakoilisia pra jahony los paśla taho, jak jon ciaham niekalkich tydniaŭ nie vychodziŭ na suviaź.
17 žniŭnia 2023 hoda biełaruskaja pravaabarončaja supolnaść pryznała Ihnaciuka palityčnym viaźniem. U kastryčniku paviedamlałasia, što jaho vinavaciać u paklopie. Na kastryčnckim videa Ihnaciuk u kajdankach kazaŭ, što zdymaje dla kanała «hramadska značny palityčny kantent», i zajaŭlaje, što jaho zatrymali za ŭčynienyja im dziejańni ŭ 2022 hodzie.
«U hetym hodzie ja supracoŭničaŭ z ekstremisckimi farmiravańniami, akazvaŭ im sadziejničańnie, tamu ŭ dačynieńni da mianie raspačata kryminalnaja sprava», — kaža Ihnaciuk.
Alaksandr Ihnaciuk viadomy tym, što naprykancy 90-ch — pačatku 2000-ch vydavaŭ niezaležnuju rehijanalnuju hazietu «Viečiernij Stolin» i byŭ jaje hałoŭnym redaktaram.
U 2003 hodzie pavodle zahadu tahačasnaha ministra infarmacyi Michaiła Padhajnaha, vypusk haziety prypyniaŭsia na try miesiacy, bo redakcyja nibyta parušyła art. 5 «Zakona ab druku i inšych ŚMI». Hazieta «Viečiernij Stolin» adnaviła vychad u kastryčniku 2003 hoda, adnak užo ŭ śniežni sud pryznaŭ Alaksandra Ihnaciuka vinavatym u abrazie byłoha staršyni Stolinskaha rajvykankama Uładzimira Paškieviča. Tady redaktara haziety pavodle kryminalnaha artykuła 369 pakarali štrafam pamieram 30 bazavych vieličyń, što składała na toj čas kala 230 dołaraŭ. Mienavita hety vypadak pryhadvaje ciapier presavaja słužba MUS, zhadvajučy, što Ihnaciuk «byŭ asudžany za abrazu pradstaŭnika ŭłady».
Kamientary