92-hadovy Rupiert Mierdak aženicca z byłoj cieščaj Abramoviča
I heta budzie ŭžo piaty šlub miedyjamahnata numar adzin u cełym śviecie.
92-hadovy miedyjamahnat Rupiert Miordak źbirajecca ŭ chutkim časie zhulać viasielle z Alenaj Žukavaj, byłoj cieščaj rasijskaha mahnata Ramana Abramoviča. Heta budzie jahony piaty šlub, piša Bi-bi-si.
Ludzi z atačeńnia Mierdaka paviedamili haziecie New York Times, što jon užo zaručany z 67-hadovaj Žukavaj, i viasielle adbudziecca ŭ červieni ŭ majontku mahnata ŭ Kalifornii.
Pa źviestkach presy, Alena Žukava — byłaja žonka rasijskaha miljardera Alaksandra Žukava i maci madeli Darji Žukavaj, ź jakoj z 2008 da 2017 hoda byŭ žanaty Raman Abramovič.
Aŭstralijec Rupiert Mierdak u minułym hodzie pajšoŭ z pasady staršyni praŭleńniaŭ stvoranych im suśvietnaj miedyja-karparacyi News Corp i telekanała Fox, pieradaŭšy kiravańnie svaim dzieciam.
Z Alenaj Žukavaj jon, pa źviestkach presy, sustrakajecca ź leta minułaha hoda. Jany paznajomilisia na viečaryncy ŭ adnoj z byłych žonak Mierdaka, pradprymalnicy kitajskaha pachodžańnia Vendzi Den, nieŭzabavie paśla taho, jak miedyjamahnat razarvaŭ zaručyny z byłym kapiełanam palicyi En Leśli Śmit.
Akramia Den, Mierdak byŭ žanaty sa ściuardesaj z Aŭstralii Patrysijaj Bukier, žurnalistkaj z Šatłandyi, napałovu estonkaj Hannaj Man, a taksama z amierykanskaj madellu i aktorkaj Džery Choł.
News Corp Rupierta Mierdaka vałodaje sotniami haziet i inšych srodkaŭ masavaj infarmacyi pa ŭsim śviecie. Stvorany ŭ 1996 hodzie telekanał Fox — zaraz samy papularny kanał u ZŠA.
Pačynaŭ Mierdak u 1950-ch u rodnaj Aŭstralii. U 1969 hodzie jon kupiŭ dźvie «žoŭtyja» brytanskija haziety — News of the World i Sun, zatym — amierykanskija New York Post i Wall Street Journal i takim čynam pastupova stvaryŭ hihanckuju mižnarodnuju miedyja-impieryju.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary