Mask abvinavaciŭ u padpale na zavodzie Tesla ŭ Niamieččynie «tupych ekaterarystaŭ»
Vytvorčaść naŭrad ci adnovicca raniej budučaha tydnia, a naniesienaja prastojem škoda aceńvajecca ŭ dzieviaciznačnuju sumu.
Biznesoviec Iłan Mask nazvaŭ durnoj sprobu padpału na terytoryi zavoda Tesla pobač ź Bierlinam, u vyniku čaho była prypynienaja vytvorčaść elektramabilaŭ. Adkaznaść za padpał uziała na siabie ultralevaja hrupoŭka, na dumku jakoj na zavodzie vykarystoŭvałasia zališniaja rabočaja siła i resursy, piša Bi-bi-si.
U samoj kampanii paviedamili, što vytvorčaść naŭrad ci adnovicca raniej budučaha tydnia, a naniesienaja prastojem škoda aceńvajecca ŭ dzieviaciznačnuju sumu.
Tesla choča ŭdvaja pašyryć svaju vytvorčaść u Niamieččynie, adnak hety płan vyklikaŭ niezadavolenaść u ekołahaŭ.
U svaim dopisie ŭ sacsietcy X Mask, apisvajučy sprobu padpału, užyŭ niamiecki vyraz extrem dumm, nazvaŭšy jaje «nadzvyčaj durnoj zadumaj».
«Heta albo samyja tupyja ekaterarysty na śviecie, albo jany prosta maryjanietki ŭ rukach tych, chto nie stavić pierad saboj pravilnyja ekałahičnyja mety», — napisaŭ jon.
U svaju čarhu aktyvisty, jakija nazyvajuć siabie Volcano Group, zajavili, što ich metaj byŭ sabataž vytvorčaści, jaki, ź ich punktu hledžańnia, źjaŭlajecca zanadta pracajomkim i resursajomistym.
Jany abvinavacili Tesla ŭ zabrudžvańni hruntavych vod i vykarystańni vielizarnaj kolkaści pitnoj vady.
U vyniku padpału zaharełasia apora vysakavoltnaj linii elektrapieradač, paśla čaho spyniłasia padača elektryčnaści na sam zavod i ŭ bližejšyja nasielenyja punkty.
U Tesla paviedamili, što praz vymušanaje spynieńnie adpravili rabočych pa damach. Budynki fabryki nie paciarpieli.
Palicyja ziamli Brandenburh paviedamiła, što ŭvažliva vyvučaje list ekaaktyvistaŭ.
Ministr unutranych spraŭ rehijonu Mikaeł Štubhien u aŭtorak ranicaj zajaviŭ, što «siły pravaparadku adreahujuć na hetuju dyviersiju z usioj strohaściu».
Niekatoryja ekaaktyvisty vystupajuć suprać pašyreńnia Bierlinskaj fabryki z-za taho, što dla hetaha pryjdziecca vysiekčy susiedni les.
Tam užo raźmiaścilisia łahieram kala 100 aktyvistaŭ, jakija paśpiašalisia dystancyjavacca ad padpału. Tak, hrupa pad nazvaj «Robin Hud» paviedamiła Bi-bi-si, što nie maje nijakaha dačynieńnia da pažaru.
Zavod u Bierlinie byŭ pabudavany z raźlikam na vypusk 500 tysiač aŭtamabilaŭ u hod, adnak ciapier Mask choča padvoić vytvorčaść.
Ciapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»6
Kamientary