Na ciele Navalnaha vyjaŭleny siniaki ad kurčaŭ — «Novaja hazieta Jevropa»
Cieła rasijskaha apazicyjaniera znachodzicca ŭ morhu akruhovaj kliničnaj balnicy Salecharda, piša «Novaja hazieta Jevropa». Pa stanie na 17 lutaha ŭskryćcio nie pravodziłasia. U hetym morhu raniej adkazali, što cieła tam niama.
Pa słovach krynicy vydańnia, cieła Navalnaha spačatku pavieźli ŭ Łabytnanhi, ale ŭviečary 16 lutaha dastavili ŭ Salechardskuju akruhovuju kliničnuju balnicu na vulicy Mira.
— Zvyčajna cieły pamierłych u kałonijach dastaŭlajuć adrazu ŭ Biuro sudmiedekśpiertyzy na vulicu Hłazkova, ale tut pavieźli čamuści ŭ kliničnuju, — raspavioŭ supracoŭnik Salechardskaj stancyi chutkaj dapamohi, budynak jakoj (jak i budynak krematoryja) znachodzicca ŭ radyusie 500 mietraŭ ad balnicy. — Davieźli da morha, zanieśli, a potym pierad dźviaryma dva palicejskija ŭstali. Jany b jašče płakat paviesili z nadpisam «Tut robicca niešta zahadkavaje»!
Pavodle krynic vydańnia, miascovyja patałahaanatamy nie rabili ŭskryćcio.
— Tut mierkavańni ŭ pieršy raz razyšlisia, — raspavioŭ supracoŭnik «chutkaj». — Adny kazali, što pryjšło ŭkazańnie z Maskvy dačakacca staličnych śpiecyjalistaŭ, a inšyja śćviardžali, što sami lekary admovilisia rabić vykryćcio. Sprava ž palityčnaja, i jak jana dalej pavierniecca, niezrazumieła. A kali robiš vykryćcio i prychodzić pramy zahad unieści źmieny ŭ vynik, to ŭžo nie adkrucišsia. I potym ciabie ž mohuć i «krajnim» zrabić. A kali ŭskryćcio nie pravodziłasia, to i pytacca nakštałt jak niama z kaho.
Krynicy ŭ «chutkaj» paviedamili, što na ciele Navalnaha vyjaŭleny siniaki, atrymanyja im pry žyćci. Ale nie ad źbićcia, a ŭ vyniku inšych dziejańniaŭ.
— Jak supracoŭnik «chutkaj» z davoli vialikim stažam, mahu skazać, što takija paškodžańni, jak apisvali ich tyja, chto bačyŭ, zjaŭlajucca ad kurčaŭ, — kaža miedyk sa «chutkaj». — Čałaviek bjecca ŭ kanvulsijach, jaho sprabujuć utrymać, a sutarhi byvajuć vielmi mocnymi, voś siniaki i zjaŭlajucca. A jašče kazali, što na hrudziach u jaho taksama siniak jość. Ale taki, jaki zjaŭlajecca ŭ suviazi ź niepramym masažam serca.
Vydańnie nahadvaje słovy reanimatołaha Michaiła Fremdermana, jaki ŭ 2020 hodzie pieraličvaŭ simptomy atručvańnia «navičkom», siarod jakich byli kurčy: «jon, u svaju čarhu, pačynaje mocna dziejničać na muskułaturu, dychańnie, na ciahlicavy tonus, na cisk, pracu serca. Parušajecca rehulacyja pracy ŭnutranych orhanaŭ i niervova-myšačnaj sistemy. Čałaviek hublaje prytomnaść, u jaho mohuć być kurčy, kanvulsii, chutka raźvivajecca koma. Niekatoryja vidy možna nanieści navat na skuru i čałaviek atrymlivaje ciažkaje atručvańnie».
Kamientary
U čekistaŭ u krainie ŭsio sterylna (nie jak u Biełarusi, ale ŭsio ž), nichto i piknuć nie dumaje, praź miesiac, vybary, jakija majuć prajści nadzvyčaj i spakojna. I raptam zabivajuć hałoŭnaha apazicyjaniera, što vyklikaje pratesty, jakich na bałotach nie było ŭžo dva hady. Stasunki z Zachadam boh ź imi, bo tam ničoha, akramia zakłapočanaści, nie budzie. Ale źnikaje kaštoŭny aktyŭ, jakoha možna było abmianiać na svajho ahienta. Dy i z palitviaźnia robić abraz, na jaki ciapier viečna buduć malicca.
Dyk pytańnie, navošta jaho ciapier zabivać? Biezumoŭna, Navalnaha zabiŭ pucinski režym, ale nie naŭprostavymi dziejańniami, skiravanymi na heta. I nijakuju śpiecapieracyju čekisty nie vydumlali.