Piać tysiač ruž i novyja ekaściežki: jak źmienicca Partyzanski rajon stalicy hetaj viasnoj
U Partyzanskim rajonie Minska pačynajecca maštabny siezon dobraŭparadkavańnia. Jak paviedamiŭ dyrektar miascovaha «Zielanbuda» Vital Viesiałoŭ, sioleta asnoŭny akcent zrobiać na stvareńni zon dla cichaha adpačynku i pašyreńni sietki ekałahičnych maršrutaŭ u miežach Ślapianskaj vodnaj sistemy, pišuć «Minsk-Naviny».
Novyja maršruty dla prahułak
U rajonie płanujuć abstalavać dźvie novyja ekałahičnyja ściežki. Pieršaja projdzie ad vulicy Staletava da Dziciačaj čyhunki, a druhaja — u miežach vulicy Staletava, zavułka Kazłova i vulicy Daŭhabrodskaj. Na hetych učastkach abnoviać pakryćcio darožak i ŭstalujuć sučasnuju sadovuju meblu. Prajekty raspracoŭvajuć z ulikam minimalnaha ŭmiašańnia ŭ pryrodnaje asiarodździe.
Kvietkavyja kaskady i šmathadovyja raśliny
Centralnyja vulicy i raździalalnyja pałosy daroh upryhožać kašpo ź pietunijami, što stvoryć efiekt kvietkavych kaskadaŭ.
«Zielanbud» pastupova admaŭlajecca ad adnahadovych kvietak na karyść šmathadovych raślin, jakija zachoŭvajuć pryhažość niekalki siezonaŭ.
Asablivuju ŭvahu nadaduć ružam: paśla stanoŭčych vodhukaŭ minčan minułym letam, kolkaść vysadžanych kustoŭ pavialičać da 5 tysiač (letaś było 4 tysiačy).
Dekaratyŭnyja kusty i drevy
Dla azielanieńnia pramysłovych zon i parkaŭ užo zakuplena 4 tysiačy dekaratyŭnych kustoŭ, siarod jakich barbarys i kizilnik. Taksama na terytoryi rajona vysadziać klony, jasieni i lipy. Hetyja parody dobra padychodziać da miascovaha klimatu, dajuć ščylny cień i efiektyŭna čyściać pavietra.
Žycharoŭ rajona zaprašajuć dałučacca da azielanieńnia padčas subotnikaŭ.
Ciapier čytajuć
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich2121
Kamientary