Naftapravod u rajonie Prymorska paškodžany nočču dronami. Party Uść-Łuha i Prymorsk druhi tydzień nie prymajuć naftu
U noč na 5 krasavika Leninhradskaja vobłaść zaznała čarhovuju ataku bieśpiłotnikaŭ, jakaja pryviała da novych razbureńniaŭ naftavaj infrastruktury. Pavodle zajavy hubiernatara rehijona Alaksandra Drazdenki, siły SPA źbili 19 dronaŭ. Abłomki BPŁA paškodzili ŭčastak naftapravoda ŭ rajonie porta Prymorsk. Hety incydent pahoršyŭ i biez taho krytyčnuju situacyju ŭ najbujniejšych ekspartnych chabach Rasii na Bałtyjskim mory.
Udary pa naftavaj infrastruktury za apošnija dva tydni sakavika faktyčna paralizavali pracu Prymorska i Uść-Łuhi —iany źjaŭlajucca najbujniejšymi naftavymi partami Rasii na paŭnočnym zachadzie krainy.
Pavodle źviestak Reuters, z 22 sakavika Prymorsk praktyčna pierastaŭ prymać dyzielnaje paliva dla adhruzki, a pa Uść-Łuzie za dziesiać dzion było naniesiena nie mienš za piać udaraŭ. U vyniku kolkaść tankieraŭ, jakija vychodziać z hetych partoŭ, skaraciłasia z 40—50 sudnaŭ u tydzień da adzinkavych vypadkaŭ.
Raniej Reuters paviedamlała, što ŭkrainskija ŭdary vyvieli sa stroju kala 20% rasijskich naftavych ekspartnych mahutnaściaŭ — heta prykładna 1 młn barelaŭ u sutki.
Naftapierapracoŭčyja zavody vymušany pierachodzić na darahija čyhunačnyja pieravozki, adnak alternatyŭnyja party nakštałt Vysocka ci Tamani nie majuć patrebnaj prapusknoj zdolnaści. Na hetym fonie schoviščy «Transnafty» pierapaŭniajucca syravinaj. Kali ekspart nie adnovicca ŭ najbližejšy čas, zdabyvajučyja kampanii buduć vymušany kansiervavać śvidraviny i źnižać vytvorčaść nafty.
Ciapier čytajuć
Łukašenka zaklikaŭ žycharoŭ Homielščyny nie chvalavacca z-za ŭltymatumu Zialenskaha adnosna retranślataraŭ22
Łukašenka zaklikaŭ žycharoŭ Homielščyny nie chvalavacca z-za ŭltymatumu Zialenskaha adnosna retranślataraŭ
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary