Hinuli ad pavodki, ale vyratavalisia pierajezdam. Jak ciapier žyviecca ŭ Biełarusi turapadobnym bykam

Try hady tamu tryvohu zabiŭ žychar vioski Pahost Žytkavickaha rajona, jaki natknuŭsia na tušy dzikich bykoŭ. Vyśvietliłasia, što z-za razvodździa žyvioły apynulisia na maleńkich astraŭkach i nie mahli dabracca da pojmiennych łuhoŭ. Jany pamirali ad hoładu abo tanuli ŭ sprobach pieraadoleć vodnuju pieraškodu. Pad pahrozaj u pieršuju čarhu apynulisia cialaty.

Žurnalisty Tochka.by tady dazvanilisia da miascovych uład. Tyja raskazali pra płany dastavić žyvioł na terytoryju, jakaja mienš padtoplivajecca viasnoj. I, treba adznačyć, abiacańnie vykanali. Turapadobnych bykoŭ pieravieźli ŭ zakaźnik «Sporaŭski».

Čytač Tochka.by, jaki lubić padarožničać pa pryrodnych miaścinach Biełarusi, praz try hady pierakanaŭsia ŭ hetym asabista i padzialiŭsia cikavymi padrabiaznaściami z žyćcia žyvioł.

Jak turapadobnyja byki dapamahajuć pryrodzie

Svajaki turaŭ źjavilisia na Paleśsi ŭ sakaviku 2020 hoda ŭ miežach mižnarodnaha prajekta PRAAN/HEF «Vietłands» dla adnaŭleńnia bijaraznastajnaści pojmiennych łuhoŭ Prypiaci. Z łatvijskaha Nacyjanalnaha parku «Kiemiery» tady pieravieźli 15 asobin turapadobnaj žyvioły. Na novym miescy ich kolkaść vyrasła, ale niebyvałaja pavodka 2023 hoda prymusiła šukać źviaram novy dom.

Pavialičyć

Jak ciapier raskazali surazmoŭcu Tochka.by, byki sapraŭdy byli źniasilenyja razvodździem: u «Sporaŭski» jany pryjechali dobra taki schudniełymi. Ciapier ža ŭ ich rasparadžeńni šmat raślinnaści. A zimoj dla žyvioł padvoziać siena.

«Kažuć, što miascovaha traktarysta jany vydatna viedajuć, vychodziać na huk jaho techniki, razumiejučy, što pryvieźli łasunki. Pry hetym z naviedvalnikami, jakich vodziać na ekskursii rabotniki zakaźnika, byki «kamunikavać» nie lubiać», — dzielicca ŭnikalnymi detalami padarožnik.

Na jaho dumku, bykam tut samaje miesca. Akramia niepasredna razmnažeńnia, jany vyrašajuć važnyja pryrodnyja zadačy. Naprykład, jaduć niazručnuju vysokuju travu ŭ miescach hniezdavańnia ptušak i farmujuć mazaičnaść terytoryi, pryciahvajučy inšyja vidy faŭny.

Zakaźnik «Sporaŭski» pieršym u krainie atrymaŭ mižnarodnyja statusy achovy Ramsarskaha ŭhodździa (pryznańnie vysokaj ekałahičnaj kaštoŭnaści vodna-bałotnych uhodździaŭ) i IBA (Important Bird and Biodiversity Areas, terytoryja, važnaja dla ptušak). Mała chto viedaje, što ŭ Biełarusi hniazdujecca bolš za pałovu ŭsioj papulacyi viartlavych čarotavak. Prybałotnyja ziemli, jakija zarastajuć, pieraškadžajuć ich razmnažeńniu i pryvodziać da źnižeńnia kolkaści.

Pavialičyć

Miascovyja haspadarki jak mohuć ratujuć situacyju: tam, kudy moža dabracca čałaviek, ładziać konkursy pa ručnym kašeńni. Ale hetaha mała. Jakraz u ciažkadastupnych miescach funkcyju pryrodnych hazonakasiłak vykonvajuć byki.

U «Sporaŭski» pieravieźli nie tolki bykoŭ

Turapadobnych bykoŭ pryvieźli ŭ «Sporaŭski» prykładna ŭ adzin čas z tarpanapadobnymi końmi (ich — z zakaźnika «Nalibocki»). Pieryjad karancinu žyvioły davoli družna praviali ŭ adnym valjery.

Pavialičyć

Ciapier jany razyšlisia pa miascovych lasach i łuhach. I razam «kosiać» travu ŭ nieprachodnych miescach. Navasioły ŭpisalisia ŭ charčovy łancužok pa «zakonie džunhlaŭ». Maładniak nie zastrachavany ad napadu drapiežnikaŭ. Tak, rabotniki zapaviednika pa pareštkach daviedalisia, što adno ciala źjeli vaŭki — vidać, jano zastałosia biez uvahi darosłych. Ale heta, jak zaŭvažaje surazmoŭca, častka taho samaha dzikaha žyćcia i naturalnaha asiarodździa pasialeńnia.

Jašče vidać, što niekatoryja byki atrymlivajuć surjoznyja traŭmy ŭ bajach z surodzičami — za prava ličycca važakom abo haspadarom peŭnaj terytoryi.

Pa acenkach supracoŭnikaŭ zakaźnika, zaraz bykoŭ kala 30. Dakładnuju ličbu pa zrazumiełych pryčynach nazvać składana. Ale, miarkujučy pa ŭsim, statak pavialičyŭsia jak minimum udvaja z momantu pieravozki z Łatvii. Bolš za toje, apošnim časam rabotniki redka zaŭvažajuć samak i miarkujuć, što «damy» pajšli naradžać u zacišnyja miescy. A značyć, pierśpiektyva raźvićcia tutejšaha pryrodnaha asiarodździa ŭzmacniajecca.

• 12
• 0
• 0
• 0
• 0
• 0
• 1
• 2