Vystupajučy na schodzie Biełkaapsajuza, Alaksandr Łukašenka zajaviŭ pra zatrymańnie čatyroch supracoŭnikaŭ Kamiteta dziaržkantrolu. Miarkujučy pa ŭsim, idzie havorka pra zatrymanych supracoŭnikaŭ Departamienta finansavych rasśledavańniaŭ KDK, pra jakich «Naša Niva» pisała raniej.
«Kolki ŭ ciabie ŭžo tam pad śledstvam? Čatyry čałavieki? — zapytaŭsia Łukašenka ŭ staršyni KDK Vasila Hierasimava. — Tyja, jakija kantralavali razam ź im. Nichto nie paškadavaŭ. Siońnia ty kantralor, zaŭtra ty parušyŭ zakon — tudy [u turmu]», — skazaŭ Łukašenka.
Pra zatrymańnie bolš za 20 aficeraŭ Departamienta finansavych rasśledavańniaŭ KDK «Naša Niva» paviedamlała 8 lutaha. KDB pravodziła aryšty aficeraŭ centralnaha aparata DFR i Upraŭleńnia pa Minsku i Minskaj vobłaści ŭ ramkach rasśledavańniaŭ spraŭ pa 430 (atrymańnie chabaraŭ) i 424 (pieravyšeńnie słužbovych paŭnamoctvaŭ) artykułach.
Taksama padčas hetaha vystupleńnia Łukašenka pryznaŭ prablemu z karupcyjaj u Biełarusi i paprasiŭ čynoŭnikaŭ nie brać i nie davać chabaru, tamu što «lepš žyć vielmi biedna, ale na voli». Pry hetym jon nahadaŭ, što zatrymlivajucca navat jahonyja pamočniki, namiakajučy na los Ihara Bryło, i im «budzie bolš, čym kamu-niebudź».
Kamientary
Bačyć svaju budučyniu?