Ad dziaržaŭnych biełaruska-rasijskich miedyja plujecca navat Prydybajła
Prapahandysty Rasii i Biełarusi čakajuć novaj chvali hrošaj, jakaja na ich abryniecca sa stvareńniem miedyjakampanii Sajuznaj dziaržavy. Jana voźmie na siabie kaardynacyju prapahandy ŭ druku, internecie i na telebačańni. Ryhor Azaronak i Kanstancin Prydybajła abmierkavali novyja haryzonty, što adkryvajucca pierad imi.
Ryhor Azaronak namiaknuŭ, što rasijskija prapahandysty sastupajuć biełaruskim, im jość čamu pavučycca.
«Nu voś, naprykład, taja ž situacyja z Nadzieždzinym. Čamu b nie abmierkavać situacyju z dvaccatym hodam? Jak u nas było, i jak my heta pieraadolvali? Bo kali ciapier danaciš Nadzieždzinu, ty faktyčna danaciš na USU», — adkryŭ daśviedčany biełaruski prapahandyst rasijskamu, dzie pakul da takoha nie dadumalisia.
«Bo heta kandydat parazy, heta kandydat kapitulacyi. Heta kandydat taho, kab adtul syšli ruskija vojski, i USU tam vyrazali ŭsio nasielnictva Daniecka», — patłumačyŭ Azaronak.
«Taki simbijoz, ahulny pohlad — jon patrebny. Jak bačyš miedyjachołdynh i hetak dalej?» — spytaŭ Azaronak Prydybajłu.
Prapahandyst dobra finansavanaj rasijskaj miedyjakampanii RT adkazaŭ, što nie viedaje šmat čaho pra dziejnaść struktury teleradyjokampanii Sajuznaj dziaržavy, ale ŭ jaho šmat pytańniaŭ.
«I ja navat nie ŭsio, u pryncypie, vykazvaju publična, i, skažam tak, navat prasili nie havaryć heta publična. Ale, ščyra kažučy, nu časam zło biare, tamu što toj kantent, jaki my bačym ciapier, jon nie vytrymlivaje nijakaj krytyki absalutna. U dadzienaj situacyi ja vystupaju jak, viedaješ, taki zmahar ci tam libierał, jaki ŭsio heta bačyć, i prosta choča plavacca i kazać: chłopcy, a kudy iduć dziaržaŭnyja hrošy?» — adkazaŭ Prydybajła, nibyta jon stvaraje zusim inšy kantent.
Sam Prydybajła ŭ 2020 hodzie tak aśviatlaŭ pratesty, što šmat chto ź jaho blizkich siabroŭ paviedamiŭ, što jon dla ich pamior. Prydybajła taksama ŭvajšoŭ u biełaruskuju historyju tym, što nazvaŭ biełarusaŭ «tupymi».
Apošni jaho publičny fejł na biełaruskaj hlebie byŭ, kali jon zapościŭ nibyta «hołuju viečarynku ŭ štabie BNF». Ale toj zdymak nasamreč byŭ zrobleny nie ŭ Biełarusi, a ŭ Rasii, dyj na dziasiatak hadoŭ paźniej.
Samy apošni publičny prykład jaho samaaddanaj pracy na prapahandu — fejkavy zvanok na telekanał «Doždž». Prydybajła nie prydumaŭ ničoha lepšaha, jak paviesialicca na temie ludziej, jakija zamiarzajuć u šerahu rasijskich rehijonaŭ. Jon pazvaniŭ na telekanał i pradstaviŭsia žycharom Lipiecka, što zamiarzaje biez aciapleńnia. Heta jaho paviesialiła.
Ale stvareńnie miedyjachołdynha Sajuznaj dziaržavy — heta chutčej nie pra kantent, a pra hrošy. Naprykład, Prydybajła, pavodle źviestak FBK, u 2021 hodzie atrymlivaŭ na RT štomiesiac bolš za 4000 dalaraŭ. Navat kiraŭniki biełaruskich miedyjakampanij zarablajuć mienš. Z nabližeńniem da rasijskich hrošaj jany vidavočna spadziajucca na bolšaje.
Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony10
Kamientary